Read Western Dani Yaya 20 Bible Online

Yaya 20 - Western Dani bible

Yaya 20

¹Tamban eekak yuurak ne iyaalok warennagagerak Hari Minggu paga o weerikit nduk o apit aago kagak, kwe Mariya awi Magaralena mendek ndoome nage nagagerik, yugum tu narak nogo pelenogo nappugu kagagerak.

²Kage nagagerik, puu'nuk Timon Peterut inom, aap Yetut oone waganggwi mendek ambi iniki kunik wonagagerak nogo inom, iya wage nagagerik, yorage logonet, “Wologwe! Ninogoba eebe ndoome nen waganogo nggeeme pi nagaarak nogo nit nineenggo'lek o.”

³Yorage mbareegi, at Peterut aap Yetut oone waganggwi mendek ambi nogo imbirak wundi wogo nogogwaarik, ndoome pekka nawok nduk,

⁴imbirak puu'nuk nogo logonet, at Yetut oone waganggwi mendek ambi nogo nen Peterut wuppunuk, at aa'nduk ndoome nogome ari nagagerak.

⁵Ndoome nogome aa'nduk ari nage nagagerik, ena tebe yinuk, enegen mannage nagagerik, yum yawenak nogo mban enaani nggonenak kage nagagerik, unggulik puk agagerak.

⁶Puk agagerak wonage kagak, at ambokan nagagerak Timon Peterut nogo, nok-nok ndoome unggwi nage nagagerik, yum yawenak enaani nggonenak nogo inom,

⁷ndi, yum at anobak me perenogo pereegwaarak nogo inom, enegen kagagerak. Yum at anobak me perenogo pereegwaarak nogo yum yawenak nggonenak nogo inom lek, alik me taati liirogon yunggunogo pugu wonage kagagerak.

⁸Ndi, kage nagagerik, awo taati wonage kagak at Yetut oone waganggwi mendek ambi ndoome aa'nduk nagagerak nogo nen kunduk, ndoome unggwi nanuk, enegen kage nagagerik, abet mbareegerak.

⁹At Yetut kambunuk, nogo menggam nen eenik a'nuk, mi'narigin nogo, Ala wone liiru mbanak wonagagerak kwe, at oone waganggwi mendek nogo awo liippega'lek kobak aret wonogogwaarak.

¹⁰It nogo imbirak inigen kogo nogogwaarik, iname iniyok paga aret wogogwaarak.

¹¹Iname wogwe iigak, kwe Mariya nogo ndo ambe paga taati le ari nagagerak. Le ari logonet, ena tebe yinuk, enegen mannage nagagerik,

¹² malayikat mendek mbere inayum yanggwi lan aago yirik Yetut eebe warogo pereegwam nogome ambi anobak wonagagim, ndi, ambi iyok wonagagim kwi'ndak wonogwe iyareegerak.

¹³Iige mbareegi, it nogo nen kwe Mariya yogo logonet, “Kwe yi wae. Kat nonggop nduk le ari agandik o?” Yogo mbareegwa, at Mariya nen, “Lek o. It aakumi nen an nogoba wonok nagaarak o. Ndi, at eebe nggeeme pi nagaarak nogo an neenggo'lek me, le ari agarik o.”

¹⁴ Yorage nagagerik, ena logurogon ambokan pe'nage nagagerik, at Yetut taati mi'ndak wonage kagagerak kwe, “Yi at aret,” mbarulik.

¹⁵Mbaka'lek mbareegi, Yetut nen at yoge logonet, “Kwe yi wae. Kat nonggop nduk le ari agandik o? Ta kwaake agandik?” Yoge mbareegi, at Mariya nogo nen, “Aap yi, yabu yarak unde nogo aret,” mbake logonet, “Ai, nogoba. At eebe kat aret wonok nagandak kenok, ngga pi nagandak an wa naakit nduk, yo'niru o.”

¹⁶Yoge mbareegi, at Yetut nen, “Mariya wae!” Yoge mbareegi, at ena logurogon pekkage nagagerik, Iberani inoone paga, “Raboni,” yoreegerak. (“Raboni” yoreegerak nogo ti, nit ninoone paga “Nogoba ngguru o,” yinuk, yoreegerak.)

