Read Western Dani Nappiigak 17 Bible Online

Nappiigak 17 - Western Dani bible

Nappiigak 17

¹ Nogo nogogwaarik, o Ambipolit unggwogwe, Apoloniya unggwage, eerit o Tetalonika unggwi nogogwaarak. Unggwi nogo nogogwaarik, it Yakuri tamban eeko menggam time wonage me,

²at Pawulut it Yakuri tamban eekwi paga inom eeke nagagerak me, tamban kenagan paga it kuwak eeko menggam nogome inom eeke logonet, at nen Ala wone liiru mbanak paga wone alom lombok amburu mbanogo yorage nagagerak.

³Yorage logonet, “At Ala nen leenogo mippereegerak Keritut nogo, andi yagan wappunuk, kambunuk nogo menggam nen eenik a'nuk mi'nariyak koonak wonagagerak me, mi'nagagerak o,” yinuk, amburu mbanogo liirogon yorage nagagerik, “Yetut eereegerak yokkirage yi, Ala nen leenogo mippereegerak nogo, at aret o,” yinuk, yoragagerak.

⁴Yoragagerak nogo, it ando nen abet mbako nogogwaarik, it inom, it Yunani mendek Ala inagabiti mbako nogogwaarak ando ambik inom, kumi nggaganin ineebe ambik inom, Pawulut Tilat imbirak inom eeko logowok nduk iya wogogwaarak.

⁵Iya wogo mbareegwa, it aap Yakuri nen, “Nit yogwe nogo aakumi konenuwak lak, it yogwe mban konenggwi yi, nineebi a!” yinuk, yogo logonet, it aap maluk eeko menggaarak ineenggi lebenak kunggo menggam wonogwe nogo mendek kuwak eeppiinok, it aakumi o kota time abok noone-koone yogo logowak nduk, inikime manabeegwaarak. Manako mbareegwa, it nen aakumi time wonogwe nogo inikime manabit nogo mbareegwa, aakumi ambik noone-koone agan, at Pawulut Tilat imbirak nggwok me inawone mbanuwok nduk, aap Yaton awi oonda mbaneegwaarak mendek,

⁶ it imbirak ineebe lek mbareegwa, at Yaton inom, ninoreewi ando inom, nigiren inoweewi o kota unde inowagam piya nogogwaarak. Piya nogo nogogwaarik, it yorogo logonet, “O yi awi ndi awi abok aret piyaginabit nugu menggaarak nogo, ineebe yime wagaarak me,

⁷at Yaton nen wogonakerak o. It aap ti, at Kayitat nen wone lengganggetak nogo taganogo pogo logonet, Ninowe endagembogut alik ambi wonage nogo ti, endage Yetut aret o, yinuk, yogo menggaarak o,” yoragagerak.

⁸Yoragagerak nogo it inoweewi o kota unde inom, aakumi kuwak ogogwaarak nogo inom, inaruk konembogo nogogwaarik, inanini nen noone-koone yogo nogogwaarak.

⁹Ndi, at Yaton oreewi inom nen keele maarak onggo pogo mbareegwa, piinogo teppiyareegwaarak.

¹⁰O kiip age mbareegi, it ninoreewi Ala apuri time nen Pawulut Tilat imbirak, “O Mbereya nanip o,” yorogo mbareegwa, oonikiya nogo nogogwaarik, it Yakuri tamban eeko menggam unggwi nogogwaarak.

¹¹It aakumi Tetalonika mendek ti, inogogumbuk kwe, it Mbereya mendek perak, iniki abu obeelom me, Ala wone yorogogwaarak nogo, iniki ale'nggen paga waganggo nogogwaarik, “At Pawulut nen wone yo'nirage yi, abet aret ilik?” yinuk, ko'lu-kii'me Ala wone liiru mbanak malenggo nogogwaarak.

¹²Malenggo logonet, it Yakuri mendek ambik abet mbareegwaarak. It Yunani mendek kumi nggaganin inom, aap inom, it kunduk, ambik aret abet mbareegwaarak.

¹³Abet mbako mbareegwa, it Yakuri o Tetalonika wonogwe nogo nen at Pawulut o Mbereya Ala wone yorage konenggo nogogwaarik, aakumi o Mbereya mendek wone munuurogo inikime manabi nogo mbareegwa,

¹⁴it ninoreewi Ala apuri o Mbereya wonogwe nogo nen Tilat Timotiyut imbirak time iigak, Pawulut yi kole yenggenak laut ambet paga a woraawak nduk nappi wogogwaarak.

¹⁵It aakumi Pawulut o Atena pi wogo mbareegwa, Pawulut nen, “Timotiyut Tilat imbirak mbet-mbet neya woraawak nduk, nappiya woranu o,” yinuk, wone agago nappiyareegerak.

¹⁶At Pawulut nogo it Timotiyut Tilat imbirak wogwe iyo, o Atena toginake logonet, o kota time kugiwak ererengge-mboongge aago ambik endekem-oome wonage kage nagagerik, inikime nen eebi lombok mbareegerak.

¹⁷Eebi mbake nagagerik, it Yakuri inom, it aakumi Yunani mendek Ala inagabiti mbako menggaarak inom, it Yakuri tamban eeko menggam time, “Wone yi abet aret kagi,” mbaruwak nduk, at koongge ari kenok, it koonggwi yuwak nduk yorage, ko'lu-kii'me mbi kunggo menggam time inom aabuk age nagaatik, wone yorage, eeke nagagerak.

