Read Western Dani Nappiigak 9 Bible Online

Nappiigak 9 - Western Dani bible

Nappiigak 9

¹ Ti eeke kagak, at Tawulut nen it ninogoba Yetut oone waganggwi nogo inoorikit nduk anini wu agan nage mbareegi, at Ala unde inowe nggwok nogo owagam nage nagagerik,

²yoge logonet, “Nogoba wae. O kota Ndamitik it Yakuri tamban eeko menggam unde lombok nen inigen kaawak nduk, kat nen it kumi aap ineenik logorak at aru mugurok nogwe iyo, pigogo keele maageren Yerutalem woraakit nduk, liiru mbanniru o.”

³Yoreegerak nogo, wogoge mbareegi, nage nagagerik, o kota Ndamitik panggo yi nage mbareegi, nu'lek me mbogut paga nen o abinak pindanggage logonet, abinak ambik at oba kwindagala agago wuppi wagagerak.

⁴Wuppi wage mbareegi, at Tawulut nogo nggween paga enete wanduk ngginnagagerak kagak, oone ambi at yoge logonet, “Tawulut wae. Tawulut wae. Kat nonggop nduk keebi-keeba agago noorit nage menggendak o?” Yoge aruk konembege nagagerik,

⁵“Ai, nogoba, kat ta o?” Yoge mbareegi, “Lek o. Kat keebi-keeba agago noorit nage menggendak Yetut nogo, an aret o.

⁶An aret me, kat mi'nage logomenggendik, o kota time unggwi namenggendak wonage keegak kat eeriyak wone yokkugwi iyaamunggun o,” yinuk, yoreegerak.

⁷At oreewi inom nogogwaarak nogo nen aap eebe kaga'lek kwe, we oone ari mban konenggo nogogwaarik, inoone lek puk wonogo mbareegwa,

⁸at Tawulut nogo mi'nage nagagerik, enegen pagak yikit nduk eereegerak mendek, enegen ogut agagerak me, ineenggi piganok, wonok o kota Ndamitik pi nogogwaarak.

⁹Pi nogogwaarak nogome logonet, enegen ogut agagerak kagak, mbi inom, yi inom, nengga'lek we aret nogo mbere yereegerak.

¹⁰O kota Ndamitik time aap Yetut oone waganggwi mendek ambi endage Ananiyat nogo nen abinggaanggo kage kagak, at ninogoba Yetut nen, “Ananiyat wae.” Yoge mbareegi, Ananiyat nen, “Yo'niru o, nogoba.”

¹¹Yoge mbareegi, at ninogoba nogo nen at yoge logonet, “Mi'na'nuk, tu endage Mot-Mot yogo menggam aap Yurat ame time nak o. Aap ambi endage Tawulut awi Tarutut mendek nen tamban eeke me, kat Ananiyat nen aret at owagam unggwage nagandik, anobak keenggi tebembunuk, enegen ogut agaarak nogo obeelom eeke abinggaanggo paga kegerak me, time nage logomenggendik, Tawulut yime wonage ilik, lek a? yinuk, yora nak o.”

¹²

¹³Yoge mbareegi, at Ananiyat nogo nen, “Nogoba o. At aap nogo, kapuri alik leenak o Yerutalem menggaarak maluk eeginabit nege yogwe nogo an muk konenggirak o.

¹⁴Ndi, yogondak it kendage paga tamban eeko menggaarak mendek abok aret, Wogonabi na o, yinuk, Ala unde inoweewi yorage mbaki, E o, yogaarak me, wagaarak o.”

¹⁵Yoreegerak kwe, ninogoba nen at Ananiyat yoge logonet, “Aap ti, it endekem konenggulik mendek inom, it inoweewi inendagembogut inom, Iterali abok aret inom, an eeke minggirak ineenu agago yorage logowak nduk nayeloman leenogo pigirak me, yori nak mban.

¹⁶Ndi, at Tawulut nogo, an naana'le mbangge me, aaninggin-paaninggin eeppogo logorak nogo an nen yoge logogin o,” yinuk, abinggaanggo paga yoge kagagerak.

