Read Western Dani Yaya 4 Bible Online

Yaya 4 - Western Dani bible

Yaya 4

¹Yetut nen at apuri ambik agago piinok, yiime wuppiige, ndi, Yaya perak, at apuri mbereeret negen agago piinok, yiime wuppiige, eekwi nogo, it aap Pariti mendek inaruk koneneegwaarak. (

²Ti koneneegwaarak nogo ti, at Yetut nen aakumi yiime wuppiige logolik kwe, at oone waganggwi nen mban yiime wuppiigwi iigak, yogwe nogo inaruk koneneegwaarak.)

³Inaruk koneneegwaarak at Yetut eenu age nagagerik, at o Yureya teppunuk, o Nggalileya aret nagagerak.

⁴Nage logonet, tu alik paga noolik. Tu o Tamariya paga aret noorak age mbareegi,

⁵ nage logonet, aap Yakup nen at aput Yutup nggween wogoreegim koorok kagak, o Tamariya kota ambi endage Tikat aret panggo yi nagagerak.

⁶Niyo tookak yuurak nduk, aap Yakup nggween kabuneegim o time aret wonagagerak me, at Yetut nage logonet, o liingge oonegen 12 negen age kagak, owak lek age mbareegi, niyo tooko menggam taati aret kwi'nari nagagerak.

⁷Time wonage me, at Yetut oone waganggwi mendek nogo mbi onggo kunuwok nduk,

⁸o kota nogome unggwi nogwe iigak, at alik aret wonage me, kwe Tamariya mendek ambi niyo tookkolaakit nduk, wagagerak. Wage mbareegi, Yetut nen at yoge logonet, “Kwe yi wae. Niyo naakit nduk, too'niriyak op ilik?”

⁹ Yoge mbareegi, kwe Tamariya mendek nen at yoge logonet, “A puk! Kat aap Yakuri mendek, ndi, an kwe Tamariya mendek me, niyo nonggop togon tookkiriyak nduk yo'negen o?” yinuk, yoreegerak. (Ti yoreegerak nogo ti, aakumi Yakuri mendek inom, aakumi Tamariya mendek inom, yiiwak ambit paga nunggulik me nduk, yoreegerak.)

¹⁰Yoge mbareegi, at Yetut nen at yoge logonet, “Ala nen onggo lek we wokkiriyak inom, ndi, aap nen, Niyo too'niru o, yokkege nogo eebe inom, kat keenu logonet, Niyo aakumi ineenik eeginake menggerak mendek wo'niru o, nggino yo'nenetak en, niyo ti mendek aret wokkenetak o.”

¹¹Yoge mbareegi, kwe nogo nen, “Nogoba o. Niyo yenggenak ogu teberogon wonage, ndi, kat kagiiwak lek me, niyo aakumi ineenik eeginake menggerak mendek ti, ngga nen too'niriyak nduk yagan o?

¹²Niyo tookkolagak, yuurak nduk ninogoba Yakup nggween kabunogo pinaneegerak yi, at inom, at apuri inom, at aanggumi inom, nonggo nogogwaarak kwe, at meek, ndi, kat iya me nduk yagan ya?”

¹³Yoge mbareegi, at Yetut nen, “It aakumi niyo yi mendek nunggwi iinok, abu eeginabigin kwe,

¹⁴niyo an nen wogoraminggirak nunggwi iinok perak, abu eeginabigin mondok lek o. Niyo an nen wogoraminggirak nogo, eneeri inikime nen kila-kila wungge logonet, mondok-mondok ineenik eeginake logogin o.”

¹⁵Yoge mbareegi, kwe nogo nen, “Ai, nogoba o. Niyo ti mendek wo'niru ubi! Wo'nege keenok, an niyo abu ee'nake, ndi, yime tookkola wage, eekak yigin lek aret o.”

¹⁶Yoge mbareegi, Yetut nen at yoge logonet, “Kore yori nage logomenggendik, kimbirak wa'nu o.”

¹⁷Yoge mbareegi, at kwe nogo nen, “An nore lek o.” Yoge mbareegi, at Yetut nen, “Nore lek yagandak ti, abet aret yagan o.

¹⁸Kat kogonggelomini 5 wogonabeegindak nogo o. Ndi, yogondak aap kimbirak wonage nogo ti, kat kore lek me, yagandak ti abet aret yagan o.”

¹⁹Yoge mbareegi, kwe nogo nen, “Ai, nogoba! Ala nen yorage kagak yoraga mendek kat aret keegi o.

