Read Western Dani Nappiigak 8 Bible Online

Nappiigak 8 - Western Dani bible

Nappiigak 8

¹At Tawulut kunduk Tepanut wakwi ti op aret mbareegerak. At wareegwaarak ti eyom paga, it Ala apuri o Yerutalem kuwak eerit nogo nogogwaarak nogo, inooruwok nduk, iya lombok ale-pale eeginabit nogo mbareegwa, o Yureya Tamariya enaagan-ambokan time kole ma'narit nogogwaarak kwe, it nappiigak nogo perak, mbaganulik aret puk ogogwaarak.

²It aap Ala inagabiti mbaka nen Tepanut warak wonok, kanggwi iinok, piya nogo menggam pi nogo nogogwaarik, aleenggu maareegwaarak.

³ Aleenggu maakwi iigak kwe, at Tawulut nen perak, it Ala apuri kuwak eerit nogwe nogo kumi nen, aap nen, lek eerogo piinet nage logonet, o ambi me unggwage, niigogo wumbiige, ambi me unggwage, niigogo wumbiige, eerit wogoren keele maarogo mambiigo menggam nogome piya nage nagagerak.

⁴It Ala apuri kole ma'narit nogogwaarak nogo nen, yi awi ndi awi wone obeelom wone yoranet nugu nogogwaarak.

⁵Ndi, at Piliput o Tamariya kota ambi me nage nagagerik, Ala nen leenogo pereegerak Keritut abok it aakumi time mendek paganogo yoragagerak.

⁶Yorage me, aakumi ambik kuwak ogo nogogwaarik, Piliput nen yorage nogo inaruk konenggwi, ineenu ariyak inagabiti warak mendek eeke nogo inigen kogwe, eeko nogogwaarik, wone yoragagerak nogo iniki liippereegwaarak.

⁷It kugi ogole warak mendek inikime lik yegetak nogo, kwa kunik yogwe iigak nggiginogo wumbiige, ineenggi-iniyok nggilik-nggelok aago inom, inendop maluk inom, obeelom eeginake, eeke kenok,

⁸it o kota time mendek nogo iniki ale'nggen ambik mbareegwaarak.

⁹Ndi, o kota time aap ambi endage Timon, tili pagangga wonagagerak me, tile paganggetak a'me age kenok, it Tamariya mendek nogo nen, “Aap eeke yi, wi!” yinuk, pi wako nogogwaarak. “An mban iya,” yinuk, eekkolage kenok,

¹⁰it aakumi abok inendage warak, inendage lek nogo nen at eeke liippunuk yogo logonet, “At kugi Omaawi Ambik Menggerak yogo monggoorak nogo ti, aap yi aret me, wi!” yinuk, pi wako nogogwaarak.

¹¹O maan nen tili paganit nege kenok, pi wako nagaatik, at oone mban konenggo nogogwaarak kwe,

¹²at Piliput nogo nen Ala abu'me piyoorak wone obeelom wone nogo inom, Yetut Keritut eereegerak wone inom, yoragagerak iniki abet mbako mbareegwa, aap inom, kumi inom, yiime wuppiyareegerak.

¹³At Timon nogo kunduk, iniki abet mbareegerak kenok, yiime wuppege mbareegi, at Piliput imbirak nege logonet, Piliput nen ineenu ariyak inagabiti warak mendek eeke, eerubok mendek eeke, eerit nage enegen kage nagagerik, “Wi!” yinuk, pi wake nagagerak.

¹⁴Ndi, “It Tamariya mendek nen Ala wone abet mba'nuk, waganggaarak o,” yinuk, yogwe nogo it nappiigak o Yerutalem wonogwe nogo inaruk konembogo nogogwaarik, Peterut Yaya imbirak inowagam nappiyareegwaarak.

¹⁵Nappiyareegwaarak nogo nogogwaarik, it aakumi Tamariya mendek nogo Aberiniki waawak nduk, inake tamban eereegwaarak.

¹⁶It nogo inogoba Yetut endage paga yiime wuppiyareegerak kwe, Aberiniki awo inoba wuppiya waga'lek me,

¹⁷inanobak ineenggi tebembiirogo iigak Aberiniki wogoragagerak.

¹⁸It nappiigak nen aakumi inanobak ineenggi tebeninako mbareegwa, Aberiniki wogorage at Timon nogo iige nagagerik, onggo wu wogoroorak eeke logonet,

¹⁹“Inanobak neenggi tebembiinok, Aberiniki wogorage logokit nduk, an kit eekwi togop ndak-ndak eeke logokit nen kinawone ti, an ambi kili'ninip o,” yinuk, ngginooragagerak.

²⁰Ngginoorage mbareegi, Peterut nogo nen at yoge logonet, “Ala nen onggo lek we wo'nirage menggerak mendek kagak kawu paga onggo puurak nduk ari agandik ya? Kawu ti, ko'nok kani omoonu'me nage logot o.

²¹Ala nen kiniki abe koonak lek keegerak me, wone yi mendek ambi kat unde arumunggun mondok lek aret o.

