Read Western Dani Yaya 3 Bible Online

Yaya 3 - Western Dani bible

Yaya 3

¹It Yakuri mendek inowe aap Pariti mendek ambi endage Nikoremut aret wonagagerak.

²At nogo ne ambi oonikiya paga Yetut owagam wage nagagerik, yoge logonet, “Ngguru wae! Kat aakumi mamuninake logonok nduk, Ala nen nappagi wagaarak nineenu aret o. Aakumi Ala inom kunik lek kenok, ineenu ariyak inagabiti warak mendek kat eerit nege menggendak nogo, it nen eeriyak abu meek o.”

³Yoge mbareegi, at Yetut nen onggo at yoge logonet, “Aap ambit-ambi ngget nda'naga'lek kenok, Ala abu'me piige menggim enegen kaagin lek o, yinuk, mondok abet aret yokkigi o.”

⁴Yoge mbareegi, at Nikoremut nen, “A puk! Aap abu anggok a'nuk, peebi nonggop togon nda'nariyak yagan? At agalo inikime unggunuk, ambinom ngget nda'nariyak op me yinuk, yagan ya?”

⁵Yoge mbareegi, at Yetut nen, “Aap ambit-ambi niyo paga inom, Aberiniki paga inom, ngget ndaka'lek kenok, Ala abu'me piige menggim unggwi nagin mondok lek o, yinuk, abet aret yokkigi o.

⁶It aakumi nen ndaganakwi ti, it mendek aret o. Ndi, Aberiniki nen ndaganake nogo ti, at mendek aret o.

⁷Togop me, Ngget nda'nariyak agaarak, wone yokkigi yi nogo, Ie! yinuk, kagabiti mbarugun o.

⁸O wiya iniki nen aret warit nage kagak, oonebu ari mban karuk konengge kwe, alom ngga nen warit wage, nggeeme warit nage, nogo ti, kat keenggo'lek ugun kobak menggendak nogo ndak-ndak, it aakumi Aberiniki nen ndaganake nogo ti, ti pogom aret o.”

⁹Yoge mbareegi, at Nikoremut nen, “Ti yagandak ti, nonggop eeriyak me nduk yagan o?”

¹⁰Yoge mbareegi, at Yetut nen, “Kat aakumi Iterali mendek mamunirage menggendak aret kwe, an wone yokkege yi, liippega'lek agandik?

¹¹Nineenu kenok mban yokkirogwe, ninigen kogoorak nogo paganogo yokkirogwe, eekwi kwe, paganogo yokkirogwe nogo kit wagangga'lek aret ogotik o, yinuk, mondok abet aret yokkiragi o.

¹²An nggween paga wone yokkirage nogo kit abet mbaka'lek me, mbogut paga wone yokkirage neenok, nonggop togon abet mbarumunggup mbakop?

¹³Aap alik ambi abu lek o. An aap aret nda'nagagirak nogo nalik mban mbogut paga nen wambi wagagirak me, ti'nuk, niyokan mbogut paga lagi nagin o.

¹⁴ At Muta o karume logonet, waalo ogut wakkagak eerogo mippereegerak nogo kokwak, an aap aret nda'nagagirak nogo, it aakumi iniki noba panggombunuk, abet nombakwi iinok, mondok-mondok ineenik logowak nduk, an togop aret mippanugun o.

¹⁶At Ala nen yi aap ndi aap abok inabuwa nggwok lombok mbareegerak me, at aput ambolom ndarak an aret nappani wogoragagerak. Togop me, it aakumi iniki noba panggombunuk, abet nombakwi iinok, lek eerogo piyaagin lek ineenik mondok-mondok aret logogun o.

¹⁷Ala nen at aput an nogo it aakumi abok inowak loonogo maluk onggo inoba piyaakit nduk, o nggween paga yime nappani woroolik. Ata, it aakumi abok inagap ndarikit nduk aret nappani wagagerak.

¹⁸It aakumi iniki an noba panggombunuk, abet nombakwi iinok, Ala nen inowak loonogo maluk onggo inoba piyaagin lek kwe, it iniki an noba panggombunuk, abet nombaka'lek iinok perak, it iniki Ala aput ambolom ndarak an nogo noba panggombunuk, abet nombaka'lek me, muk inowak loonogo maluk onggo inoba piigerak wonogo agaarik o.

