Read Western Dani Yaya 6 Bible Online

Yaya 6 - Western Dani bible

Yaya 6

¹Ti'nuk, peebi at Yetut yi yenggenak Nggalileya endage ambi Tiberiyat nogo, enebaga wunda nagagerak.

²Enebaga wunda nage kagak, it aakumi ambik at Yetut ineenu ariyak inagabiti warak mendek eeke logonet, kugi andi obeelom eeginabit nage inigen kogo nogogwaarak me, Yetut mugurok nogogwaarak.

³Mugurok nogwe iigak, at Yetut puurom lagi nage nagagerik, at oone waganggwi inom time aret kwi'nogogwaarak. (

⁴Ne ti eyom paga it Yakuri nen laago Obaga Mbo Nagagerak lariyak eyom panggoni wagagerak.)

⁵Yetut nogo kwi'na'nuk, enegen tiya yinuk, aakumi ambik at owagam kuwak ari wogwe iige nagagerik, Piliput yoge, “Piliput wae! Aakumi yi, mbi noorak nduk onggo nggeeme kuni nawi o?” yoreegerak.

⁶Ti yoreegerak nogo ti, at eeriyak eenu logonet kwe, Piliput abut mbanikit nduk, yoreegerak.

⁷Yoge mbareegi, at Piliput nen at yoge logonet, “It aap inalitak lombok mbuuluk-mbuuluk nawak nduk, wu 200 dinar paga mbi onggo mbani namonggoorak kwe, endak noorak meek mbaki o.”

⁸Yoge mbareegi, at oone waganggwi ambi Timon Peterut awot Andereyat nogo nen Yetut yoge logonet,

⁹ “Nogoba wae! Wulaga mbuuluk ambi roti 5, ndi, ikan mbuulogwe mbere, porogo wonage kwe, aakumi ambik me endak noorak meek mbaki o.”

¹⁰Yoge mbareegi, at Yetut nen, “Aakumi yi, kwi'naruwak nduk, yoraanip o,” yoragagerak nogo yorogo mbareegwa, time iri'ngga ambik wonage me, aap ineebe lima ribu iri'ngga paga kwi'narit nogogwaarak.

¹¹Kwi'narit nogo mbareegwa, at Yetut nen roti nogo waganogo, “Ala wa,” yinuk, it aap kwi'nogogwaarak nogo tumburiragagerak. Tumburirage nagagerik, ikan togop aret tumburirage logonet, inikime tenak kenok, ambinom wogoragagerak.

¹²Wogoragagerak nogo nonggo nogogwaarik, ndonggoppiige mbareegi, Yetut nen at oone waganggwi nogo yorage logonet, “Ando ndiinik ti, mbo pugwi iyo, ambime kuwak agago pi woraanip o.”

¹³Yorage mbareegi, it roti nonggo logonet, ando ndiinogo pereegwaarak nogo kuwak eerogo mbirim yum 12 eno korok togon yonggologo pereegwaarak.

¹⁴Yonggologo pogo mbareegwa, aakumi nen ineenu ariyak inagabiti warak mendek eereegerak ti, inigen kogo nogogwaarik at yogo logonet, “At Ala nen yoge kagak yoraga o nggween paga yime woroorak nogo, yi aret wagaarak kogo o.”

¹⁵Yinuk, yogo mbareegwa, Yetut nen, “It aakumi wogo logomenggaarik, inogoba nendagembogut logorak neebi mbake neegak mippanugun,” yelok iige nagagerik, alik puut paga time lagi nagagerak.

¹⁶Lagi nagagerak kagak, o kiip age mbareegi, Yetut oone waganggwi mendek yi yenggenak aa'nggi paga wambi wogo nogogwaarik,

¹⁷yiiro paga unggunuk, yi yenggenak yibaga o Kaperenawum wunda wogwe iigak, o kiip agagerak me, Yetut iya waga'lek awo kagak,

¹⁸o wiya omaawi ambik wake logonet, yi muninuk nagagerak.

¹⁹Yi muninuk nage kagak, it alelo mbanit wunda wogo logonet, 4 kilometer ilik, 5 kilometer a, agan wogwe me, at Yetut yi ogombaga iyok pit inowagam panggo yi wage inigen kogogwaarak. Kogo nogogwaarik, inagabiti ambik ogogwaarak.