²⁰ Ninombomini puurom yi paga Ala alut eeko nogogwaarak kwe, kit Yakuri mendek nen, O Yerutalem mban Ala alut eeko logorak, yogo monggotak nogo o.”

²¹ Yoge mbareegi, at Yetut nen, “Kwe yi wae! Puut yi paga inom, o Yerutalem inom, ninogoba alut eeriyak lek eyom panggoni woraagin, abet aret mbake logot o.

²² Kit alut eeko monggotak eebe kineenggo'lek logonet, alut eeko monggotak kwe, at ninagap ndaka nit aap Yakuri ninenggela'me nen mi'narigin me, nit alut eekwi nogo perak, nineenu logonet, alut eeko monggoorak o.

²³It aakumi nen ninogoba abet aret alut eekwi ti, at Aberiniki, Ala ndogop menggerak, yo'nirage nogo nen yorage kagak alut eeko logorak eyom peebi kwe, yogondak muk wagaarak o. At ninogoba Ala nen, It aakumi togop aret nalut ee'nako logowak, mbake menggerak o.

²⁴Ala ti, aakumi inigen kogolik mendek me, it aap at alut eeriyak mbakwi nogo iniki paga nen abet mba'nuk, at alut eeko logowak o.”

²⁵Yoge mbareegi, at kwe nogo nen, “At Mesias endage Keritut yogo monggoorak nogo woraagin an neenu aret o. At wage logomenggerik, yi wone ndi wone apit aret mbininogo yo'nirage logogin o.”

²⁶Yoge mbareegi, at Yetut nen, “At nogo kat nimbirak wone mbanggwi an aret o,” yinuk, yoreegerak.

²⁷Yoge wonage me, Yetut oone waganggwi nogo wogogwaarak. Wogo nogogwaarik, at Yetut kwe imbirak wone mbanggwi kogo nogogwaarik, “Wi!” yereegwaarak kwe, “Kat kwe yi nonggop mba'nuk wagan?” yogwi, Ndi, “Kwe yi, kimbirak nonggop nduk wone mbangge agandik o?” yinuk, Yetut nogo yogwi, eeka'lek aret wonogogwaarak.

²⁸Eeka'lek wonogwe iigak, kwe nogo nen agiiwak mbo punuk, ame o kota nogome nage nagagerik, aakumi yoranet nage logonet,

²⁹“An yi eekak ndi eekak eeke nagagirak nogo abok paganogo yo'negerak aap nogo pekka nawok nduk wa'nip o. Ala nen leenogo mippereegerak nogo ti aret ilik?”

³⁰Yorage mbareegi, iname o kota nen wunggo nogogwaarik, Yetut owagam wogogwaarak.

³¹Awo wogwe iigak, at Yetut oone waganggwi nen Yetut yogo logonet, “Ngguru wae! Mbi yi namen o.”

³²Yorit unggwogogwaarak mendek at Yetut nen, “An nambi ti, kit kineenggo'lek mendek nengge agarik o.”

³³Yorage mbareegi, at oone waganggwi it mban-mban wone mbanggo logonet, “At noorak mbi ambi wogori wagaarak ilik?”

³⁴Yogo mbareegwa, Yetut nen, “At nappani wagagerak nen eeriyak mbake menggerak nogo eeke, ndi, at eeriyak mbake menggerak nogo an nen worok togon eeke, eeriyak ti, an nambi aret o.

³⁵Kit nen, Tut 4 penembunuk, anggen yugu kole age kenok, Mbanuwok o, yogo monggotak nogo lek a? Togop aret yogo monggotak kwe, an nen yogondak aret yabu yarak me kinigen pekkaabagip nduk, yokkirage agarik o. Eebe kole age logonet, agari abu yi'nip agaarak me, mbaniyak aret agaarak o.

³⁶Aap ambi awi yake, ambi anggen mbangge, eekwi nogo imbirak ambugwi aret iniki ale'nggen mbaruwak nduk, at anggen mbangge nogo onggo kolage menggerak aret o. At onggo kolage ti, it aakumi mondok-mondok ineenik logowak nduk anggen mbanak kwak kuwak eerogo piige nogo aret o.

³⁷Aap ambi awi yake, ndi, ambi anggen yugu mbangge, eeko menggaarak o, yinuk, yogo menggaarak wone nogo ti abet aret o.

