Read Western Dani Yaya 5 Bible Online

Yaya 5 - Western Dani bible

Yaya 5

¹Ti'nuk, peebi it Yakuri mendek laago lakwi me, Yetut o Yerutalem wambi wagagerak.

²O Yerutalem tu endage Ndomba Wogoret Unggwogo Menggam taati niyo ambi yenggenak wonagagerak. Niyo yenggenak ti, Iberani wone paga Mbetetera, yogo nogogwaarak. Niyo yenggenak nogo aa'nggi paga yengget-wangget o 5 wurik me tigitogon awe aago mban wonagagerak.

³Aakumi ambik kugi andi wonogogwaarak nogo ti, inigen mbuk inom, inendop maluk inom, ineenggi-iniyok nggilik-nggelok aago inom, time mban yindak-wi'ndak aago wonogogwaarak. (

⁴Ne ambi paga Ala yonggo nappiya wage menggerak malayikat ambi nen niyo Mbetetera yenggenak nogome wambi woraanuk, niyo abolok eeke kenok, aap andi ambi aa'nduk niyome unggwage kenok, at andi nogo lek aret age nagagerak.)

⁵Togop eeko nogogwaarak me, aap ambi andi kagak tahun 38 eereegerak nogo inom time aret windak wonagagerak.

⁶Aap nogo, o maan togon togop aret windak wonagagerak Yetut yelok kage nagagerik, at yoge logonet, “Wulaga wae! Kat obeelom eekkaburak mbakendak ilik, lek a?”

⁷Yoge mbareegi, aap andi warak nogo nen, “Ai, nogoba! Yi abolok eeke kenok, an wo'neren yiime wuppani noorak noreewi ambi lek me, an awo wambi nage neegak, it ando mban peleppanegak wanggo menggaarak o, obak!”

⁸Yoge mbareegi, Yetut nen at yoge logonet, “Wulaga! Mi'na'nuk ndoonak nogo yege menggendak nogo ko'nok nak o.”

⁹Awo yoge kagak, aap nogo obeelom age nagagerik, ndoonak nogo yege nagagerak nogo ko'nok nagagerak. Ti eereegerak nogo ti, it Yakuri tamban eekwi paga aret eereegerak.

¹⁰ Tamban eekwi paga eereegerak me, it Yakuri mendek nen aap obeelom agagerak nogo yogwi, “Wulaga! O yogondak nit Yakuri tamban eekwi paga me, kat ndoonak nogo yege menggendak nogo wonok nage ti mage ubi!”

¹¹Yogo mbareegwa, at aap nogo nen, “Aap an obeelom ee'nakerak nogo nen, Ndoonak nogo yege menggendak ko'nok nak o, yo'negerak me tit yogwe ya?”

¹²Yorage mbareegi, it nen, “Ta nen, Ndoonak nogo yege menggendak ko'nok nak, yokkegerak?”

¹³Yogo mbareegwa, Yetut nogo aakumi ambik time kuwak aago inenggela'me nogome kobak agagerak me, aap obeelom eereegerak nogo nen, “Aap ndogop nen obeelom ee'nakerak o,” yinuk, paganogo yoroorak meek aret agagerak.

¹⁴Ti'nuk, peebi aap nogo Ala awi wurik me wonage Yetut enegen kage nagagerik, at yoge logonet, “Wulaga! Kat keebe obeelom aret agandak me, andi abunuk nggwok eekkake kero, maluk ambinom eerugun o,” yinuk, yoreegerak.

¹⁵Yoge mbareegi, aap nogo wundi nage nagagerik, “Lek o. Aap an obeelom ee'nakerak nogo ti, Yetut aret o,” yinuk, it Yakuri mendek paganogo yoragagerak.

¹⁶At Yetut nen it aap Yakuri tamban eekwi paga togop aret obeelom eeginabit nege nagagerak me, it Yakuri mendek nen Yetut inanini agaket eerogo pit nogo nogogwaarak.

¹⁷ Eerogo pit nogwe iigak, at Yetut nen it yorage logonet, “An nogoba o aa'nduk nen nok, o yogondak yi kuli paga eeke menggerak me, an kunduk, togop aret eeke minggirak o,” yoragagerak.

¹⁸At Yetut nen it Yakuri tamban eekwi paga eeriyak mage yugu kagak, eereegerak paga mban lek o. Ata, “Ala ti, an nogoba lombok aret o,” ari logonet, Ala imbirak ndak-ndak eekkolagagerak paga it aap Yakuri mendek nogo nen abunuk at wariyak nduk, eeko nogogwaarak.

¹⁹Eekwi me, at Yetut nen it yorage logonet, “Ala aput nalik niniki koombunuk nen eeriyak meek o. An nogoba eeke nenegen kenok mban eeke minggirak o. Nogoba nen yi mendek ndi mendek eeke nogo ti, aput an ndak-ndak aret eeke minggirak.

²⁰An nogoba ti, aput an iniki kunik ee'nake me, at yi mendek ndi mendek eeke menggerak abok aret aput an yo'nege menggerak. An eeke neegotak yi nogo ti, mbuuluk negen, ndi, peebi kit, Wi! yubagip nduk, abunuk nggwok, Eeru o, yo'nege kenok, eeke neyaamunggup o.

²¹ Nogoba nen aakumi kanggaatak ineenik agago mippiige menggi kwak, aput an niniki nen aap ambi eenik eeppuurak mbake kenok ti, eenik agago mippigin aret o.

²² Nogoba nen aakumi inowak loonogo maluk onggo eeppiigeelik o. Aakumi abok inowak loonogo maluk onggo eeppiyoorak unde ti, nogoba nen aput an aret mippaneegerak.