¹⁷Yoge kage nagagerik, o time nagagerak. Nage nagagerik, aap nogo ame unggwage nagagerik, eenggi Tawulut anobak tebembunuk, yoge logonet, “Nore Tawulut wae. Kat kenegen obeelom age, Aberiniki kinikime mondok lik yi unggwage, eeke kaanok nduk, kat tu paga yime wage me, at ninogoba Yetut nikkeegerak nogo nen, nappani waga o,” yoreegerak.

¹⁸Awo yoge kagak, enegen ogut agagerak lenggenak nogo panggok togon wangge logonet, enegen pagak yereegerak. Enegen pagak ari nagagerik, mi'nage mbareegi, yiime wuppereegerak.

¹⁹Yiime wuppege mbareegi, mbi nengge nagagerik, omaawi agagerak. It Yetut oone waganggwi mendek o Ndamitik wonogwe nogo ne mande negen inom wonagagerik,

²⁰ti'nuk, “Yetut ti, Ala aput aret o,” yinuk, it aap Yakuri tamban eeko menggam lombok wone nogo yoranet nege nagagerak.

²¹Yoragagerak inaruk koneneegwaarak abok aret nen, “Wi,” yinuk, pi wako logonet, “Wologwe! O Yerutalem it Yetut endage paga tamban eeko menggaarak kero, inoorit nage nagaarak ti, yogondak o yime it togoti mendek kero, keele maageren Ala unde inoweewi inowagam piya naakit nduk wagaarak nogo nen agan nage yi lek a?” yinuk, yogo nogogwaarak.

²²Togop aret yogo nogogwaarak kwe, at Tawulut nogo nen wone yorage logonet, “Yetut ti, Ala nen leenogo pereegerak aret o,” yinuk, abet mbaruwak nduk, “Ndogop eeke nagagerak o,” yinuk, agan nage nogo mban wiganinuk nage logonet, it Yakuri mendek o Ndamitik wonogogwaarak nogo inoone nonggop yuubok eerogo piyareegerak.

²³ Ti'nuk, peebi it Yakuri mendek nen, “Tawulut waruwok o,” yinuk, koonogo pereegwaarak.

²⁴Koonogo pereegwaarak nogo at Tawulut aruk konembunuk, wonage kagak, ne ambi paga waruwok nduk, o kota unggwit wogo menggam oonikiya nen, liingge nen, enaarak wonogwe iigak,

²⁵at Tawulut oone waganggwi mendek nen oonikiya aret, muun yarak me yonggologo punuk, keele pugunogo pak obagambo endekem wumbereegwaarak.

²⁶Wumbogo mbareegwa, o Yerutalem wage nagagerik, it Yetut oone waganggwi nogo inom lambunikit nduk eeke mbareegi, it nogo nen, “At yi, Yetut oone waganggwi mendek lek kwa?” yinuk, inagabiti nen, “Omok,” yorulik puk ogogwaarak.

²⁷Puk ogo mbareegwa, at Mbaranabat nen perak, wonok it nappiigak nogo inowagam nage nagagerik, at Tawulut tu paga nage logonet, ninogoba Yetut enegen kagagerak wone inom, at ninogoba nen yoreegerak wone inom, ndi, o Ndamitik time agabiti lek logonet, Yetut endage paga tamban eeppunuk yorage nagagerak wone inom, mbininogo yoragagerak.

²⁸Yorage mbareegi, inom aret lambunik logonet, o Yerutalem ugun nage-wage eeke logonet, at mondok agabiti lek, “Ninogoba Yetut togop eeke nagagerak o,” yinuk, wone nogo paganogo yoranet nage nagagerak.

²⁹Yoranet nage logonet, it aap Yakuri mendek kwe, Yunani inoone yogo menggaarak nogo inom wone onggo-onggo yogwe iinok, it nogo nen at wariyak eereegwaarak.