¹⁷Yoge mbareegi, at Yetut nen, “An nogoba wonage me awo ka lagangga'lek me, pi'nabugun o. Kit kinogoba ti, an nogoba. Ndi, kit kinogoba Ala ti, an nogoba Ala aret me, at wonage me ka lagi nage agaarik, yegerak o, yinuk, noreewi ineenu logowak nduk, yora nak o.”

¹⁸Yoge mbareegi, at Mariya awi Magaralena mendek nen Yetut oone waganggwi mendek iya wage nagagerik, yorage logonet, “Wologwe! Ninogoba muk eenik mi'nagaarak nenegen kagarak o,” yinuk, yorage nagagerik, Yetut nen at yoreegerak nogo mbininogo yoragagerak.

¹⁹Tamban eekak yuurak ne iyaalok warennagagerak Hari Minggu ti paga o apit agagerak kagak, at Yetut oone waganggwi nogo nen aakumi Yakuri mendek inagabiti nen oome tu kunci nappunuk wonogwe me, Yetut inenggela'me mi'nari unggwage nagagerik, yorage logonet, “Noreewi kinogut li o.”

²⁰Wone ti yorage nagagerik, at eenggi inom, obate pelenak inom, nigiyareegerak. Nigiige mbareegi, at Yetut oone waganggwi mendek nen, “Ninogoba yi aret o,” yinuk, yelok kogo nogogwaarik, iniki ale'nggen ambik mbareegwaarak.

²¹ Inale'nggen ambik mbakwi iigak, Yetut nen ambinom yorage logonet, “Noreewi o. Kiniki kwippinip o. An nogoba nappani wagagerak nogo kwak, an nen kit nappinagage agarik o.”

²²Yorage nagagerik, ambe aagi inoba pu eerogo piige logonet, “Aberiniki kolaanip o,” yorage nagagerik,

²³ “Kit nen aakumi inomaluk lek eerogo piigwi kiinok, lek aret arigin o. Ndi, it inomaluk lek eerogo piigwi lek kiinok ti, inomaluk ti itok kunik aret logogin o,” yinuk, yoragagerak.

²⁴Wone yoragagerak nogo ti, at oone waganggwi mendek 12 nogo ambi Tomat endage ambi Kulu'mbere toonak nogo, eebe lek kagak iya wagagerak me,

²⁵at Yetut oone waganggwi mendek ando nogo nen Tomat yogo logonet, “Ninogoba muk ninigen kogoorak o.” Yogo mbareegwa, at Tomat nen, “Wologwe! An at eenggi pulu warak awinobam nenegen kage, ndi, eenggi pulu warak me inom, obate pelenak me inom, neenggi mambege, eeka'lek neegak, an abet mbarigin lek o,” yinuk, yoragagerak.

²⁶Yorage mbareegi, nogo 7 yinuk, ko'lu paga it aap Yetut oone waganggwi mendek Tomat inom oome tu kunci narak kagak wonogwe me, Yetut inenggela'me mi'nari unggwage nagagerik, yorage logonet, “Noreewi kinogut li o.”

²⁷Yorage nagagerik, Tomat nogo yoge logonet, “Tomat wae. Keenggi an neenggi yi, pi'nake logonet, nawinobam pekkage, ndi, kobaak ngginogo nobate pelenak me keenggi mambege, ee'nake logomenggendik, kiniki yungguppegak eeke logonet, abet nombaka'lek logorak ti mage o. Ata, kiniki noba panggombunuk, abet nombake logot o,” yinuk, yoreegerak.

²⁸Yoge mbareegi, Tomat nen at yoge logonet, “Ai! An nogoba Ala kat aret keegi o.”

²⁹Yoge mbareegi, Yetut nen at yoge logonet, “Tomat wae! Kat kenegen neege nagandik, kiniki noba panggombunuk, abet nombakendak kwe, it aakumi ando inigen neega'lek logonet, iniki noba panggombunuk, abet nombakwi iinok perak, iniki ale'nggen ambik kogo logogun o,” yinuk, yoreegerak.

³⁰Yetut nen at oone waganggwi mendek inenggaanom ineenu ariyak inagabiti warak mendek ando apit aret eeke nagagerak kwe, mbuku yi paga liiru mbanak lek o.

³¹Eeke nagagerak liiru mbanak yi nogo ti, Yetut ti, Ala nen at aput leenogo mippereegerak Keritut aret kit abet mbakwi, ndi, abet mbakwi kiinok, at eekkinabemenggerak paga kineenik mondok mendek kologwe, eeko logomunggup nduk, wone yi liiru mbaneegirak o.