²⁰Inagabiti ogo mbareegwa, Yetut nen it yorage logonet, “Noreewi o! An aret me, kinagabiti yugup o.”

²¹Yorage mbareegi, “Yiiro paga unggwi woraayok ubi,” mbakwi iigak, yi yenggenak aa'nggi yibaga it noorak mbareegwam nogome aret muk ari wogogwaarak kogogwaarak.

²²Ko'lu o weege mbareegi, it aakumi ambik yi yenggenak enebaga awo wonogwe nogo nen kii'me yiiro ambiret mban wonage, ndi, Yetut at oone waganggwi yiiro nogo paga inom noolik inalik mban nogwe, eekwi iyareegwaarak me, yi aa'nggi paga taati aret awo wonogo logonet,

²³yiiro ando o Tiberiyat nen ninogoba Ala, “Wa,” yinuk, aakumi roti tumburiragagerak nonggo nogogwam nogome aret wunda wogwe iigo nogogwaarik,

²⁴Yetut inom, at oone waganggwi mendek inom, ineebe lek iinok, yiiro nogo paga unggunuk, Yetut kwaarit o Kaperenawum wogogwaarak.

²⁵O Kaperenawum wunda woraanuk, Yetut yi yenggenak yi paga wonage me kwaakkogo nogogwaarik, at yogo logonet, “Ngguru wae! Kat yime mandenom wagandak?”

²⁶Yogo mbareegwa, at Yetut nen, “Kineenu ariyak kinagabiti warak mendek eeke neegotak paga kwaa'nabit woroolik. Ata, kit mbi ndonggorogon nonggotak nogo paga kwaa'nabit wogotak kiigi o, yinuk, abet aret yokkirage agarik o.

²⁷Mbi lek ariyak mendek nogo mban yabu eeko logogup o. Ata, aap aret nda'nagagirak an nogo nen mbi mondok-mondok logorak mendek wokkirage nogo koloorak yabu mban eeko logonip o. An ti mendek aret wokkirage logokit nduk, nogoba Ala nen ineenu agak eerogo paneegerak nogo o.”

²⁸Yorage mbareegi, it nen at yogwi, “Ala nen eeriyak mbake nogo eeruwok nduk, nit nonggop eeko logowi o?”

²⁹Yogo mbareegwa, at Yetut nen, “Ala nen eeriyak mbake nogo ti, at nappi wagagerak kiniki oba panggombunuk, abet ombakwi nogo aret o.”

³⁰Yorage mbareegi, it nen at yogo logonet, “Eeke ninigen keenok, niniki koba panggombunuk, abet kombaruwok nduk, nineenu ariyak ninagabiti warak mendek ambi nano eeke keyaawi? Ndi, kat eeke menggendak nogo ambi ngge eerumunggun o?

³¹ Mbi nawak nduk, mbogut paga nen wurira wagagerak o, yinuk, liiru mbanak nogo ndak-ndak, nit ninombomini karume wonogwe me, mbi mbogut paga nen wurira wage mbareegi, nonggo nogogwaarak nogo o.”

³²Yogo mbareegwa, Yetut nen it yorage logonet, “Muta nen mbi wokkiragagerak nogo ti, mbi mbogut paga mendek wokkirage logolik. Ata, an nogoba nen aret mbi abe mbi mbogut paga mendek aret wokkirage menggerak.

³³Mbi Ala nen wokkirage nogo ti, mbogut paga nen wambi wage nagagerik, aakumi nggween paga menggaarak ineenik eeginake menggerak nogo mendek aret o, yinuk, mondok abet aret yokkiragi o.”

³⁴Yorage mbareegi, it nen, “Ai, ninogoba. Mbi ti mendek mondok wo'nirage logot o.”

³⁵Yogo mbareegwa, Yetut nen, “Mbi ineenik eeginake minggirak an aret o. Kit ambi nen an nowagam wogwe kiinok, abu eekkinabigin mondok lek o. Ndi, kit kiniki an noba panggombunuk, abet nombakwi kiinok, yi abu eekkinabigin mondok lek mban.