²³Aakumi nen Ala tiyappogo mengga kwak, aput an kunduk ndak-ndak tiyappanugo logowak nduk, mippaneegerak. It aap nen Ala aput an tiyappanugwi lek iinok ti, at nappani wagagerak an nogoba nogo tiyappugwi lek o, yinuk, mondok abet aret yokkiragi o.”

²⁴Yorage nagagerik, ambinom yorage logonet, “It aap an noone konembogo nagaatik, iniki at nappani wagagerak nogo oba panggombunuk, abet mbakwi nogo ti, mondok-mondok ineenik aret logogun o. Ndi, it aap ti, kanggo menggam nen ineenik eeginake menggim muk unggwi wogogwaarak me, Ala nen inowak loonogo maluk onggo eeppiyaagin lek o, yinuk, mondok abet aret yokkiragi.

²⁵It aap kanggo menggaarak mendek nen Ala aput an noone koneniyak eyom peebi kwe, yogondak muk panggoni wagaarak me, it aakumi nen an noone konenggwi iinok, mondok-mondok ineenik aret logogun o.

²⁶ An nogoba aakumi ineenik eeginake menggerak alom unde menggi kwak, aput an kunduk, togop aret ineenik eeginake logokit nduk, alom unde eeppaneegerak.

²⁷Aput an aap aret nda'nagagirak me, aakumi inowak loonogo maluk onggo eeppiyoorak nogoba nen awone kili'nereegerak o, yinuk, mondok abet aret yokkiragi o.

²⁸ Togop me, it aakumi kanggaatak piigo menggam wonogwe nogo abok aret an noone konembunuk, mi'nariyak eyom panggoni woraagin me, wone yokkiragarak yi, Wi! yinuk, pi warugup o. Ti eeri woroorak nogo ti, it obeelom eeko nogogwaarak nogo mondok-mondok ineenik logowak nduk, mippiige, ndi, it maluk eeko nogogwaarak nogo inowak loonogo maluk onggo eeppiyaakit nduk, mippiige, eerigin o,” yinuk, yoragagerak.

²⁹

³⁰Yetut nen ambinom yorage logonet, “An nalik niniki koombunuk nen ambi eeriyak meek o. Ata, Ala yo'nege konembunuk mban inowak loonogo maluk onggo eeppiige minggirak. An niniki mbake paga eekeelik o. At nappani wagagerak an nogoba iniki mbake nogo mban eeke minggirak me, an aakumi inowak loonogo maluk onggo eeppiige nogo ti, a'me liirogon aret eeppiige minggirak o.

³¹An nalik nen mban nabok paganogo yokkirage neenok ti, pilit wone aret ari nombariyak kwe,

³²at ambi alik nen an nabok paganogo yokkirage menggerak me, at nabok paganogo yokkirage nogo ti, abet aret yokkirage menggerak an neenu aret o.

³³ Kit yonggo Yaya owagam nappiyareegutak nogo, nogo mbareegwa, wone abet lombok paganogo yokkiragagerak.

³⁴An nabok it aakumi nen paganogo yokkiroorak an mbakeelik kwe, kit kinagap ndarikit nduk, wone yi yokkirage agarik o.

³⁵Aap Yaya ti, ndi wuninik abinak ambik eeke menggi kwak wonagagerak me, eya eekkinake kwak yokkirage nagagerak paga kiniki ale'nggen ne ambiriluk mbakotak kwe,

³⁶at Yaya nen an nabok paganogo yokkirage ti, meek negen. An abu worok togon eeke logokit nduk, nogoba nen yo'nereegerak eeke minggirak nogo paga nogoba nen nappani wagagerak nabok pagak ari nogo ti, mondok iya lombok aret o.

³⁷ An nogoba nappani wagagerak kunduk nabok paganogo yokkiragagerak kwe, kit at oone kinaruk konenggwi, ndi, at enete kunduk, kinigen kogwe, mondok eeka'lek aret ogotik o.

³⁸At nappani wagagerak an nogo, kiniki noba panggombunuk, abet nombaka'lek me, at oone ti, kinikime wonage abu lek aret o.

³⁹Ala wone liiru mbanak paga mondok nineenik ee'ninabigin, mba'nuk, liirogon malenggo monggotak. Ala wone liiru mbanak ti, an nabok paganak nogo liiru mbanak aret me,

⁴⁰kit kineenik eekkinabikit nduk, an nowagam woroorak op aret kwe, nineebi mbako monggotak nogo o.

⁴¹Aakumi nen an tiyappaniyak ti, mbakeelik o.

⁴²Kit perak, Ala kinom kiniki kunik eekulik ti, an abu neenu minggirak.

⁴³Nogoba nen nappani wagagerak an nogo, kit wo'naka'lek kwe, aap alik ambi at iniki mba'nuk wage kenok perak, aret waamunggup kiigi o.

⁴⁴Wologo wae! It kinoreewi nen tiyappinagagwi iinok ti, kinikilom mbako monggotak kwe, Ala alik mban menggerak nen tiyappinaniyak ao, mbakwi lek me, kit nonggop togon kiniki noba panggombunuk, abet nombarumunggup?

⁴⁵At nen ogoba enggaanom paga ninenggali warogo yo'niraagin, mbarugup o. At kinenggali wappinagarak ti, iniki lunik menggaarak aap Muta nogo aret o.

⁴⁶Kit kiniki Muta oba panggombunuk abet mba'netak en, at nen an nabok paganogo liiru mbaneegerak me, kiniki muk an noba panggombunuk, abet nomba'netak o.

⁴⁷ Aap Muta wone liiru mbaneegerak nogo kit abet mbakwi lek kenok, an noone yokkirage yi, nonggop togon abet mbarumunggup? Meek aret o.” yinuk, yoragagerak.