Read Western Dani Oroma 6 Bible Online

Oroma 6 - Western Dani bible

Oroma 6

¹Ti kenok, wone ngge negen yuwok? Ala iniki kunik en nggwok togon obeelom eeppinanege kaawok nduk, maluk mban eerit nogo logowok mbakop?

²Mondok lek o. Nit maluk eeko nogogurak nogo ambinom eeriyak mban ee'ninake kero, aakumi kanggwi kwak lek agagerak kagak, nonggop togon maluk mban eerit nogo logorak mbakop?

³Keritut Yetut kinom kunik logonet, niyome wambeegutak ti kwak, at kambeegerak nogo, “Ninom kunik me, ninom aret kambeegurak kagi,” yinuk, mbaka'lek logonet yogo ogotik?

⁴ Keritut kangge mbareegi, ndoome pi nogogwaarak nogo ti, at ninom ambit kunik me, niyome wambeegurak nogo paga ninom kanggo mbareegu, ndoome pinani nogogwaarak. Ndi, nineenik ngget mendek a'nuk nogo logowok nduk, at ogoba Ala omaawi ambik menggerak nogo paga kanggo menggam nen at eenik agago mippege logonet, at ninom kunik me, ninom aret mippinaneegerak.

⁵At ninom nineebe ambit kunik logonet kambeegurak me, at eenik eerogo mippereegerak nogo ndak-ndak, nineebe at ninom kunik me, nineenik eerogo mippinanigin lek mbakop? Mippinanigin aret o.

⁶Nit maluk ayeloman logonet, niniki maan mendek nen maluk mban eeriyak ee'ninake nogo, ambinom eerit noorak ee'ninake kero, omaawi lek eerogo puwak nduk, Keritut ninom eyo karo-karo paga ninooreegwaarak nineenu me, yokkirogo ogoorik o.

⁷Aap ambi eenik kagak, iniki maan mendek nen maluk eerikit nduk koongge menggerak kwe, kangge kenok perak, iniki togop koonggeelik o.

⁸At Keritut kanggo menggam nen eenik agagerak me, peebi kambigin mondok lek o. At kangge logonet, kanggwi alom nogo omaawi lek eerogo pereegerak nogo paga, peebi kambigin lek nineenu me, nit Keritut ninom abet aret kambeegurak mbakwi kenok, peebi at ninom nineenik logogun abet aret mbako ogoorik o.

¹⁰At Keritut kambeegerak nogo ti, ne ambit aret kangge logonet, nit maluk eeriyak mban ee'ninake nogo, omaawi lek eerogo pereegerak me, at peebi kambigin lek o. Ndi, eenik agagerak nogo ti, Ala yoge kenok mban eeke logokit nduk, eenik agagerak.

¹¹Ti eereegerak ndak-ndak nit kunduk, maluk eeriyak mban ee'ninake nogo, ee'ninakak mban eeke kero, kambeegurak me, Ala yo'nirage kenok mban eeko logowok nduk, Keritut Yetut ninom kunik logonet, nineenik ogogurak mbako logowok o.

¹²Togop me, kinagabolo kanggo monggotak mendek kagak kiniki nen nengge nogo mugurok nogo logonet, maluk eeriyak mban eekkinake kero, tebenogo pegak eeko logonip o.

¹³Ndi, “Maluk eeriyak ee'ninake nogo, nineenggi-niniyok paga eeriyak op aret o,” yinuk, wondet agago mbo pugup o. Ata, aakumi kanggaatak ineenik agago mippiigo mengga kwak, kit togop aret ogogutak me, obeelom mban eerit nogo logobagip nduk, kineenggi-kiniyok abok aret Ala mban wogo'nuk logonip o.

¹⁴Ala nen Muta yoreegerak wone nogo kit ambinom eeko logorak kinombake lek o. Ata, iniki kunik en onggo lek we aret obeelom eeppinagage kagak eeko monggotak me, kit yogondak maluk ayeloman wonogwe lek aret o.

¹⁵Togop me, nonggop eeruwok o? Ala nen Muta yoreegerak wone nogo, nit eekwi lek o. Ata, Ala iniki kunik en onggo lek we aret obeelom eeppinanege kagak eeko monggoorak me, nit maluk eeko logorak op mbakop? Mondok lek o.

¹⁶ Wulaga ambi, “Nogoba nen yo'nege kenok, eeke logokit,” mbake nagaatik, yanggonak mban eerit nage paga, “Wulaga ti, aap nogo ayeloman aret kogo o,” yinuk, yogo menggaarak kineenggo'lek me, yogo ogotik? Ti ndak-ndak, maluk eeriyak eekkinake kenok, tebenogo pega'lek, “Eerikit aret,” mba'nuk, eerit nogotak-nogotak irip paga kineebe aret kambit nogo logomonggotak kwe, Ala nen ari kenok, “Eerikit,” mba'nuk eerit nogwe kiinok perak, obeelom aret agago pinagage kaamunggup o.

¹⁷Kit aa'nduk maluk ayeloman aret wogogutak kwe, yogondak perak, wone mamunggirogogwaarak nogo kiniki mbere lek ambit paga mondok li'luk eerogo woppunuk, eerit nogwe me, Ala mondok, “Wa,” yinuk, keyage wake agarik o.

¹⁸Kit maluk ayeloman wonogwe kiinok, wondet eerogo pinagareegerak me, obeelom mban eeko logobagip nduk, ayeloman eerogo pinagareegerak.

¹⁹An wone yi yokkirage ti, kit aakumi aret me, aap nen yogo mengga kwak aret yokkiragi o. Kit maluk ayeloman logonet, kiniki nengge kenok, eekwi, maluk eerit nogo logorak eekkinake kenok, eekwi, eeko logonet, kineenggi-kiniyok abok aret ili yikkolaga'lek, “Eeruwok aret,” mbarit nogo nogogutak nogo kokwak, yogondak Ala ayeloman at ake leenak logonet, maluk eeka'lek obeelom mban eerit nogo logobagip nduk, kineenggi-kiniyok abok aret Ala mban wogo'nuk logonip o.

²⁰Kit maluk ayeloman logonet, obeelom eeriyak ti, mbaka'lek we ugun kobak aret wonogogutak.

²¹“Nit maluk eeko nogogurak ti paga ninagabiti o,” yinuk, yogondak kit yogwe nogo ti, eerit nogo logonet, irip paga obeelom ambi ngge eekkologo nogogutak? Lek aret o. Ti abok aret eerit nogo nogogutak paga kanggo nogogutak.

²²Ndi, yogondak perak, kit maluk ayeloman wonogwe kiinok, Ala nen wondet eerogo pinagage nagagerik, at ayeloman logobagip nduk, eerogo pinagareegerak paga eyo anggen yi'nage menggi kwak, at nen leenogo pinagareegerak me, at ake eerit nogo logonet, irip paga kineenik mondok logorak mendek kologo logomunggup o.

²³Maluk eekwi onggo ti, kanggwi aret kwe, at Ala nen onggo lek we wo'niragagerak ti, ninowe Keritut Yetut ninom kunik logonet, nineenik mondok-mondok logorak ti aret o.