Read Western Dani Nappiigak 28 Bible Online

Nappiigak 28 - Western Dani bible

Nappiigak 28

¹Yi aa'nggi paga obeelom aret wundi nogo nogogurik, “Nggween kup mbanak yi endage Malata aret kogo o,” yinuk, nineenu ogogurak.

²Nit wundi nogogurak wonogwe niigak, mayu wage logonet, tero ambik ninooreegerak me, it time mendek nen ninabuwa nggwok mbako nogogwaarik, kani kumbunuk, keyage warogo tero wora'ninabeegwaarak.

³Ndi, at Pawulut kani aretop anebeninuk wage nagagerik, kumbege me, kani eyak nen waalo aakumi inooka nggigik togon wungge logonet, eenggi eyak kunik wonage mbareegi,

⁴it aakumi time mendek nogo nen waalo eenggi eyak kunik wonage inigen kogo nogogwaarik, ambi yogak yogo logonet, “Aap yi, niyome nen obeelom wundi wagaarak kwe, waalo eyak wakerak yi paga aap inooke menggerak kin kogoorak me, eereegerak onggo wogoriyak eyom agaarak me, kambigin aret o,” yereegwaarak kwe,

⁵ waalo nogo eenggi yombak togon agago kani kunik me mambereegerak kani nengge kagak, andi yagan waka'lek obeelom aret wonagagerak.

⁶It nogo nen, “Eenggi piike logomenggerik, yi eyom aret ngginna'nuk, kangge kiraap,” mba'nuk, inigen wonogogwaarak mendek, kangga'lek mbareegi, “Aap yi, kugi aagaluk aret kogo o,” yinuk, yereegwaarak.

⁷Nggween kup mbanak unde inowe nggwok endage Pubiliyut nogo eyabu me nda lek koorok aret me, ka nogo mbareegu, keyage wappinanege nagagerik, iniki ale'nggen paga ninabugo lappunuk, ninom obeelom wonogwe niigak, nogo kenagan yereegurak.

⁸Nogo eyom paga at Pubiliyut ogoba nogo at ame logonet, inikime kani pege, aanubut eeke, eeke wonage me, at Pawulut nogo ka unggwage nagagerik, anobak eenggi pippunuk tamban eeke mbareegi, obeelom aret agagerak.

⁹Ti agagerak kenok, it aakumi nggween kup mbanak me andi wonogogwaarak nogo at owagam wogo mbareegwa, obeelom eeginabeegerak.

¹⁰Eeginake mbareegi, it aakumi nogo nen, “Obeelom ee'ninakerak o,” yinuk, inale'nggen nen, yi mendek ndi mendek wo'nira wagak eeko nogogwaarak, Ti'nuk, peebi nit yiiro paga nawok nduk eeko mbareegu, yi mendek ndi mendek lek kero, wonok wo'nira wogogwaarak.

¹¹Yiiro o Alekandiriya mendek inagugi kulu'mbere ambi endage Katot, ore endage Polukut inaro ogobak paga inogut eerogo pugu me, wage nagagerik, o tero nggu-nggu eeke kenok, nggween kup mbanak me time tokkage wonage me, nit nogo tut kenagan penembunuk, yiiro nogome aret unggunuk, nogo nogogurik,

¹²o Tirakuta ari nogo nogogurik, time nogo kenagan yereegurak.

¹³Nogo kenagan yippunuk, yiiro paga unggunuk, nogo nogogurik, o kota Eregiyum ari nogogurak. Nogo nogogurik, nogo ambi yippunuk, ko'lu o ame pa'nggwe nen wiya nabuninuk eeke kagak, o Putiyoli ari nogogurak.

¹⁴Ari nogo nogogurik, ninoreewi it Ala apuri time mendek ninom lambumbogo nogogurik, “Ninom logowok o,” yinuk, yo'nirogo mbareegwa, ninom nogo 7 yereegurak. Togop eerit o Oroma aret unggwi nogogurak.

¹⁵It ninoreewi Ala apuri time mendek nogo nit wogwe inaruk konembogo nogogwaarik, o nda kunggo menggam o Apiyut nen, mbi kunogo nonggo menggam endage Kenagan Wurik nen, wo'ninabi wogo mbareegwa, at Pawulut enegen iige nagagerik, “Nogoba Ala wa,” yinuk, iniki ale'nggen agagerak.

¹⁶O Oroma unggwogo mbareegu, aap eegin warak ambi arum logowak nduk mippereegerak nogo, at Pawulut imbirak inalik logowak nduk, o ambi unde eeppereegwaarak.

