Read Western Dani 2 Korindut 8 Bible Online

2 Korindut 8 - Western Dani bible

2 Korindut 8

¹ Noreewi o. It Ala apuri o Makendoniya kuwak eerit nogo menggaarak abok nen Ala iniki kunik nen eeppiige kagak eereegwaarak nogo kineenu eeppinagarak mbakoorak me, yokkiraawi o.

²Aaninggin-paaninggin mondok iya tit inoba age kagak, “Yi ninabut mbanikit nduk eeppinanege o,” yinuk, iniki ale'nggen ambik mbako logonet, ineenggi abu lek tit kwe, aakumi inabuwa nen inamendek mondok alik negen inake kuwak eekaarak o.

³It nen, “Nit ti kuli kuwak eeriyak ninobam o,” mbakaarak nogo mban kuwak eerulik o. Ata, “Ti kuli kuwak eeriyak meek,” mbakaarak nogo kagak ambinom mondok iya tit kuwak eekaarak naruk konenggirak me, yokkiragi o.

⁴Nit nen, “It mbuuluk yeenggwaaroorak op aret,” mbakoorak nogo kagak, it inalik nen iniki koombunuk, “Nit kunduk it Ala apuri alik leenak o Yureya inabuwa lombok mbako monggoorak me, inake kuwak eeko logowok o,” yinuk, inoone nabenak mban yo'nirogo nagaarik, nggwok aret kuwak eekaarak o. It inamendek aa'nduk kuwak eerulik o. Ata, aa'nduk ineebe apit aret Ala wogogo nagaarik, ti'nuk, at Ala mbake menggerak ndak-ndak, ninoone liirogon konenggo nagaarik, kuwak eekaarak o.

⁶Togop me, at Titut nogo it Ala apuri inabuwa nen inake pugu nogo kuwak eerit nage me, kit ando awo pega'lek nogo mbet-mbet pumonggotak me, waganggak woraawak nduk aruk wakoorak o.

⁷Kit kiniki abet mbakwi, iniki ale'nggen paga konenggwi iigak yorogwe, Ala ari menggerak wone kineenu ogwe, kiniki abe paga yeenggwaaranet nugwi, kiniki kunik ee'ninakwi, eekwi ti nogo abok aret nggwok wigak ari me, aakumi inabuwa nen inake kuwak eeriyak yi nogo inom ndak-ndak nggwok aret eeko logobagip nduk, yokkiragi o.

⁸An wone yokkiragi yi nogo ti, noone omaawi paga yokkirage lek o. Ata, it ando an noone konembunuk, iniki aganggen kerek togon eekaarak nogo ndak-ndak, kit an noone konembunuk, “Ndak-ndak eerumonggotak paga kiniki kunik ee'nakwi kiyaamun ilik?” yinuk, yokkiragi o.

⁹Ninowe Yetut Keritut nen kinabuwa mbake logonet, eeppinagareegerak nogo kineenu aret o. At nen, “An aap nggwok mondok tiyanak aret minggirak kwe, it ninom ndak-ndak tiyanak logowok nduk, an tebeppati wambi o,” yinuk, at nggween paga tebekkola wambi wagagerak nogo o.

¹⁰Ala apuri inake kuwak eeko logorak an op mbake nogo, ambi yokkira o. Tahun aa'nduk nogo paga, kit aa'nduk Ala apuri inake kuwak eegiroorak koonggwi, ndi, kit nduk eebe aret kuwak eekwi, eereegutak kwe,

¹¹kit ando pega'lek kero, yogondak mondok age yobok togon pogo logorak ti, op aret mbaki o. Kiniki aganggen kerek togon kuwak eeriyak koombunuk, ando kuwak eereegutak nogo ndak-ndak, yogondak kinageerok ambi wonage kenok, ti aret kuwak eegirogo logonip o.

