Read Western Dani Oroma 1 Bible Online

Oroma 1 - Western Dani bible

Oroma 1

¹OROMA At Ala nen an Pawulut Keritut Yetut ayeloman nogo, nappiigak mendek logokit nduk, yonggo panege, at oone obeelom wone yoranet nege logokit nduk, leenogo panege, eereegerak me, an wone ambi yokkira o.

²Obeelom wone ti, eebe o maan Ala nen, “Peebi obeelom wone konenggo logogun o,” yinuk, it aap Ala wone yoraga nogo, yorage kagak, yorogo nogogwaarak nogo ti, Ala yereegerak liiru mbanak alik leenak nogo, mbanggo logonet, wone obeelom wone ti, inom aret liiru mbanggo nogogwaarak.

³Wone obeelom wone ti, Ala aput ninowe Yetut Keritut eereegerak wone nogo aret. At eebe ti, Ndawut ombooluk aakumi aret nda'nagagerak kwe,

⁴Ala nen kambunuk nogo menggam nen eenik agago mippereegerak paga, at maluk eeka'lek iniki mondok abe alik leenak Ala aput ayuk warak aret menggerak nogo kin agagerak.

⁵Ninowe Yetut Keritut eereegerak paga, Ala iniki kunik en eeppanege kagak, it yi aakumi ndi aakumi abok aret iniki abet mba'nuk obeelom wone liirogon woppunuk, eeko logowak nduk yoranet nage, Yetut Keritut endage nggwok aruwak nduk, tiyappit nage, eeke logokit nduk, an neyabu nappiigak mendek agago paneegerak.

⁶Kit Oroma mendek togon at Yetut Keritut apuri arubagip nduk, miirogo pinagareegerak o.

⁷Kit Oroma mendek abok aret at Ala nen iniki kunik eekkinake, at apuri alik leenak logobagip nduk, miirogo pinagage, eereegerak ti, Ninogoba Ala ninowe Yetut Keritut imbirak iniki kunik en eeppinagagwi, kiniki ugun tayenak obeelom logobagip nduk, eeppinagagwi, eeko logogun o.

⁸Aa'nduk yokkiroorak mbakirak nogo yi aret. Kit abok kiniki abet mbakotak nogo, kinabok yi awi ndi awi wiganinuk nage kenok, Yetut Keritut eereegerak paga, “Nogoba Ala wa,” yoge agarik o.

⁹An tamban eeke logonet, kinoba mari ageelik kulinik-kalinik kinake tamban eeke minggirak ti, Ala eenu aret o. Niniki-neebe apit nggaruk togon Ala wogo'nuk mugurok nage logonet, obeelom wone at aput eereegerak wone nogo yoranet nage minggirak.

¹⁰An pekkiya woroorak mbake minggirak me, Ala nen, “Yogondak aret pegiya nawak,” nomba'nuk, tu koonogo panuwak nduk, tamban mban eeke agarik o.

¹¹Kiniki kole aruwak nduk, Ala nen an eeppanegerak ambi kit yokkiraakit nduk pekkiya woroorak uugwe lombok mbake minggirak o.

¹²Ndi, wage logominggirik, ninom time logonet, kit inom, an inom, abet mbakoorak nogo, niniki eyak wat-wat yogo logowok nduk, pekkiya woroorak mbakirak o.

¹³ It endekem konenggulik ando yi awi ndi awi time yoranet nagagirak waganeegwa kwak, kit togop aret waganggwi kiyaakit nduk, yokkira woroorak koongge nagagirak kwe, “Ambi oba yilinik wonage aret kogo o,” mbarubagip nduk, yokkiragi o, noreewi.

¹⁴It aap Yunani mendek inom, Yunani mendek lek inom, ndi, it yi eekwi ndi eekwi ineenu inom, ineenggo'lek inom, abok aret wone obeelom wone yoranet nege logorak noba paneegerak nomat mbanak wonage me, teenogo yoranet nege logogin aret o.

¹⁵Togop me, kit o Oroma mendek kunduk, an nen wone obeelom wone nogo wonok, mbet-mbet yokkira woroorak uugwe lombok mbake agarik o.

¹⁶ Obeelom wone ti, aa'nduk it Yakuri mendek inom, ti'nuk, peebi Yunani mendek inom, aakumi abok aret abet mbakwi iinok, inagap ndake logorak Ala omaawi ti aret me, wone obeelom wone ti, an nagabiti lek logonet yokkirage agarik o.

¹⁷ “Aap ambi abet mbake kenok, Ala nen obeelom agago pemenggerak me, eenik aret logogin o,” yinuk, yereegerak liiru mbanak nogo ndak-ndak, Ala nen nonggop togon aakumi iniki koonogo obeelom eeginake menggerak nogo, wone obeelom wone ti paga aret nineenu age menggerak. Ala nen aakumi obeelom eeginake nogo ti, abet mbakwi ti paga mban aret o.