¹⁷Nogo kenagan yippunuk, at Pawulut nen it Yakuri inoweewi time mendek nogo inayonggo pereegerak kuwak ari wogo mbareegwa, yorage logonet, “Nowe-nawot o. An nowe-nawot inoone inom, ninombomini eeko nogogwaarak wandek eeko monggoorak inom, tagangge logolik aret kwe, o Yerutalem time nen neebe pigogo keele maa'nako nogogwaarik, it Oroma mendek nen nawone mbanuwak nduk, neebe wogorogogwaarak.

¹⁸An eekirak alom kwaako nogogwaarik, maluk eekwi iinok, inooko menggaarak nogo mendek noba lenggenak ambi lek kenok, piinogo paniyak nduk eereegwaarak kwe,

¹⁹ it Yakuri nogo nen, Piinogo teppuurak mage o, yinuk, nabenak mban yogo mbareegwa, Kayitat nen mban nawone mbanuwak o, yoragagirak. Ti yoragagirak nogo ti, It nowe-nawot nen maluk eeppanegaarak o, yinuk, yorikit nduk, yoroolik o. We, nawone amburu mbanuwak nduk, yoragagirak o.

²⁰Wone ti aret yokkiraakit nduk, wage nagarik, Woraawak o, yinuk, kinayonggo pigirak. Nit Iterali niniki lunik monggoorak nogo paga mbuti keele maa'nabeegwaarak wone yokkiraakit nduk kinayonggo pigirak o,” yinuk, yoragagerak.

²¹Yorage mbareegi, it nogo nen, “Kat eereegindak wone ambi Yureya nen liiru mbanogo nappi wagaarak koolik o. Ndi, nit ninoreewi time nen wogo nagaarik, wone ambi yo'nirogwe, Pawulut maluk ndogop eekerak o, yinuk, yo'nira wogwe, eerulik mban kwe,

²²kit wone yugu mugurok nogo monggotak ti paga aakumi yi awi ndi awi nen abok aret ineebi kinombako menggaarak nineenu me, kat kiniki nonggop mba'nuk ari menggendak nogo, ari keyaawok nduk wogo o,” yinuk, yoreegwaarak.

²³Ndi, “Ne ndi paga ambinom yo'niraawak o,” yinuk, koonogo pereegwaarak nogo eyom ari wage mbareegi, at Pawulut wonage me ineebe ambik aret kuwak ari wogo mbareegwa, Pawulut nogo o kuubondendok nen Ala abu'me piyoorak wone nogo amburu liirogon mbanogo yorage, ndi, Yetut eereegerak wone nogo liirogon ineenu aruwak nduk, Muta liiru mbaneegerak wone inom, it aap Ala yorage kagak yoraga nen yorogo nogogwaarak wone inom, mbininogo yorage, eeke tit kagak, o kiyoma aret agagerak.

²⁴Yoragagerak nogo it ando nen, “Abet aret yigi o,” mbakwi iigak kwe, it ando nen perak, abet mbaka'lek logonet,

²⁵wone piinggak-nonggokak yogo nogogwaarik, mbaganuwok nduk eekwi iigak, at Pawulut nen irip paga yoragagerak nogo yi aret.

²⁶ “It aakumi yi, inigen kogwe, inaruk konenggwi, Iniki liippatinuk yunggup-melak eekwi, Eekwi iinok, An nen obeelom eeginake neyo, Ninogogumbuk ogwe, ninaruk logu ogwe, Ninigen kubuk nogwe, Eeruwok o, Yinuk, miikkolagaarak me, Inaruk konenggak mban eeremenggaarak kwe, liippatugun lek o. Ndi, inigen kagak mban eeremenggaarak kwe, yelok kaagun lek o, Yinuk, yora nak o, yinuk, kit kinombomini konenuwak nduk, Aberiniki nen Yetaya yoge kagak yoragagerak nogo ti, abet aret yoreegerak o.

²⁸Togop me, at Ala ninagap ndariyak wone yi nogo ti, it endekem mendek konenuwak nduk yora nagun aret me, it perak, konenugun aret mbako logonip o,” yinuk, yoragagerak. (

²⁹Wone ti, yorage mbareegi, it Yakuri mendek nogo wone warit wundi nogogwaarak.)

³⁰Tahun mbere eeke kagak, o luulu logorak onggo pegak eeke me nogome wonage me, at owagam wogwe iinok, abok aret keyage wappiige nagaatik,

³¹Ala abu'me piyoorak wone yorage, ninogoba Yetut Keritut wone mamunirage, eeke logonet, “An ndogop eeppanugun,” mbaka'lek agabiti lek pagak togon mban yorage nagagerak.