Read Western Dani Nappiigak 24 Bible Online

Nappiigak 24 - Western Dani bible

Nappiigak 24

¹Nogo 5 yippunuk, Ala unde inowe nggwok Ananiyat inom, it Yakuri inoweewi inom, wone amburu mbangga endage Terutulut inom, nogo nen inowe gubernur nogo owagam nogo nogogwaarik, “Pawulut ndogop eekerak o,” yinuk, wone yoreegwaarak.

²Yogo mbareegwa, at Pawulut woraawak nduk ayonggo pereegerak wage mbareegi, at Terutulut nen, “Pawulut eekerak nogo yi o,” yinuk, gubernur yoge logonet, “Ai! Pelikit ninogoba wa. Kat ninarum keegak niniki ugun tayenak ale'nggen paga wonogwe niigak, o ambik me ari nagagerak o. Kat wone obeelom koongge menggendak paga, o yime apit ninake obeelom eerogo pinaneegindak o.

³Yi awi ndi awi yi eekak ndi eekak mot-mot mban eeke keenok, Ninogobarogon, wa! yokkogo ogoorik.

⁴An wone nggorek agan nage neenok, anggon eekkake kero, kuwagaluk ari neegak, kiniki yanggonak paga karuk konengge logonok nduk, Yu, yo'niru o.”

⁵ Ari nagagerik, “Aap yi, aakumi ale-pale eeginabit nage logonet, it Yakuri yi awi ndi awi abok inikime manabit nege at aret kogoorak o. Aap Nataret mendek oone waganggo menggaarak inowe at aret o. Ndi, at Ala awi wurik me maluk eerogo pikit nduk eeke me pigaganggoorak o.

⁸At yogop eekerak, ndogop eekerak, yinuk, oba pogoorak nogo, abok aret, kat liirogon eegwa'me wagangge logomenggendik, Abet aret eekerak, mbarumunggun o.”

⁹Yoge mbareegi, it Yakuri kuwak ogogwaarak nogo nen kunduk, “At wone oba pegaarak ti, abet aret kogo o,” yinuk, yereegwaarak.

¹⁰Yogo mbareegwa, it inowe gubernur nogo eenggi titik paga, “Kat yu o,” yoge mbareegi, at Pawulut nogo yoge logonet, “Nit aakumi Yakuri mendek abok aret kat nen ninawone amburu mbangge keegak, tahun mande negen agaarak an neenu me, nagabiti lek logonet, an noba lenggenggaarak wone nogo paganogo yokkiri o.”

¹¹Yoge nagagerik, “An o Yerutalem tamban eerikit nduk nage nagarik, nogo 12 yigirak me, kat nen, Yi abet aret yo'nigi? mbarulik kenok, it aakumi kin wogiyoorak op aret o.

¹²An time logonet, Ala awi wurik me ninom wone wake, ndi, it Yakuri tamban eeko menggam inom, o kota Yerutalem inom, time aap kuwak aago noone-koone agan nogo logowak nduk inikime manake, eeke ambi neyoolik o.

¹³Ndi, yogondak wone an noba lenggenggwi ti kunduk, alom lek aret me, it yogwe kat abet mbarenok nduk yokkiriyak ti, lek aret kaamunggun o, nogoba.

¹⁴ Ala wone yugu liiru mbanak inom, aap Ala nen yorage kagak yorogo nogogwaarak liiru mbaneegwaarak wone nogo inom, abok aret abet mbake minggirak me, it nen, Aakumi ineenik logorak tu mugurok nogwe ti, wone alik aret o, yinuk, yogwe kwe, an wone ti ndak-ndak aret mugurok nage logonet, ninombomini inogoba Ala alut eeke minggirak, ti abet aret paganogo yokkege agarik o, nogoba.

¹⁵It maluk eeko menggaarak inom, obeelom eeko menggaarak inom, kambunuk nogo menggam nen Ala nen ineenik agago mippiyaagin, niniki lunik wonage ti, it kunduk iniki lunik wonogo agaarik.

¹⁶Togop me, Ala inom, aakumi inom, inenggaanom an ambi eeppiyaminggirak paga niniki penggenneegak eeke logokwak liippunuk eeke minggirak o.

¹⁷Ndi, tahun mande negen eeppunuk, an noreewi Yakuri mendek inabuwa nen we wogoroorak inom, Ala ake pugu inom, wonok, o Yerutalem wogora nagarak.

¹⁸ Wogora nage nagarik, Ala awi wurik me aakumi kuwak aago ninom wonage, naalop-kaalop eeke, eeka'lek, we ugun noba mbeenogo patinuk wonage neegak,

¹⁹it aap Yakuri Atiya mendek ando wagaarak ta wonogwe iigirak nogo nen an ambi eeke neegaarak kero, inoone noba paninuk, kenggaanom paga nenggali wappani woraawak lak, wagaabok eekaarak ao!

²⁰ Yi wone ndi wone yoragarak paga lek o. Ata, it apit inenggaanom paga, Nit kambunuk nineenik agago mi'nariyak ti, niniki lunik kenok, nawone amburu mbanuwok nduk wogwe kiigi o, yinuk, wone mbuuluk ti aret noone panggok togon yoragarak paga wo'neren wagaarak ti neenu kwe, ambinom eeke neegaarak kero, it nen mban paganogo yokkiruwak o,” yoreegerak.

²²Yoge mbareegi, at Pelikit nogo nen ineenik logorak tu mugurok noorak wone yogwe nogo, liirogon eenu wonage me, “Peebi it yigin unde apit aago inowe at Litiyat nogo wage kenok, awone an amburu mbanigin me, mbaganinip o.”

²³Yorage nagagerik, at yigin unde inowe nogo yoge logonet, “At Pawulut ti, keele maarak negen enaani porogo wonogwe me, oreewi nen ake wogori wogwe iinok ti, op aret, yoraamunggup o,” yinuk, yoreegerak.

²⁴Nogo mande negen yippunuk wonageme at Pelikit akweeluk Ndurutila kwe Yakuri mendek nogo imbirak wogogwaarak. Wogo nogogwaarik, Pawulut woraawak nduk ayonggo pege mbareegi, wage nagagerik, Keritut Yetut abet mbakwi wone ari inaruk koneneegwaarak.

²⁵Ndi, at Pawulut nen obeelom eeko logorak wone inom, iniki nen eeriyak eeginake kwe, tebenogo puurak wone inom, peebi nen owak looninaburak wone nogo inom, yorage mbareegi, at Pelikit nogo agabiti age nagagerik, “Abu yogoorak me, nak o. Ne ambi paga yuurak nanonggwan age kenok, woraanok nduk kayonggo pege neyaamunggun o,” yinuk, yoreegerak.

²⁶Ti yoreegerak ti, “Keele maarak nogo piinggoorak onggo wo'niruwak,” mba'nuk, iniki lunik logonet, Pawulut ayonggo pegetak wage kenok, imbirak wone mbanggak eeke nagagerak.

²⁷At Pelikit nen, “It Yakuri inikilom nombaruwak o,” yinuk, Pawulut keele maarak piinogo wumbega'lek kagak, tahun mbere eeppunuk, at obaane'me Perikiyut Petut mippereegwaarak.