¹⁸Eeke me, it aap yi wone ndi wone alom kibingga mendek Epikurot wone ari inom, Towa wone ari inom, agan nogo nogogwaarak nogo nen, Pawulut inom wone onggo-onggo yogo logonet, “Wone yogwe iigetak kambok agan nege menggerak yi, nonggop mba'nuk agan nege mbakop?” yogwe, ndi, at Pawulut nen wone obeelom wone Yetut eeke nagagerak wone inom, at eenik a'nuk mi'nagagerak wone inom, yorage kenok, it ando nen, “Lek o. Aakumi alik inagugi awone wonok wage nagaarik, ari kogo o,” yinuk, yogwe, eekwi me, yogo nogogwaarak.

¹⁹Yogo nogogwaarik, Pawulut wonok, o Areyopagut wone amburu mbanggo menggaarak inowagam pi nogo nogogwaarik, yogo logonet, “Kat wone alik ngget mendek mamunnirage ti, nit nineenu aruwok nduk yo'niret o.

²⁰Kat wone alik negen agan nege konenggoorak me, Wone eebe ti aret me yigi, mbaruwok nduk, yu o,” yoreegwaarak. (

²¹Ti yoreegwaarak nogo ti, inaworak Atena mendek inom, nggiru iya wogogwaarak inom wonogwe inom, it nogo nen wone alik ngget mendek nogo mban konenggwi, yogwe, eeko logonet, yi eekak ndi eekak eeka'lek aret wonogogwaarak me, yoreegwaarak.)

²²“Yu o,” yogo mbareegwa, Pawulut nogo nen o Areyopagut it wone amburu mbanggo menggaarak inenggela'me mi'na'nuk, yorage logonet, “Kit noreewi o Atena mendek yi wae. Kit kugiwak amili kumbunuk, kiniki ti paga mban panggombunuk mugurok nogwe kiigi o.

²³O kota yime kit kugi eerit nogo monggo'nom nenegen kanet nage logonet, kugi eeko monggo'nom ambi, Ninogoba Endage Nineenggo'lek Eeko Monggom o, yinuk, liiru mbanak pugunik nenegen kagarak. Kit kineenggo'lek logonet, ayuk wuppunuk alut eeko monggotak ti'nogo an nen yokkira o.”

²⁴ Yorage nagagerik, “At nggween inom, yi mendek ndi mendek nggween paga mendek abok inom, wakkagagerak Ala nogo ti, mbogutnggween unde at aret me, at kugiwak awi aap nen wureegwam nogome wonageelik o.

²⁵ At nen mban yi aakumi ndi aakumi ineenik eeginake, ambe aagi wogorage, yi mendek ndi mendek wogorage, eeke menggerak me, at amendek lek kenok, aakumi inamendek ambi at wogoriyak abu lek o.

²⁶At yi awi ndi awi abok o nenaarit nogo logowak nduk, kuli ogoorogo piinet nage, ti'nuk, nineyom-naneyom eerit nogo logowak nduk, koonogo pege, eeke nagagerik, yi aap ndi aap inanebunu lombok yi awi ndi awi wiganuwak nduk, alom aap ambit aret wakkagagerak.

²⁷ Wakkaga'lek logonet, koonogo pereegerak nogo ti, at eebe nda lek korok-korok ninom aret wonage kwe, kwaarit nogo logomonggoorik, Nogo eebe yi aret kagi, yinuk, yelok kaawak nduk eereegerak o.

²⁸ Ndi, aap kit mendek ambi ndawi pege logonet, Nit kunduk at paga wiganak aret o, yinuk, yereegerak nogo ndak-ndak, nineenik wonogwe inom, yi eekak ndi eekak eekwi inom, o nggween paga nugwi inom, ti, at panggok mban logonet eeko monggoorak me, eereegerak o.

²⁹ Ti kenok, nit Ala paga wiganak aret wonogwe me, at eebe alom ti, aakumi iniki koonogo punuk mbuti emas paga, mbuti perak paga, yugum paga, kugiwak negen ogobakkigirik ti kwak mbarugup o.

³⁰O maan nen nineenggo'lek logonet eekwi niigak, Ala nen malenninaka'lek aret wonagagerak kwe, yogondak perak, nit yi aakumi ndi aakumi abok aret ninomaluk mondok mbo puwak nduk yo'nirage agaarik o.

³¹At ambi leenogo mippereegerak nen aakumi abok eekwi ndak-ndak owak looninaburak ne ambi koonogo pereegerak o. Ndi, ne ambi koonogo pereegerak nogo nit aakumi abok nineenu aruwok nduk, at nogo ti, kambunuk nogo menggam nen eenik agago mippereegerak o, yinuk, yokkirage agarik o,” yoragagerak.

³²At Pawulut nen kambunuk ineenik ariyak wone ari konembogo nogogwaarik, it ando nogo nen miyuk-meya eerogo pugwi iigak kwe, it ando nen perak, “Wone ti, ambinom ari keyaawi o,” yinuk, yogo mbareegwa,

³³at Pawulut nogo it wone amburu mbangga inenggela'me nen mbo piinok wundeegerak.

³⁴Wungge mbareegi, at o Areyopagut wone amburu mbangga mendek ambi Ndiyonitiyut inom, kwe endage Ndamarit inom, it ando inom, Pawulut inom lambunggo nogogwaarik, abet mbareegwaarak.