³⁸An nen kit yabu yareegu'nom anggen yugu yi'nip agaarak mbanubagip nduk nappinagulik o. Ata, aap inambik yareegwam time aret nappinagagirak me, it eereegwaarak paga kit anggen yugu mbanggo ogotik o,” yinuk, yoragagerak.

³⁹Ndi, at kwe nogo, “An yi eekak ndi eekak eeke nagagirak abok aret aap ti nen nabok paganogo yo'negerak o,” yinuk, yoranet nege paga aakumi Tamariya mendek ambik o kota time nen iniki Yetut oba panggombunuk, abet mbareegwaarak.

⁴⁰It iniki Yetut oba panggombunuk, abet mbareegwaarak me, aakumi Tamariya mendek nen Yetut owagam wogo nogogwaarik, “Ninom logowok o,” yinuk, yogo mbareegwa, at Yetut ne mbere paga inom aret wonagagerak.

⁴¹Inom logonet, wone yoragagerak paga aakumi ambik iniki at oba panggombunuk, abet mbareegwaarak.

⁴²Abet mbako nogogwaarik, it nen kwe nogo yogo logonet, “Yogondak kat yo'niragandak paga mban lek o. Ata, nit nen aret at oone ninaruk konenggo nogoorik, aakumi abok inagap ndaka abet aret nineenu ogoorak me, ti paga niniki at oba panggombunuk, abet mbako ogoorik o,” yinuk, yoreegwaarak.

⁴³ “It aap Ala nen yorage kagak yoraga nogo, inawi alom paga wone yorogwe iinok, tiyappiinok inoone waganggulik o,” yinuk, Yetut lombok nen yereegerak me, at ne mbere iluk inom wonagagerik, time nen o Nggalileya aret nagagerak.

⁴⁴

⁴⁵ It aap Nggalileya mendek o Yerutalem laago Obaga Mbo Nagagerak lakome wambi wogo nogogwaarik, nogome logonet, Yetut laago lakome eerit nage abok inigen kogogwaarak me, Yetut nogo o Nggalileya unggwi nage mbareegi, keyage warogo waganeegwaarak.

⁴⁶ Waganggo mbareegwa, at Yetut o Nggalileya kota Kana aa'nduk niyo aret kwe, anggur amburu eereegim nogome aret nagagerak. Nagagerak wonage me, aap o unde ambi apuluk o Kaperenawum andi wonagagerak me,

⁴⁷aap nogo Yetut o Yureya nen o Nggalileya wagaarak konembunuk, Yetut owagam wambi wage nagagerik, at apuluk andi abu kambuurak lombok eereegerak me, Yetut nen obeelom eeri nawak nduk, yoreegerak.

⁴⁸Yoge mbareegi, Yetut nen at yoge logonet, “Eerubok mendek eeke, kineenu ariyak kinagabiti warak mendek eeke, eeke neyaamunggup lek kenok, kiniki noba panggombunuk, abet nombarumunggup lek kiigi o.”

⁴⁹Yorage mbareegi, at aap o unde nogo nen, “Ai, nogoba o! Napuluk awo kangga'lek kagak aret mbet-mbet nawi o.”

⁵⁰Yoge mbareegi, Yetut nen at yoge logonet, “Kapuluk eenik arigin me, kame nak o.” Yoge mbareegi, aap nogo nen Yetut wone yoreegerak nogo abet mbake nagagerik, aret nagagerak.

⁵¹Awo tu paga nage me, at ayeloman mini yoruwok nduk wogo mbareegwa, inom lambumbunuk, “Kapuluk nogo muk eenik agaarak o,” yinuk, yoreegwaarak.

⁵²Yogo mbareegwa, at nen, “Oonegen ngga ari nage kagak, eenik agaarak o?” Yorage mbareegi, it nen, “Kobit liingge oonegen 1 paga aret inikime kani pereegerak nogo lek agaarak o.”

⁵³Yogo mbareegwa, wulaga ogoba nogo nen, “Kobit liingge at Yetut nen, Kapuluk eenik arigin o, yo'negerak nogo ndak-ndak liingge aret eenik agaarak kagi,” yinuk, abeke nagagerik, at inom, at apuri inom, abok aret iniki Yetut oba panggombunuk, abet mbareegwaarak.

⁵⁴At Yetut o Yureya nen o Nggalileya nage nagagerik, nogome logonet, aakumi ineenu ariyak inagabiti warak mendek aa'nduk ambi eereegerak me ambokan eereegerak ti aret o.