¹²Ninamendek lek me, wogoga'lek kenok ti paga, Ala nen eebi ninombake menggerak lek o. Wonage kagak wogoga'lek kenok perak, eebi ninombake menggerak me, eebe wonage kenok wogogwi, “Wogorikit lak eebe lek me, ao,” mbakwi, ti imbirak wogogwi mban aret me, inikilom mbake menggerak.

¹³Kit eeriyak yokkirage nogo ti, it ando ugun puk iigak, kit Korindut mendek nen mban pogo logobagip nduk, yokkirage lek o. Ata, yeenggwa-yeenggwa eeko logobagip nduk, yokkirage agarik o.

¹⁴ Peebi aaninggin kit kinoba age kenok, it Ala apuri o Yureya mendek nen kit yeenggwaagirogo logowak nduk, yogondak kit kinamendek we mbuuluk ka'let agaarak me, kit nen it yeenggwaaroorak op aret mbake agarik o. “Nggwok yonggokkologogwaarak nogo ambik age, Ndi, mbuuluk yonggokkologo-gwaarak nogo lek age, Eerulik noorak ndak-ndak aret agagerak,” yinuk, liiru mbanak nogo ndak-ndak kit togon togop aret yeenggwa-yeenggwa eekwi paga kit kineebe ndak-ndak obeelom aret logomunggup o.

¹⁶Nit nen kinoba aberak me, yeenggwaagiroorak mbako monggoorak nogo kokwak, aap Titut togop aret yeenggwaagirage logowak nduk, Ala nen iniki koonggerak me, “Ala wa,” yoge minggirak.

¹⁷At nen, “An yeenggwaaraakit lak, ao,” mbake me, “Kat o Korindut op noorak ilik, lek a?” awo yogwi niigak, iniki nen, “An aret naakit o,” yinuk, kiya wage ti o.

¹⁸Kiya wage me, ninoreeluk ambi wone obeelom wone Ala apuri kuwak eekwi me abok aret yoranet nege paga endage tiya yereegerak nogo, imbirak nappiya wogo ti o.

¹⁹Nit nen ninowe tiyappugwi, ndi, aakumi inabuwa nen yeenggwaarogwe niyaawak nduk inake kuwak eekwi, eerit nogwe nogo, at ninom eeke logowak nduk, Ala apuri kuwak eerit nogo menggaarak nogo nen leenogo mippegaarak me, kiya wage ti o.

²⁰Aakumi inamendek nggwok kuwak eekaarak wogorogo logonet, ninggin ambi eerumonggoorak paga aakumi nen ninenggali wappinanukwak, liippunuk aret eeko ogoorik o.

²¹Nit ninogoba Ala enegen wonage me nduk mban eekwi lek o. Ata, aakumi inom inigen wonogwe iigak eekwi me, ira naga'lek kagak, nonggop togon eerogo wogora noorak nogo, aa'nduk koonogo pogo ogoorik o.

²²It kiya wogwe nogo, ninoreeluk ambi inom nappi wogo o. At ninom eerit nogo logonet, mondok liippunuk eerit nage kogoorak me, ninoone konembunuk, “Mondok abet aret kuwak eerugun,” kinombake logonet, “An kunduk, liirogon yeenggwaarage logokit o,” yinuk, kiya wage ti o.

²³At Titut nogo an nawot aret me, nimbirak yeenggwaagiroorak nduk eeko ogoorik o. Ndi, it ninoreewi ando kiya wogwe nogo ti, Keritut endage tiyappogo menggaarak me, Ala apuri kuwak eerit nogwe lombok nen leenogo nappiya wogwe ti o.

²⁴It Ala apuri kuwak eerit nogo menggaarak alik nogo nen, kit kiniki kunik paga Ala apuri ugun wogonakwi, ndi, “Pawulut oreewi inom nen it o Korindut mendek tiyappiigwi nogo ti, ti eekwi paga tiyappiigwi iigo,” yinuk, yogwe, eeruwak nduk, it kiya wogwe ti, kiniki kunik paga liirogon wogoninako logonip o.