³⁰“Waruwok o,” yogwe nogo, it ninoreewi Ala apuri konembogo nogogwaarik, eebe wonok, Kayitareya nanuk, time nen o Tarutut nappereegwaarak.

³¹Nappogo nogogwaarik, nogome logonet, it Ala apuri o Yureya kuwak eerit nogwe inom, o Nggalileya kuwak eerit nogwe inom, o Tamariya kuwak eerit nogwe inom, ale-pale eeginabit naga'lek iinok, inikiigun logonet, iniki kole ogwe, Aberiniki nen yeenggwaarage kagak inogoba Ala inagabiti mbako logonet, ineebe ambik wigannogwe, eereegwaarak.

³²Wigannogwe iigak, at Peterut nogo yi awi ndi awi time pegiinet nege logonet, Ala apuri leenak o Lira wonogwe nogo iya nagagerak.

³³Iya nage nagagerik, time logonet, aap ambi endage Eneyat eenggi-iyok nggilik-nggelok aago windak kagak, tahun 8 eereegerak wonage me, enegen kagagerak.

³⁴Kage nagagerik, Peterut nen at yoge logonet, “Eneyat wae. Yetut Keritut nen obeelom eekkakerak me, mi'nage logomenggendik, ndoonak windak menggendak yunggunggolet o,” yinuk, awo yoge kagak, mi'nagagerak.

³⁵ At mi'nagagerak nogo, it o Lira mendek inom, o Taron mendek inom, abok aret inigen kogo nogogwaarik, it eeko nogogwaarak nogo mbo punuk, ninogoba Yetut oone waganeegwaarak.

³⁶ Ndi, kwe Yetut oone waganeegerak ambi endage Tabita o Yope wonagagerak. (Kwe endage ti, Yunani inoone paga, Ndorakat.) At kwe nogo aakumi obeelom eeppiinet nage, ineenggilek iinok yeenggwaarage, eeke nagagerak.

³⁷Eeke wonage me, eebe kugi andi age nagagerik, kambeegerak. Kangge mbareegi, abin koorogo tilaabaga ko ogoorak ambime logonogo pereegwaarak.

³⁸O Lira nen Yope koorok aret me, “Peterut wagaarak o Lira wonage,” yinuk, yogwe nogo it Yetut oone waganeegwaarak nogo konembogo nogogwaarik, at nogo mbet-mbet woraawak nduk, wologwe mbere yonggo nappiyareegwaarak.

³⁹Nappiyareegwaarak yori nogo mbareegwa, at Peterut inom aret wogo nogogwaarik, wonok tilaabaga ko ogoorak logonak me nogome lagi nogo mbareegwa, it kumi togwe nogo nen, “Kwe yi, eenik logonet, aken yum inom, endekem yum inom, yege nagaarak eyate yi ket o,” yinuk, nikkogo logonet, le yereegwaarak.

⁴⁰ Le yogwe me, Peterut nen, “Kit abok aret wundi nanip o,” yorage nagagerik, endobanggun yindumbunuk, tamban eereegerak. Tamban eeppunuk, at kambeegerak nogo ena logurogon pekkage nagagerik, “Tabita wae. Mi'naru o,” yoge mbareegi, enegen kubunik nogo pagak yinuk, Peterut enegen kage nagagerik, windak nogo mi'nagagerak.

⁴¹Mi'nage mbareegi, at Peterut nogo nen eenggi pigogo mippege nagagerik, it kumi togwe nogo inom, it abet mbareegwaarak nogo inom, “Wa'nip o,” yoragagerak wogo mbareegwa, “Eenik agaarak yi, kaanip o,” yoragagerak.

⁴²At Peterut kwe eenik agago mippereegerak wone o Yope time abok aret wigak ari mbareegi, aakumi ambik iniki ninogoba Yetut oba panggombunuk abet mbareegwaarak.

⁴³Ndi, at Peterut nogo, o Yope time aap tapi agabolo mbelanak ogobakkigika endage Timon imbirak logonet, nogo ambik yereegerak.