Read Western Dani 2 Korindut 5 Bible Online

2 Korindut 5 - Western Dani bible

2 Korindut 5

¹O nggween paga yime ninagabolo ooliya wurik kwak mi-mi wangge kenok, obaane'me ambi mbogut paga wurik wonage nineenu aret o. Mbogut paga wurik ti, aakumi nen wurogo pinanulik o. Ata, Ala nen aret wurogo pinaneegerak me, mondok-mondok aret logogin o.

²Ninagabolo mbogut paga mendek nogo awo yippinanega'lek kagak, ninagap mbelanak wonogwe niyookwak nduk, ooliya wurik kwak ninagabolo maan mendek yi, lek eerogo punuk, obaane'me mbogut paga mendek mbet-mbet yippinanuwak lak, “Ao,” mbako ogoorik.

⁴Nit ninagabolo maan mendek yi, “Nineebi o,” yinuk, mbo punuk, we ninagap mbelanak logorak mbakwi lek o. Ata, nabelan-kabelan eeppinanege logonet, ngget mendek mbet-mbet yippinanuwak lak “Ao,” mbarit nogo logonet, ooliya maan wurik yi paga aaninggin kagak aret nogo ogoorik o.

⁵Nabelan-kabelan wo'niroorak nduk, niniki pipuk eerogo pinanege menggerak nogo ti, Ala aret o. Nit nabelan-kabelan ti, “Abet aret eeppinanigin,” mbaruwok nduk, Aberiniki aa'nduk aret wo'niragagerak me, niniki tayenak ale'nggen aret ogoorik o.

⁶Ninagabolo maan mendek yi, wonage kagak ninogoba awoore'nggam unggwi noorak lek ti, nineenu aret ogoorik o. Ala nen, “Eekkinabigin o,” yereegerak nogo ninigen kenok eekwi lek o. Ata, ninigen kaga'lek logonet, abet mba'nuk, eerit nugwi me, niniki ale'nggen aret kenok yokkirogo.

⁸Ninagabolo yi, nggonenogo mbo punuk, ninogoba wonage me, mondok-mondok ka noorak uugwe lombok mbakwi kwe, niniki kwippunuk tit ogoorik o.

⁹ Togop me, ninagabolo yi, nggonengga'lek logonet, maluk-obeelom eeko nogogurak nogo, Keritut nen ninowak loonogo onggo ndak-ndak wo'niraawak nduk, nit abok aret at owagam kuwak agago pinanigin me, ninagabolo yi, nggonengga'lek kagak, nggonenak kagak, Ala inikilom ninombaruwak nduk mban eerit noorak mbakoorak me, niniki ale'nggen mban ogoorik o.

¹¹Nit abok at owagam kuwak eeppinanigin nineenu me, ninagabiti mbako logonet, yi aakumi ndi aakumi abok ninoone abet mbaruwak nduk, aganggen kerek togon yorogo monggoorak kwe, nit nonggop logonet, yorogo monggoorak nogo ti, Ala eenu aret o. Ndi, kit togon, kinikime togop aret eekkinake me, kineenu aret mbake agarik o.

¹²Nit wone yokkirogwe ti, nit iya me, kit wo'ninabubagip nduk, ambinom yokkirogwe ti lek o. Ata, it inobaabut liippiiga'lek logonet, inetenggen liippunuk mban iya mbakwi nogo nen ninabok mbanggwi iinok, kit puk arugup o. Ata, “Ninogobamini aret me,” yinuk, ninaana'le mbanggo logobagip nduk, yokkirogo ogoorik o.

¹³Nit yorogwe paga, “Kumili o,” yo'nirogwe iigak kwe, Ala tiyappuurak nduk, agan nugwi niigak, yo'nirogwe me, op aret o. Ndi, “Aap iniki warak logonet, yo'nirogwe o,” yinuk, yogwe iinok ti, kit ambi eeppinagawok nduk, yokkirogwe me, op mban o.

¹⁴At ambi nit aakumi abok ninobaane'me kambeegerak nogo paga nit abok at ninom kunik me, ninom aret kambeegurak. Ndi, “Nit abok ninobaane'me kambeegerak nogo ti, nit ninobaalombok mban eerit nugu logowok nduk, kambulik o. Ata, at ninake kangge mbareegi, eenik agago mippereegerak nogo, ake eerit nugu logowok nduk, ninobaane'me aret kambeegerak kogo,” yinuk, Keritut iniki kunik lombok ee'ninabeegerak me, eereegerak wone ti, nit puk aga'lek yoragak mban eeriyak ee'ninake agaarik o.

¹⁶Togop me, it aakumi abe iinok mban yorogo mengga kwak, nit togop yorogo logogun lek o. It aakumi nen, “Keritut ndogop o,” yinuk, liippunuk, yogo nogogwa kwak, nit aa'nduk togop aret yogo nogogurak kwe, yogondak nit togop yogwe lek o.

¹⁷Aap ambi Keritut imbirak kunik wonage kenok, at iniki ngget ogobakkigirogo pemenggerak me, obaabut maan mendek lek age logonet, obaane'me ngget mendek aret arigin o.

¹⁸Wone apit yogoorak nogo ti, Ala nen aret eeppinanege menggerak. Ala ninom ogoorak wonogogurak kwe, at nen Keritut eereegerak paga ninom lambumbinaneegerak me, nit Ala ninom lambumbinaniyak wone yi, yorogo logowok nduk, unde eeppinaneegerak.

¹⁹At Ala nen, “An nogo ti, yi aakumi ndi aakumi abok an noone taganggwi iigak kwe, neenggi linggingga'lek aret logonet, Keritut eereegerak paga ninom lambunnogogurak o,” yinuk, yorogo logowok nduk, wone unde eeppinaneegerak eebe nogo ti aret o.

²⁰Togop kenok, nit Keritut obaane'me oone wonok yoranet nugu logowok nduk, mippinaneegerak logonet, Keritut eereegerak ti paga, “Ala kinom ogoorak logorak lek o. Kinom lambuninip o,” yinuk, Ala nen oone nabek togon yokkirobogom nit aret yokkirogo ogoorik o.

²¹At Ala nen nit Keritut ninom kunik niige logomenggerik, “Aap yi, iniki abe koonak aret kagi o,” yinuk, yo'niraawak nduk, Keritut maluk eeke logolik kwe, nit ninomaluk nogo at oba lenggenogo pereegerak.