Read Western Dani 1 Korindut 10 Bible Online

1 Korindut 10 - Western Dani bible

1 Korindut 10

¹Noreewi o. Muta nen nit ninombomini wogoren wage kagak, eereegwaarak nogo kobak ogwe kiyo, aberogo yokkira o. It abok aret ndugwi nen tu nigiren wage, niyo mogongge kenok, it abok aret wunda wogwe, eereegwaarak.

²Nit Keritut oone waganggwi mendek mbaruwak nduk, niyome wanggo monggo kwak, it Muta oone waganggwi mendek yelok iyaawak nduk, ndugwi nen nobaarogo piige, niyo mogonogo piige, eereegerak.

³ Roti mbogut paga nen wugira wagagerak nogo, it abok aret nunggwi,

⁴ ndi, yugum wareegerak nogo ti, Keritut kwak me, wake mbareegi, Ala nen niyo wogoragagerak nogo, it abok aret nunggwi, eereegwaarak kwe,

⁵ it ando nggwok nogo Ala ale'nggen inombarulik me, karume time kambit nogo logonet, inowak nggininit nagagerak nogo o.

⁶ Ti eereegwaarak nogo it, “Maluk eeruwok,” mba'nuk, eerit nogo nogogwa kwak, nit ndak-ndak, “Maluk eeruwok,” mba'nuk eerit nogwe niyo, liippako logowok nduk, eereegwaarak.

⁷ It aakumi ando nen kugi eeko logonet, “Yi inom, mbi inom, nenok, mi'na'nuk, kwirabik-kwirabok yogo logonet, kumi aap inom ugun-ugun eeko nogogwaarak o,” yinuk, liiru mbanak nogo ndak-ndak kit kugiwak amili kuniyak mage o.

⁸ Ndi, it ando ndawi wappunuk, kumi ugun-ugun wurinabit nogo mbareegwa, ne ambit liingge ineebe ambik dua puluh tiga ribu aret kambit nogogwaarak nogo kwak, nit togop ee'ninabukwak, ugun aganabit nugu logorak mage o.

⁹ It ando nen, “Ala nonggop ee'ninake kaamun?” yinuk, anini eeppogo mbareegwa, waalo nen eyak mbaninabit nage mbareegi, kambit nogogwaarak nogo kwak, nit togop aret kambit nookwak, “Nonggop ee'ninake kaamun?” yinuk, Ala anini eeppuurak mage o.

¹⁰ It ando nen ineebi-ineeba yogo mbareegwa, at malayikat aakumi inoorit nega nogo nen inoorogo piinet wage mbareegi, kambit nogogwaarak nogo kokwak, nit togop aret ninooke kero, nineebi-nineeba yogo logorak mage o.

¹¹It eereegwaarak nogo ti, in wakkagak nit nineenu aruwok nduk, eereegwaarak me, o age yobok eeriyak eyom panggoni wage kagak, nit yogondak wonogwe yi, niniki liippatuwok nduk, wone yi, liiru mbanniragagerak.

¹²Ti kenok, aap ambit-ambi, “An Ala wone abu liippigirak me, maluk eerigin lek o,” mbake kenok, yigeebu wangge kero, iniki liippatinuk, logowak o.

¹³Kit kiniki nggagangginake menggerak nogo ti, alik mendek paga lek o. Ata, yi aakumi ndi aakumi iniki nggaganinake menggerak nogo mendek paga mban aret kit kiniki nggagangginake kaamunggup kwe, at Ala nen nit ee'ninake nogo, mondok liippinanege menggerak me, kiniki nggagangginake kagak, kinomaawi lek arit unggwage logonet, maluk eekwi kiyo, Ala nen tu mbininogo pinagagin o.

¹⁴Ti kenok, noreewi o. Kit an niniki kunik me, kugiwak amili kuniyak, “Nineebi lombok,” mbako logonip o.

¹⁵Kit aap kiniki warak aret me, wone yokkirage yi, kit mban kiniki wakkogo logonip o.

¹⁶ Nit niniki ambit lambunik logonet, at Keritut amiya wundeegerak nogo paga lambunogo pinaneegerak abeko logonet, amburu toolak waganogo, “Ala wa,” yinuk, nonggo monggoorak nogo lek a? Ndi, roti karerogo nonggo monggoorak nogo ti, nit niniki ambit lambunik logonet, at ninake kambeegerak abeko logonet, nonggo monggoorak nogo lek a?