¹⁸It aakumi maluk eeka nen Ala wone ineebi mba'nuk, maluk mban eerit nogo logonet, Ala ndogop menggerak wone aakumi waganggwi iyo nduk, non mbambiigo menggaarak me, Ala agi mbogut paga nen anini wuppi wagaatak kin age paga nineenu age menggerak.

¹⁹At Ala nen, “An ndogop minggirak yelok neyaawak o,” yinuk, eebe kin eeppege menggerak kwe, liippega'lek iinok, Ala anini inoba piige menggerak.

²⁰Ala eebe nonggoti menggerak ti, maan o yi wakkagagerak kuli paga nen, yi mendek ndi mendek wakkagagerak nogo paga, at eebe omaawi ambik mondok itok menggerak Ala aret kin koorak wonagagerak kwe, it aakumi nen liippega'lek wonogogwaarak me, inaana'le mbanggolaawok nduk, wone onggo yuurak lek aret o.

²¹ It Ala ineenu aret logonet kwe, “Ti at Ala aret o,” yinuk, wogoppugwi, “Ala nogoba wa,” yinuk, keyage wakwi, eeka'lek logonet, iniki lek negen we ugun aret koonit nugwi me, iniki o apit negen kobak aago wonogo agaarik o.

²²It nogo nen, “Nit abok nineenu aret o,” yinuk, yikko'net nugu nogogwaarak kwe, ineenggo'lek wi negen a'nuk, agan nugu logonet,

²³ at Ala eenik itok mondok menggerak wogoppogo logorak nogo mbo punuk, obaane'me kanggo menggaarak mendek aakumi inom, towe-pagi inom, weret-mbonon inom, inogut ndak-ndak ogobakkigirogo punuk, wogoppogo nogogwaarak.

²⁴Togop eeko nogogwaarak paga, iniki nen uugwe mba'nuk, abu maluk eekulik mendek kagak eerit nugu logonet, it-it aret maluk eekko'net nogo logowak nduk, Ala nen mbo piyareegerak.

²⁵Ala eebe abet aret wonage wone nogo, mbo punuk, pilit aret, “Ala ndogop wonage o,” yinuk, mugurok nogo logonet, at abet aret mondok-mondok wogoppogo logorak ogobakkigika nogo ti, mbo punuk, obaane'me yi mendek ndi mendek ogobakkigirik nogo mendek mban ayuk wukwi, inik-inik eekwi, eeko nogogwaarak ti abet aret me, yokkiragi o.

²⁶Togop eeko nogogwaarak kenok, it nogo mbo piyareegerak logonet, it inakuwi nogo nen aap eeginaburak nogo mbo punuk, eekulik mendek eekwi,

²⁷nogo ti ndak-ndak inogonggelomini nogo nen kumi eeginaburak nogo mbo punuk, aganggen eeginake kenok, eekulik mendek eeko logonet, aap-aap aret wut-wut yogwe, eeko nogogwaarak. Eeriyak kagak alik mendek eeko nogogwaarak paga at Ala nen onggo ndak-ndak maluk aret eeppiyareegerak.

²⁸Ndi, it nen, “Ala ti abet aret wonage, yuurak kwe, ambi eeppinaniyak lek me,” mbako nogogwaarak paga, iniki lek negen a'nuk, eeriyak lek mendek kagak, eeko logowak nduk, Ala nen pulunogo mbo piyareegerak.

²⁹ Pulunogo mbo piyareegerak me, yi maluk ndi maluk alitik-alitak lombok ambik aret eeko nogogwaarak. Eeko logonet, maluk mban eerit nugwi, uugwe-uugwe mbakwi, inogogumbuk logonet agan nugwi, neebi-keebi yogwe, aap wakwi, yawi pugwi, inambokan laganggwi, inanini agaket yogwe, togot-togot wone yogwe,

³⁰nabok-kabok yogwe, “Ala abu nineebi o,” yogwe, worokot-laakot agan nugu logonet, “Aap nggwok eekkola,” yinuk, wogoppatit nugwi, maluk eeriyak iniki mondok aberak wonogwe, inagalomini-inogobamini inoone taganggwi,

³¹iniki lek logonet, wone yoragaatak liirogon eeka'lek mbo pugwi, inabuwa mbakulik inogogumbuk wonogwe,

³² ti eerit nugu menggaarak nogo ti, Ala nen, “Yogop eerugup, ndogop eerugup,” yereegerak nogo mendek eekwi iinok, “Mondok inoorigin o,” yereegerak nogo ineenu logonet kwe, kagak eerit nugu menggaarak. Eerit nugu logonet, “Nit mban eeriyak lek o. Ata, it ando ninom aret eeruwok o,” yinuk, eerit nugwi me, Ala nen mondok inoorigin o.