Read Western Dani 2 Korindut 13 Bible Online

2 Korindut 13 - Western Dani bible

2 Korindut 13

¹Ne mbere paga pekkiya wagagirak kwe, yogondak ne ambinom pekkiya woraakit nduk, eeke agarik o. “Aap ineebe mbere a, kenagan a, nen inigen kenok, yogwe iinok perak, Abet aret eekaarak me, yinuk, awone op aret mbanggo logorak o,” yinuk, liiru mbanak nogo wonage o.

²Aa'nduk pekkiya wagagirak me, ti'nuk, peebi pekkiya wage nagagirik, yokkirage logonet, “Kit maluk eekotak ambi wonage kenok, teppinagagin lek o. Kinawone amburu mbanogo mondok kinowak loonigin o,” yinuk, yokkiragagirak nogo kokwak, yogondak ndak-ndak pekkiya waga'lek logonet, it aa'nduk maluk eereegwaarak kinom abok aret wone ti yokkiragi o.

³“Keritut nen yoge kagak yo'nirage menggerak nit abet mbaruwok nduk, ambi eeke kaawok o,” yinuk, nombako monggotak nogo, an kiya wage logominggirik, ninom wonogwe niigak, Keritut nen meek negen eeppinagagin lek o. Mondok iya lombok eeppinagage kaamunggup o.

⁴At aap nit kokwak eebe lebenak me nduk, abet aret eyo karo-karo paga warogo pereegwaarak kwe, Ala omaawi paga mippege mbareegi, eerit nege menggerak nogo kwak, nit togon, nineebe lebenak aret kwe, Keritut ninom abet aret kunik me, kinenggela'me logonet, Ala omaawi paga eerit nugwi niyaamunggup o.

⁵Kit abet mba'nuk, waganeegutak nogo aret mugurok nogwe ilik, lek a, nogo kinalitak lombok liippatinuk, kinabut mbanggologo logonip o. Kinabut mbanggologo logomonggotik, “Op aret mugurok nage kagi,” mbakwi kenok, “Yi Keritut Yetut ninikime wonage me eeke kagi,” mbarumunggup o. Ndi, “An mugurok nage lek kagi,” mbakwi kenok perak, “Yi Keritut ninikime lek aret kagi,” mbarumunggup o.

⁶Kit op mugurok nogwe a, lek a? nit nineenggo'lek kwe, nit perak, ninabut abu mbanggologogurak me, “It op aret mugurok nogwe,” ninombarubagip nduk, yokkirogo o.

⁷Kit maluk eeko logokwak nduk, kinake Ala yogo monggoorak. Kit maluk eeka'lek kiinok, “Pawulut awuri wone waganeegwaarak abet aret mugurok nogwe me iya,” yinuk, ninabut mbambunuk, ninabok obeelom mban yuwak nduk, kinake tamban eekwi lek o. Ata, nit ninabok maluk yogwe tit iigak kwe, kagak kit obeelom mban eerit nogo logobagip nduk, kinake tamban eeko monggoorak.

⁸Ala ari menggerak wone kagak nit alik eeriyak meek me, wone ti woppunuk, mondok mugurok nogo logowok nduk mban eeko monggoorak.

⁹Kit kiniki abu kole eekkinabuwak nduk, tamban eeko monggoorak me, nit ninoone omaawi yokkiraga'lek niigak, kit-kit mban koombunuk, eerit nugwi kiinok, ale'nggen mban aret mbarugun o.

¹⁰An nen aakumi maluk eeppiyaakit nduk, Ala nen at oone unde eeppanulik. Ata, aakumi iniki kole eerogo piyaakit nduk, oone kili'nereegerak me, an kiya wage logominggirik, noone omaawi lok togon yokkirookwak, awo waga'lek logonet, wone yi liiru paga mbanogo nappinagi wagi o.

¹¹Ndi, noreewi o. Wone ti abu aret yokkiragi o. Kiniki kole arubagip nduk, eeko logonet, an wone yokkirage yi, inom liippogo logonip o. Kiniki ambit eeppunuk ale'nggen paga lambunik logonip o. At ninabuwa mbake, ndi, niniki ugun tayenak logowok nduk eeppinanege, eeke menggerak Ala nogo nen kinarum aret logogin o.

¹²Linggik-kambuk yogo logonet, keyage wat-wat yogo logonip o.

¹³Ndi, it Ala apuri alik leenak o yime wonogwe abok aret nen keyage wappinagaga o.

¹⁴Ninowe Yetut Keritut iniki kunik nen obeelom eekkinake, Ala nen kinabuwa mbake, ndi, Aberiniki kinom kunik logonet, kit abok aret kinarum wonage, eeko logogun o. Abu aret yokkiragi o, noreewi wa.