Read Western Dani 1 Korindut 9 Bible Online

1 Korindut 9 - Western Dani bible

1 Korindut 9

¹An nogo, aakumi nen, “Yogop ee'nu, ndogop ee'nu,” yo'nugwi iigak eeke minggirak mbakop? An nappiigak logokit nduk, Ala nen mippanulik mbakop? Ndi, ninowe Yetut an nenegen liirogon koolik nombako ogotik? Ninowe eyabu eeke minggirak nogo, anggen yugu negen kit aret wonogwe nogo lek a?

²It aap ando nen, “Kat nappiigak mendek lek o,” yo'nugwi iigak kwe, kit nen perak, an yokkirage neegak, kit Ala apuri ogogutak ti paga liippaninuk nappiigak mendek abet aret wonage nombakwi nogo lek a?

³It aakumi nen an kin wo'neego logonet, “Kat abet aret nappiigak mendek ilik?” yo'nugwi iinok, an nen wone onggo yorage logonet,

⁴“Lek o. An Ala eyabu eeke nogo onggo kinambi-kinagi ma'ninip o,” yokkiroorak meek mbakop?

⁵It aap nappiigak mendek ando inom, at ninowe awurilogwe ambokan ndarak inom, Peterut inom, Ala wone wonok nugu logonet, inakuwi wogoren nugu menggaarak nogo ndak-ndak, nit togon togop eeriyak meek mbakop?

⁶It ti, eerit nugwi iigak, an Mbaranabat nimbirak mban nit nineebe op logowok nduk, nineenggi paga mban nggik-palek eekko'net nugu logorak op mba'nuk, yogo ogotik?

⁷It yigin unde nogo ineebe op logorak nduk, ineenggi paga mban nggik-palek eerogo nonggo menggaarak mbakop? It aap yabu eeka nen anggen yugu mbanogo ando it nunggulik mbakop? Ndi, it aap ndomba ndegeninaka nen ndomba inelak amburu toologo it ando noorak meek mbakop? Lek o. It yabu eeko menggaarak abok aret onggo anggen mbanogo nonggo menggaarak aret o, yinuk, yokkiragi o, noreewi.

⁸An wone yokkirage ti, nit aakumi abok eeko monggoorak nogo mban wakkagak yokkirage ti lek o. Ata, maan Ala nen Muta wone yoreegerak nogo, togop aret liiru mbanak wonage nogo lek a?

⁹ “Lembu nen iniyok paga gandum anggen mbelanit nage kagak ando nunggwi iyo, inambe keele maarogo piigo logorak mage o,” yinuk, Ala nen wone Muta yoreegerak liiru mbanak wonage nogo ti, Ala nen lembu mban abuwa mba'nuk, yereegerak ilik,

¹⁰nit togon, ninabuwa mba'nuk yereegerak a? Lek o. Nit aakumi ninabuwa mba'nuk aret yereegerak me, it aap yabu wagangga inom, anggen mbilanit naga inom, imbirak nen, “Peebi nit aret nonggo logogun o,” yinuk, iniki lunik logonet, eeko menggaarak.

¹¹ Togop ndak-ndak, nit nen Ala wone nogo kinikime awi yappinagareegurak me, yogondak anggen yugu kit kinamendek ando nit wo'niroorak meek nduk yogo ogotik?

¹²It iyaalok Ala wone kinikime awi yappinagulik mendek nen, “It inamendek ando wo'niraagun,” mba'nuk, kinoba aberak wonogwe iinok, wogorogo monggotak kwe, nit iyaalok yappinagareegurak nogo nen, “Wo'niraanip o,” yinuk, yokkiroorak meek mbakop? Yokkiroorak op aret kwe, obeelom wone Keritut yo'niragagerak wone nogo wiganit nage me, non mbambukwak nduk, “Wo'niraanip o,” yokkiraga'lek nineenggi paga nen mban eekko'net nogo ogoorik o.

¹³ It Ala awi wurik me yabu eeko menggaarak nogo, yabu eekwi onggo negen mbi Ala ake pugu nogo aret kologwe, ndi, it aap Ala aanggo warogo wogogo menggaarak nogo, warogo wogogo logonet, ando it nunggwi, eeko menggaarak nogo kineenggo'lek me yogo ogotik?

¹⁴ Ti ndak-ndak it aap wone obeelom wone yorogwe nogo, ineebe obeelom logowak nduk, “It waganggo menggaarak nogo nen yi mendek ndi mendek wogorogo logowak o,” yinuk, ninowe nen koonogo pereegerak.

