Read Western Dani 2 Korindut 4 Bible Online

2 Korindut 4 - Western Dani bible

2 Korindut 4

¹Nit wone ti, yorogo logowok nduk, Ala nen ninabuwa mbake logonet, unde eeppinaneegerak me, wagangga'lek iinok, niniki maluk ageelik o.

²Inenggali ariyak mendek kagak, wone kote yorogo menggaarak nogo mendek, “Nit togop yoranet nogo logogun lek o,” yinuk, kooneegurak me, kit nen nineebe wo'ninabubagip nduk, koonggo'net nugwi, Ala wone kagak alik pugunogo yokkirogwe, ti eeko logolik o. Nineebe mbo pinaniyak mbakwi kenok, wo'ninaburak mbakwi kenok, “Ala mban koonigin o,” mbako logonet, nit we at ari menggerak wone nogo mban paganogo yokkirogo monggoorak.

³Nit obeelom wone yorogo monggoorak nogo yelok kaga'lek nobarak wonage kenok ti, it abet mbaka'lek logonet, kambit nogwe nogo nen mban wone ti, yelok kaga'lek wonogwe o.

⁴At Ala etenggen ndak-ndak mondok tiyanak aakumi, “Wi!” ugwi Keritut eeke nagagerak obeelom wone nogo, it aakumi abet mbaka'lek mendek nen yelok kogo logokwak, at o yogondak unde menggerak Ibilit nogo nen iniki apit eerogo piyareegerak me, yelok kaga'lek aret wonogo agaarik o.

⁵“Nit aap iya o,” yinuk, eeko monggoorak mbininogo yokkirogwe lek o. Ata, “At Yetut Keritut ti, ninowe aret me, at mban iya o,” yinuk, yokkirogwe, ndi, nit togon, “Yetut yereegerak ndak-ndak, nit kit kinayeloman aret o,” yinuk, yokkirogwe, eeko monggoorak o.

⁶ At Ala nen ari logonet, “O apit me eya aruwak o,” yinuk, eya eereegerak nogo inom, ndi, Ala mondok tiyanak, “Wi!” ugwi nogo, Keritut enete liippunuk, yelok kogo logowok nduk, ninikime eya ee'ninabeegerak nogo inom, ti eebe ambit Ala nen mban aret eereegerak o.

⁷Ala nen nit unde eeppinaneegerak nogo ti, ninageerok niniki kundugu kwak aret me, nit wone ti, yorogwe niigak, Ala omaawi paga aakumi inikime mondok alik lombok eeppiinet nage nogo, kogo logomenggaarik, “Yi aakumi inomaawi paga eekwi lek o. Yi Ala omaawi paga aret eeppiinet nage agaarik o,” yinuk, kin kogo logowak nduk, togolowak nggween mendek ogobakkigirik nogo paga yonggolak wonage o.

⁸Taga'mbit agago pinanegaatak kwe, aan lebenogo pinanegeelik o. “Nonggop eeruwi o,” yinuk, niniki piirik wonogwe kwe, nineebe lek aga'lek, kagak aret monggoorak.

⁹Piyak-payak eerogo pinanugwi iigak kwe, Ala nen mbo pinanegeelik o. Ndi, ninookwi kwe, nineebe kanggwi lek aret o.

¹⁰Nit nineebe eeppinanugwi ti paga, at Yetut nggween paga logonet eeke nagagerak nogo, aakumi kin kaawak nduk, Yetut wako mbareegwa, kambeegerak nogo kokwak, nit togon ndak-ndak ko'lu-kii'me nineebe ninookwi paga kanggwi negen aret eeko ogoorik.

¹¹Nit ninagabolo kanggwi yi paga, Yetut nggween paga logonet eeke nagagerak aakumi kin kaawak nduk, nit nineenik awo wonogwe yi, Yetut eereegerak wone agan nugwi paga ko'lu-kii'me nineebe ninookwi iinok, kanggwi negen aret eeko ogoorik o.

¹²Togop me, nit wone yokkirogo monggoorak ti paga, nineebe ninookwi iinok, kanggwi niigak kwe, kit perak, waganggwi paga kineenik eekkinake agaarik o.

¹³ Togop ee'ninake tit kagak, at ambi nen ari logonet, “Niniki koba panggombunuk abet kombake me, yagarak o,” yinuk, yereegerak liiru mbanak nogo, at abet mba'nuk yereegerak ndak-ndak, nit togon obeelom wone abet mbako logonet, yogo ogoorik o.

¹⁴At ninowe Yetut eenik agago mippereegerak nogo nen peebi nit ndak-ndak nineenik agago mippinanege logomenggerik, Yetut ninom logowok nduk, kit ninom at owagam pinani nagin nineenu me, obeelom wone ti, mondok abet mbako logonet, yogo ogoorik o.

¹⁵Togop me, aaninggin ninoba pinanugwi nogo ti, kit kinake aret eeppinanugwi me, op aret o. Ala iniki kunik nen obeelom eeppinaniyak wone at ambi waganggak, at ambi waganggak, eerit wiganinuk nage paga it aakumi apit Ala, “Wa,” yinuk, at tiyappuwak nduk, eeppinanugwi me, op aret o.

¹⁶Togop kenok, aaninggin ninoba pinanugwi kwe, niniki lek-lek ee'ninakeelik o. Eerit nogo logonet, ninagabolo lebenak arit unggwage paga kambuurak kwe, niniki perak, ko'lu-kii'me nineenik ngget mendek eeppinanit unggwage menggerak.

¹⁷Yogondak piyak-payak eerogo pinanugwi yi, peebi eeppinaniyak ndak-ndak abu lek o. Peebi eeppinaniyak nogo ti, yi mendek ndi mendek tebenak kagak, nit tiyappinanemenggerak nogo mondok-mondok tiyanak logogun me, yogondak eeppinanugwi yi, “We luulu teeluk aret eeppinanugwi,” mbako ogoorik o.

¹⁸Nit yi mendek ndi mendek ninigen kogwe ti, luulu aret me, niniki yi paga panggombunuk, wonogwe lek o. Ninigen kaga'lek nogo mendek perak, mondok-mondok menggerak me, niniki ti paga panggombunuk ogoorik o.