¹⁷Roti ambit worarak wonage, ndi, nineebe apit aret kwe, roti ambit worarak ti aret karerogo mak-mak nunggwi me, nineebe ambit lambunik aret ogoorik o.

¹⁸ It aakumi Iterali eeko nogogwaarak nogo liippinip o. It Ala aanggo wonok wogwe inom, warogo Ala wogogo logonet, nunggwi inom, Ala nen ndak-ndak eeppiige menggerak lek mbakop?

¹⁹An wone ti ngge nduk yokkirage mbakop? “Obeelom eekkolaabagip nduk, kugi aanggo warogo nonggo logonip o,” yinuk, yokkirage mbakop? Ndi, “Maluk eekkinake kero, kugiwak amili kunggo logonip o,” yinuk, yokkirage mbakop?

²⁰ Mondok lek o. An yokkirage ti, it aakumi endekem mendek nogo nen inagugi aanggo warogo wogogwi nogo ti, Ala ake warogo wogogwi lek o. Ata, it inagugi inake aret warogo wogogwi me, inagugi kinoba age kero, kit kinom kunik eeko logorak an mondok, “Neebi,” mbake logonet, yokkiragi o.

²¹Ninowe amiya kwak amburu toolak inom, kugi Tile agi toolak inom, imbirak lambunogo punuk nenggak yuurak mondok meek o. Ndi, ninowe ambi larak inom, ti'nuk, kugi Tile ambi larak inom, imbirak lambunogo punuk, noorak ti kunduk, abu meek mban o.

²² Nit ninowe anini eeppuurak op mbakop? Nit ninomaawi ambik, ndi, at omaawi lek mbakop? Lek aret o.

²³ Yi mendek ndi mendek eeriyak mage lek abok ugun eeriyak op aret kwe, eerit nogo logonet perak, nit ambi obeelom eekkoloorak nduk, eekulik o. Ndi, yi mendek ndi mendek abok eeriyak ti, op aret kwe, apit op eeppinaniyak nduk, eekwi ti lek o.

²⁴Kit kinobaalombok mban eekko'net nogo logorak lek o. Ata, kinoreewi inikilom mbaruwak nduk inom aret eeppiinet nogo logonip o.

²⁵ “Nggween inom, yi mendek ndi mendek nggween paga wonogwe nogo abok aret inom, at Ala mban unde aret o,” yinuk, liiru mbanak wonage me, kit wam mbanak pasar paga onggo kumbunuk, alom kobak logonet, ugun nonggo logorak op aret o.

²⁷It aap abet mbaka'lek mendek nen kinom mbi noorak nduk, wiigirage kenok, kinom na noorak mbakwi kiinok, larogo wokkirogwe nogo, “An op namun ilik, lek a?” mbaka'lek kagak ugun aret nonggo logorak op aret kwe,

²⁸aap alik ambi nen, “Yi kugi ake nggomoorak larak o,” yinuk, yokkirage kenok perak, kit ugun noorak op aret kwe, at yokkirage nogo nen, “An op namun ilik, lek a?” iniki aaninggin kenok, yokkirage me, at ake nen noorak lek mbo puurak aret o. Mbo puurak op aret kwe, kit ando nen, “An ugun noorak op mbake neegak, at ambi noorak paga nonggop nduk mage yo'nirage,

³⁰ndi, an nobaalombok Ala, Wa, yinuk, nengge neegak, it aakumi nonggop nduk, nabok mbanggwi, eeko agaarik o,” yinuk, yogwe kiigirak me, noreewi o.

³¹Kinambi nunggwi, kinagi nunggwi, yi eekak ndi eekak abok aret eeko logonet, Ala endage tiyappuurak nduk mban eeko logonip o.

³²An aakumi inale'nggen mbaruwak nduk, inake yi eekak ndi eekak eeke logonet, an obeelom logokit mba'nuk, eekkolage lek o. Ata, Ala nen it inagap ndaruwak nduk, obeelom eeppiinet nage minggirak nogo ndak-ndak, kit togon, it Yakuri mendek inom, Yunani mendek inom, Ala apuri yi awi ndi awi kuwak eerit nogo menggaarak abok aret eeppiinet nogo logonet, non mbanogo piyookwak, liippunuk, eeppiinet nogo logonip o.