¹⁵Koonogo pereegerak kwe, “Kinamendek ambi wo'ninip o,” yinuk, an yokkirage logolik o. Ndi, yogondak kunduk, kit ambi eeppanubagip nduk, liiru yi mbanggirage lek mban. An kambuurak op aret mbake kwe, “An Ala ake pugu waagin abu lek o,” ari minggirak ti, iya lombok mbake me, aakumi nen lek eerogo paniyak lek aret o.

¹⁶An obeelom wone yoranet nege minggirak nogo ti, Ala nen, “Yoranet nege logot o,” ari kenok, yoranet nege minggirak ti paga an wogoppatiyak abu lek o. An wone obeelom wone yoranet nege lek neenok, maluk eeppaniyak me, nagabiti mba'nuk, yoranet nege minggirak.

¹⁷An niniki mba'nuk yorage logonetak en, “Onggo wo'niruwak,” mba'nuk, niniki lunik logorak op aret kwe, Ala nen aret unde eeppaneegerak kenok, yoranet nege minggirak me, onggo lek we aret yoranet nege minggirak.

¹⁸Togop me, an onggo koloorak ti, ngge mbakop? Lek o. An yabu eeke onggo ti, wone yokkirage nogo paga, “Onggo wo'ninip o,” yokkiroorak op kagak, tebenogo punuk, obeelom wone onggo lek we aret kineenu eeppinagit nege minggirak nogo ti, an onggo kolage ti aret o.

¹⁹An aakumi inayeloman wonage lek we wonage minggirak kwe, Ala apuri eerogo piyaakit nduk, aakumi abok aret inayeloman eekko'nok nage minggirak.

²⁰An nen it Yakuri mendek Ala apuri eerogo piyaakit nduk, inenggela'me logonet, it Yakuri eeko menggaarak aret eerit nage, ndi, it wone Muta yoreegerak eeko menggaarak nogo, an togop eekeelik kwe, Ala apuri eerogo piyaakit nduk, inenggela'me logonet, Muta wone yoreegerak eeko menggaarak an ndak-ndak eerit nage,

²¹ndi, it aap endekem mendek Ala nen wone Muta yoreegerak wone eekulik mendek nogo, Ala apuri eerogo piyaakit nduk, inenggela'me logonet, it eeko mengga kwak, an ndak-ndak eerit nage, eeke minggirak. Ti eeke minggirak nogo ti, Ala yereegerak wone nogo taganogo punuk eekeelik o. Ata, Keritut yereegerak wone aret eeke logonet, eeke minggirak me nduk, yokkiragi o.

²²Ndi, it aakumi iniki awo kole aga'lek mendek nogo iniki kole eerogo piyaakit nduk, it inenggela'me logonet, it eeko menggaarak an ndak-ndak aret eeke minggirak. An yi aap ndi aap abok inenggela'me nege logonet, it ambitak Ala nen inagap ndaruwak nduk, it eeko menggaarak abok aret an ndak-ndak eerit nage minggirak.

²³An eerit nage minggirak ti, abok aret it aakumi wone obeelom wone konembunuk, waganggo logonet, iniki ale'nggen mbakwi kwak, an togon nale'nggen kaakit nduk, yoranet nage minggirak.

²⁴It aakumi onggo koloorak nduk, nggare agan nogo logonet, ineebe apit aret nggare agan nogo menggaarak kwe, ambiret mban onggo kolage menggerak nogo, kit kineenggo'lek a? Togop me, onggo kolaabagip nduk, kit kunduk togop aret nggare agan togon nogo logonip o.

²⁵Aap ambi it aakumi nggare agan nogwe nogo inom nggare agan aa'nduk wundi noorak mbake logonet, at yi mendek ndi mendek eeriyak mbake nogo tebenogo pege menggerak. At onggo nggare-nggare mendaarak we luulu lek ariyak mendek kagak yippanuwak mba'nuk, eeke menggerak kwe, nit perak, onggo nggare-nggare mendaarak mondok-mondok logorak mendek yippinanuwak mba'nuk, eekwi me,

²⁶ti paga an mondok nengga lolo nggare agan nage agarik o. Wim namburuwok nduk, anggut-nggut wakkogo mengga kwak, an togop eekeelik o. Ata, it ando, “Ninom mbe agan nogo logowok o,” yoraminggirak ninom mbe agan nogwe niigak, “Mbe agan noorak onggo kat koloorak lek me, puk logot o,” yo'nirukwak, nomaawi paga mbe agan nage logominggirik, onggo kolaakit nduk, yi mendek ndi mendek eeriyak ee'nake nogo tebenogo punuk, wakkagak mban eeke minggirak.