²²Kat maluk eeriyak koonggendak ti, mbo punuk, kiniki mbakendak kogoba Ala nen lek eerogo pagawak nduk yoru o.

²³Komaluk koba luurik maarak aago wonage kagak, wam ambiki aleegwi negen koone andiigwi ari keegi o.”

²⁴Yinuk, mberege mbareegi, at Timon nen, “Ai! Kit yogotak nogo an ee'nake kero, kinogoba Ala yogo logonip o,” yoragagerak.

²⁵It Peterut Yaya imbirak nogo nen, “Yetut togop eeke kogoorak o,” yinuk, paganogo yorogwe, Ala wone yorogwe, eeko nogogwaarik, iname Yerutalem iniyok paga wogo logonet, o Tamariya yaga'lelo ambik nogome wone obeelom wone yoranet ya unggwagak eerit wogogwaarak.

²⁶Yoranet wogwe me, ninogoba Ala yonggo nappiya wage menggerak malayikat mendek ambi nen at Piliput nogo yoge logonet, “Tu o Yerutalem nen o Nggata nogo menggam o ame pa'nggwe tu mbuuluk paga time nak o,” yinuk, yoreegerak.

²⁷ Ti yoge mbareegi, nage me, aap nggwok ame arum waka ambi Etiyopiya mendek imbirak aabuk agagerak. Aap nogo it Etiyopiya mendek inoweegelo endagembogut kwe Kandake awuri ambi endage warak logonet, awu unde me, o Yerutalem tamban eeri wage nagagerik,

²⁸ti'nuk, ame iyok paga nage logonet, kuda anggweendo niikkenok nage kagak, at anggweendo paga kwi'na'nuk, Ala nen yoge kagak yoraga Yetaya nen liiru mbaneegerak nogo pekkanet nage me, imbirak aabuk agagerak.

²⁹Aabuk age mbareegi, Aberiniki nogo nen Piliput yoge logonet, “Nggweendo niikkenok nage ti, naberogon ka nak o.”

³⁰Yoge mbareegi, Piliput nogo nen at owagam puu'nuk ka nage nagagerik, Ala nen yoge kagak yoraga Yetaya nogo liiru mbaneegerak pekkage logonet ari aruk konembege nagagerik, “Nogoba wae. Kat mbuku mbanak pekkenet nage yi, liippege agandik a, lek a?”

³¹Yoge mbareegi, “Aakumi nen, Yogop-ndogop, yorogwe iinok mban liippogo menggaarak me, an nalik nonggop togon liippuurak. Lek aret me, yo'ninok nduk, kwi'nari lagi mok o,” yoreegerak.

³² Liiru mbanak maleneegerak nogo eebe yi aret o. “Ndomba aagaluk waruwak nduk, wonok nogwe iigak, puk menggi kwak, At oone lek kagak wonok nogwe, Ndi, ndomba iyagalo eeruwak mbanggwi iigak, Oone lek puk wonage menggi kwak, At oone lek puk aret wonage, Eereegerak o. Miyuk-meya eerogo pogo logonet, eekerak ndak-ndak eeppega'lek inoone yimbu-lambu eerogo wonok nogogwaarak. Ndi, at paga wiganak nogo, taani o? Lek aret me, at awone mbanulik aret o. It aakumi wonogo menggam o nggween paga yime enggaawak lek aret agagerak o,” yinuk, liiru mbanak nogo malengge me, kwi'nari laganeegerak.

³⁴Lagangge mbareegi, aap nogo nen Piliput yoge logonet, “Ala yoge kagak yoraga nen yereegerak yi, at nen eereegerak me ari a, aap alik nen eereegerak me ari a? Yu o,”

³⁵yinuk, yoge mbareegi, at Piliput nen, “Yokkirikit o,” yoge nagagerik, wone liiru mbanak ti paga at Yetut eereegerak wone obeelom wone nogo mbininogo yoreegerak.

³⁶Yorit imbirak tu paga nogo logonet, niyo ambi wage me ari nogo nogogwaarik, aap nogo nen, “Niyo yi ket o. An yiime wuppaniyak meek mbaken a?” (

³⁷Yoge mbareegi, Piliput nen, “Kat kiniki nggaruk togon Yetut abet mbakendak kenok, yiime wuppagarak op aret o.” Yoge mbareegi, at aap Etiyopiya mendek nogo nen, “Yetut Keritut ti, Ala aput abet aret mbake agaarik o,” yinuk, yoreegerak.)

³⁸Yoge nagagerik, kuda nogo puk aruwak nduk yoreegerak puk age mbareegi, imbirak yiime unggwogo nogogwaarik, Piliput nen aap nogo yiime wuppereegerak.

³⁹Wuppege nagagerik, wundi wogwe me, at Piliput nogo Aberiniki nen wonok nggarek ari mbareegi, aap nogo Piliput enegen kaga'lek logonet kwe, iniki ale'nggen mbarit ame nagagerak.

⁴⁰Ndi, at Piliput nogo o Atorot nogome kin ari wage nagagerik, yi awi ndi awi o kota lombok time obeelom wone yoranet o Kayitareya nagagerak.