³⁶Kit an neego nogootak aret kwe, kiniki noba panggombunuk, abet nombaka'lek aret ogotik o, yinuk, yokkiragarak nogo o.

³⁷It an nogoba nen wo'nege nogo abok aret an neya woraagun o. Ndi, it aap an neya wogwe nogo ti, mbo piyaagin mondok lek o.

³⁸An niniki mba'nuk eeke logokit nduk, mbogut paga nen wambi woroolik. Ata, at nappani wagagerak eeriyak mbake nogo mban eerikit nduk wagagirak o.

³⁹Ndi, at nappani wagagerak eeriyak mbake nogo ti, it an wo'nege nogo ambit kobak ariyak lek, o age wobok paga it abok ineenik agago mippiyoorak mbake menggerak nogo aret o.

⁴⁰An nogoba nen eeriyak mbake nogo ti, Ala aput an kinigen liippaninuk, kiniki noba panggombunuk, abet nombakwi kiinok, mondok-mondok kineenik logorak mbake menggerak ti aret o. Ndi, peebi o age wobok paga an nen kineenik agago mippinagagin o,” yinuk, yoragagerak.

⁴¹At Yetut nen, “Mbi mbogut paga mendek wambi wagagirak an aret o,” yoragagerak nogo paga it aap Yakuri nogo nen ineebi-ineeba ombako logonet,

⁴²“A puk! Aap yi, Yutup aput endage Yetut agalo-ogoba nineenu nogo nen aret ari yi, lek a? An mbogut paga nen wambi wagagirak o, yo'nirage yi, nonggop yo'nirage mbakop?”

⁴³Yogo mbareegwa, at Yetut nen, “Kineebi-kineeba yogo logonet, laakot nombakwi ti mage o.

⁴⁴An nogoba nappani wagagerak nogo nen kiniki koongginake lek kenok, an neya woroorak mondok meek o. Ndi, neya woroorak kiniki koongginake kenok perak, o age wobok paga kineenik agago mippinagagin o.

⁴⁵ It aap Ala nen yorage kagak yoraga nen liiru mbanggo logonet, Ala nen yi aakumi ndi aakumi abok aret wone mamunirage logogin o, yinuk, liiru mbaneegwaarak me, an nogoba nen wone mamunirage nogo yi aap ndi aap inaruk konembunuk, waganggwi nogo ti, an neya wogo menggaarak aret o.

⁴⁶Wone yokkirage yi nogo ti, it aap nen ninogoba Ala eebe inigen kogogwaarak me nduk yokkirage lek o. Ata, an Ala wonage me nen wagagirak nalik mban nenegen kagagirak.

⁴⁷Kit kiniki noba panggombunuk, abet nombakwi kiinok ti, mondok-mondok kineenik aret logomunggup o, yinuk, abet aret yokkirage agarik o.

⁴⁸Mbi kineenik eekkinake minggirak ti, an aret o.

⁴⁹Kit kinombomini karume logonet, mbi Ala nen wogoragagerak nogo nonggo nogogwaarak kwe, kagak, kambit nogo nogogwaarak.

⁵⁰Mbi mbogut paga nen wambi wage yi nogo nunggwi kiinok perak, kambumunggup lek o.

⁵¹Mbi kineenik eekkinake minggirak mbogut paga nen wambi wagagirak an aret. Kit mbi yi nogo, nunggwi kiinok, mondok-mondok kineenik aret logomunggup o. Kit aakumi nggween paga monggotak kineenik eekkinabuwak nduk, mbi kinake pigin nogo ti, an neebe aret o,” yinuk, yoragagerak.

⁵²Ti yoragagerak paga it aap Yakuri mendek it mban-mban wone wako logonet, “Wologwe! Aap yi, at eebe nit nawak nduk nonggop togon wo'niroorak me yigi mbakop?”

⁵³Yogo mbareegwa, at Yetut nen it yorage logonet, “An aap aret nda'nagagirak neebe inom, namiya inom, nengga'lek kiinok, kineenik logomunggup mondok lek aret o, yinuk, mondok abet aret yokkirage agarik o.