¹⁹Ala nen inowak loonogo maluk onggo inoba piyoorak alom nogo yi aret. At eya eeginake menggerak nogo o nggween paga yime muk wambi wagagerak kwe, it aakumi ti, maluk mban eeko menggaarak me, At eya nogo ti, nineebi o, mba'nuk, o apit mban inikilom mbako menggaarak.

²⁰Yi aap ndi aap maluk eeko menggaarak nogo nen it maluk eekwi pagak ari kero, At eya nogo ti, nineebi o, yinuk, owagam wogolik kwe,

²¹it aap Ala ndogop menggerak wone nogo, eeko menggaarak kenok perak, Ala inom kunik logonet, eeko menggaarak pagak yuwak nduk, at eya nogo owagam wogo menggaarak o,” yinuk, yoragagerak.

²²Ti yorage nagagerik, ti'nuk, Yetut at oone waganggwi mendek inom o Yureya unggwi nogo nogogwaarik, time inom logonet, aakumi niyome wuppiigo nogogwaarak.

²³ Wuppiigwi iigak, at Yaya nogo keele maarogo mambiigo menggam awo mambega'lek me, at Yaya kunduk, o Talin koorok kagak, o Ayinom niyo ambik wonage me time aakumi at owagam wogwe iinok, niyome wuppiige nagagerak.

²⁵Niyome wuppiigwi wonogwe me, aap Yaya oone waganggwi inom, aap Yakuri mendek ambi inom, nen yi mendek ndi mendek kooriyak wone yugu nogo paga alelo wareegwaarak.

²⁶Alelo wappunuk, Yaya owagam wogo nogogwaarik, at yogo logonet, “Ngguru wae. At kimbirak yi Yoraran enebaga logonet, abok paganogo yoragagindak nogo, niyome wuppiige me, aakumi apit at ka nogo agaarik o.”

²⁷Yogo mbareegwa, at Yaya nen, “Wologwe! Aap ambit-ambi mbogut paga nen eeppega'lek kagak, alik nen iniki koombunuk eerit noorak op mbakop? Meek o.

²⁸ Ala nen leenogo mippereegerak nogo ti, an lek o. At eebe peebi woroorak nduk, an we luulu naa'nduk nappani wagagerak o, yinuk, paganogo yokkiragagirak nogo, kit aret konenggo nogogutak.

²⁹Kwe ambi aap nen wagangge kenok, kwe ti, aap waganeegerak nogo akwe aret o. At kwe kolage ore nogo ti, we inom logonet, aap kwe kolage nogo oone konengge kenok, ale'nggen ambik kage nogo pogom ti, an aret o, At eerit nage paga aakumi ambik at ka nogwe iinok, an niniki ale'nggen ambik ee'nake o.

³⁰At tiyak ari kagak, an tebek yuurak agaarak o,” yinuk, yoragagerak.

³¹Ti yorage nagagerik, ambinom yorage logonet, “It aakumi abok aret tebenak iigak, at agi nen wagagerak nogo mondok tiyanak wonage o. It nggween paga nen ndarak ti, nggween paga mendek me, nggween paga mendek wone mban yogo menggaarak. It aakumi abok aret tebenak iigak, at mbogut paga nen wagagerak nogo, mondok tiyanak aret wonage o.

³²At enegen kagagerak inom, aruk koneneegerak inom, paganogo yorage kagak kwe, at paganogo yorage nogo aakumi abu waganggulik aret wonogwe o.

³³At paganogo yorage nogo, it aakumi nen waganggwi paga Ala abet aret ari menggerak tena'me pogo menggaarak.

³⁴At Ala nen nappi wagagerak ti, Ala wone mban ari menggerak. Ala nen at Aberiniki wogoge logonet, ambi eeriyak kenok, abok endak mban eeke logowak nduk, wogoreegerak.

³⁵ Ogoba nen aput iniki kunik menggerak me, yi eekak ndi eekak apit aret at eeke logowak nduk, unde eeppereegerak.

³⁶It aakumi iniki Ala aput oba panggombunuk, abet mbakwi iinok, mondok-mondok ineenik aret logogun kwe, it ando Ala aput oone konembunuk, eeka'lek iinok perak, ineenik logogun lek o. Ala anini inoba aret logogin o,” yinuk, yoragagerak.