Read Western Dani Oroma 10 Bible Online

Oroma 10 - Western Dani bible

Oroma 10

¹Noreewi o. “Ala nen nowe-nawot Iterali mendek inagap ndaruwak lak, ao!” mbake logonet, inake tamban mban eeke minggirak.

²It nen Ala wone iniki aganggen kerek togon mugurok nogo logonet, eekwi kwe, wone eebe liippunuk eeka'lek iinok, yokkirage agarik o.

³Ala nen aakumi obeelom agago piige menggerak wone liippega'lek logonet, “Nit ninalik nen obeelom eekkolaawok,” mba'nuk, Ala obeelom agago piyoorak wone nogo, “Waawi o,” yinuk, wagangga'lek aret wonogogwaarak.

⁴At Ala nen Muta yoreegerak wone nogo at Keritut nen a'me lik togon agago pereegerak me, nit aakumi abok niniki Keritut oba panggombunuk abet mbakwi niinok, obeelom agago pinanege menggerak.

⁵ Ala nen, “Yogop ee'nu, ndogop ee'nu,” yereegerak wone nogo liirogon eerit nugwi paga obeelom eekkoloorak mbakwi kenok, at Muta nen liiru mbangge logonet, “Eeko logorak wone liiru mbanak ndak-ndak eerit nugwi ti paga nen ineenik aret logogun o,” yinuk, liiru mbaneegerak kwe,

⁶ Abet mbakwi paga obeelom eerogo pinaniyak wone nogo ti, Ala nen, “Kiniki koonggo logonet, Keritut wonok wambi woraawak nduk, ta nen mbogut paga lagi nage, ndi, Keritut wonok lagi woraawak nduk, ta nen aakumi kanggo menggam wambi nage, eerigin o?” yinuk, liiru mbaneegerak o.

⁸Ti yereegerak nogo ti, ngge nduk yereegerak mbakop? Lek o. Yereegerak eebe nogo yi aret. “Wone nogo ti, kiniki me inom, kinambe paga inom, koorok aret wonage o,” yinuk, yereegerak liiru mbanak nogo ti, abet mbakwi wone nit yokkirogwe nogo aret nduk, yereegerak o.

⁹“At Ala nen kambunuk nogo menggam nen Yetut abet aret eenik agago mippereegerak o,” yinuk, mbako logonet, “Yetut ti, ninowe aret o,” yinuk, aakumi inenggaanom paga paganggwi kiinok, Ala nen kinagap ndarigin o.

¹⁰Niniki abet mbakwi paga Ala nen, “Aap yi, oba lek me, obeelom aret kagi,” yinuk, yo'nirage, ndi, “Yetut ti, ninowe aret o,” yinuk, aakumi inenggaanom paganggwi paga Ala nen ninagap ndake, eeke menggerak.

¹¹ “Aap ambi iniki at oba panggombege kenok, enggali arigin lek o,” yinuk, yereegerak liiru mbanak nogo ti,

¹²it aakumi endekem konenggulik mendek alik, ndi, it Yakuri mendek alik, ti lek o. Ineebe ndak-ndak aret me, “Ala ti, nit abok ninogoba aret o,” yinuk, liiru mbaneegerak kogo o. Nit abok nen, “Ala wae,” yogwi niinok, at amendek kalo logonogo wo'nirage menggerak.

¹³ “Aap ambi nen, Nogoba wae, yinuk, an nendage kunogo yo'neremenggerak kenok, agap ndarigin o,” yinuk, liiru mbaneegerak nogo paga, Ala nit abok ninogoba aret me, “Nogoba wae,” yogwi niinok, ninagap ndarigin o.

¹⁴ “It aakumi obeelom wone yoranet nugu menggaarak ti, mondok obeelom aret o,” yinuk, liiru mbaneegerak kwe, nappiigwi lek kenok, wone obeelom wone nonggop togon yora noorak mbakop? Ndi, obeelom wone yora nogwe lek kenok, it aakumi nonggop togon konenggwi, ndi, konengga'lek kenok, nonggop togon Keritut abet mbakwi, ndi, abet mbaka'lek kenok ti, “Nogoba wae,” ti nonggop togon yogwi, eeko logorak mbakop? Abu meek aret o.

¹⁶ Togop kwe, at Yetaya nen ari logonet, Nogoba o. “Wone nit agan wogoorak nogo taani nen abet mbakwi o,” yinuk, yereegerak nogo ndak-ndak, it aakumi Iterali abok wone obeelom wone yorogwe nogo wagangga'lek aret agaarik o.

¹⁷Ti kenok, Keritut ninake eereegerak wone ti, yoragaatak paga konenggwi, ndi, konembunuk, abet mbako logonet, waganggwi, eeko menggaarak o.

¹⁸ Togop kwe, it abok obeelom wone awo konengga'lek aret wonogogwaarak kenok, yokkirage mbako ogotik? Lek o. “It inoone nogo o nggween paga yime abok aret wiganinuk, nage, Iname yoragaatak nogo, o irip-irip ndak wa'narit nage, Eereegerak o,” yinuk, liiru mbanak ti paga it abok koneneegwaarak aret kenok yokkiragi o.

¹⁹ Ndi, ambi yokkira o. It aakumi Iterali mendek obeelom eeppiyoorak wone kobak wonogogwaarak kenok, yokkirage mbako ogotik? Ti lek mban. At Muta nen ari logonet, “It aakumi inendage lek alik mendek eeppiige paga napuri nen, Ao, mbakwi, Ndi, aakumi inanebunu wi-wa mendek eeppiige paga napuri nen inanini ogwe, Eeruwak nduk, eeppiyaagin o,” yinuk, yorage,

²⁰ ti'nuk, Ala nen yoge kagak at Yetaya nen agabiti lek yorage logonet, “It aap nen, Kat Ala nonggop menggendak o, yinuk, yo'nugulik nogo, neebe nigiige, It aap an mu'neren noorak mbakulik nogo ninom lambungge, Eereegirak o,” yinuk, yorage, eereegwaarak kwe,

²¹it Iterali mendek nen eekwi iinok perak, Ala nen yorage logonet, “It aakumi iniki yugum negen kumbunuk, noone eeriyak ineebi mbakwi yi, Neya woraawak nduk, o kubondendok nen nok, oonikiya, Wa'nip o, yinuk, neenggi walok yokkiragatak kwe, meek aret o,” yinuk, yoragagerak ti paga it Iterali mendek wone ti, wagangga'lek iinok, inobaane'me aap endekem mendek wogonaburak ineenu wonogogwaarak iigo o, yinuk, yoragagerak.