⁵⁴Kit ambi nen an neebe inom, namiya inom, nunggwi kiinok ti, mondok-mondok kineenik aret logomunggup o. Ndi, o age yobok paga kineenik agago mippinagagin o.

⁵⁵An neebe nogo ti, mbi abe mbi aret o. Ndi, namiya nogo ti, amburu abe amburu aret o.

⁵⁶Kit ambi nen an neebe inom, namiya inom, nunggwi kiinok ti, an nen kit ninom kunik, ndi, kit nen an ninom kunik aret logogun o.

⁵⁷At eenik menggerak nogoba nogo nen nappani wage nagagerik, at eeppanege paga an neenik minggirak nogo kokwak, kit ambi nen an neebe nunggwi kiinok ti, an nen eekkinake paga kineenik aret logomunggup o.

⁵⁸Mbi mbogut paga nen wambi wagagirak yi, Ala nen kinombomini wogoragagerak nonggo nogogwaarik, kambit nogo nogogwaarak nogo pogom lek o. Ata, mbi yi, kit ambi nunggwi kiinok, mondok-mondok kineenik aret logomunggup o,” yinuk, yoragagerak.

⁵⁹Wone yoragagerak nogo ti, o Kaperenawum it Yakuri tamban eeko menggam logonet, yoragagerak.

⁶⁰Yoragagerak it at oone waganggwi mendek ando ambik konenggo nogogwaarik, “Wone yi aaninggin ambik me, ta nen koneniyak mbakop?” yogogwaarak.

⁶¹At Yetut wone ti yoragagerak paga ineebi-ineeba ombakwi yelok iige nagagerik, it yorage logonet, “Wone yokkiragarak nogo paga, Nineebi o, yinuk, mbo paniyak eekkinake ya?

⁶²An aap aret nda'nagagirak wonagagim niyok paga lagangge kinigen neego logomonggotik, kit nonggop nombarumunggup.

⁶³At Aberiniki nen aakumi ineenik eeginake menggerak aret. It aakumi nggween paga ndarak nen ambi eekkoloorak lek aret o. At Aberiniki nen wone an yokkirage nogo paga kineenik eekkinake menggerak kwe,

⁶⁴kit ando perak, kiniki noba panggombunuk, abet nombaka'lek kiigi o,” yinuk, yoragagerak. (Yoragagerak nogo ti, it aap iniki at oba panggombunuk, abet mbaka'lek inom, ndi, at onggo mbanigin nogo inom, aa'nduk nen Yetut eenu me, togop aret yoragagerak.)

⁶⁵Yorage nagagerik, ambinom yorage logonet, “An nogoba nen kiniki koongginaka'lek kenok, an neya woroorak mondok meek o, yinuk, yokkiragarak nogo alom ti kenok aret yokkiragarak o,” yoragagerak.

⁶⁶Wone ti yoragagerak paga it at oone waganggwi mendek ando ambik Yetut inom ambinom nugu logolik mbo punuk mbaganeegwaarak.

⁶⁷Mbaganggo mbareegwa, Yetut nen at oone waganggwi 12 nogo yorage logonet, “Kit kunduk mbaganiyak mbaka'lek ogotik?”

⁶⁸ Yorage mbareegi at Peterut nen, “Ai, nogoba! Nit ta ka noorak me nduk yagan o? Mondok-mondok nineenik ee'ninaburak wone kat aret yo'nirage menggendak nogo o.

⁶⁹Nit niniki koba panggombunuk, abet kombako nogoorik, at ambi kikak nakeelik abu obeelom mban menggerak Ala nen nappi wagagerak nogo, kat aret keegoorak o.”

⁷⁰Yoge mbareegi, at Yetut nen, “An nen kit aap 12 miikkinabeegirak nogo lek a? Aap 12 miikkinabeegirak kwe, kit kinenggela'me ambi Ibilit aput aret kagi o,” yinuk, yoragagerak. (

⁷¹Ti yoragagerak nogo ti, aap Timon Ikariyot aput Yurat it aap at oone waganggwi 12 ambi nogo aret kwe, peebi Yetut onggo mbanigin at aret me nduk yoragagerak.)