Read Western Dani 2 Korindut 9 Bible Online

2 Korindut 9 - Western Dani bible

2 Korindut 9

¹It Ala apuri alik leenak o Yureya mendek yeenggwaaroorak wone nogo, nit liiru ambinom mbanogo nappinagi woroorak lek aret kwe, we mbuuluk irip paga iluk yi aret yokkiraawi o.

²Kit kiniki nen yeenggwaaroorak mbakotak nogo an abu neenu aret o. “Tahun aa'nduk nogo paga it o Akaya mendek nen Ala apuri o Yureya mendek yeenggwaaroorak iniki aganggen kerek togon muk kooneegwaarak o,” yinuk, it o Makendoniya mendek inenggaanom paga kit kooneegutak nogo wogoppinagage logonet, mbininirage mbaki, it ando nggwok nen, “Nit togon ndak-ndak yeenggwaaraawok o,” yinuk, koonggaarak.

³Kit wogoppinagage logonet, yoragarak nogo, “Yi we aret yegerak,” mbarukwak, an noone yagarak nogo abet aret mbaruwak nduk, kuwak eeriyak kooneegutak nogo woorak nduk, wologwe nappiya wagi ti o.

⁴“Kit abet aret kuwak eerumunggup,” kinombake logonet, yoragarak nogo, an Makendoniya mendek ninom pekkiya wogo logomonggoorik, “Yi kuwak eeka'lek kagak yo'niragaarak kogo,” mbakwi iinok, kit ninom ninenggali arukwak, mbet-mbet kuwak eeko logonip o.

⁵Togop me, aa'nduk, kit kuwak eeriyak yo'nireegutak nogo, “Yi we ineebi mbako logonet, kuwak eekaarak lek o. Ata, inabuwa nen iniki ale'nggen mbako logonet, kuwak eekaarak,” kinombaruwak nduk, an awo waga'lek neegak, it wologwe ti nen pugu nogo kuwak eeko logowak nduk, nappiya wagi ti o.

⁶Wone yi, liippogo logonip o. Aap ambit-ambi nen yabu mbuuluk waganogo yake kenok, mbi mbuuluk aret ndakkolage, ndi, ambi nen yabu nggwok aret waganogo yake kenok, mbi nggwok aret ndakkolage, eeko menggaarak me,

⁷it aakumi iniki ale'nggen paga kuwak eekwi iinok, Ala iniki kunik aganake menggerak me, kit kuwak eeko logonet, kiniki aaninggin kagak kuwak eekwi, kineebi mbakak kuwak eekwi, eeko logogup o. Ata, kinalitik-kinalitak kiniki koombunuk nen ale'nggen paga kuwak eeko logonip o.

⁸ “Ineenggilek iinok, amendek tumburiranet nage, Obeelom mban eeppiinet nage nogo kobak arigin lek, mondok aberak wonage, Eeke logogin o,” yinuk, liiru mbanak nogo ndak-ndak, kit kiniki ale'nggen paga kuwak eekwi kiinok, Ala iniki kunik en kit, “Ndi mendek uugwe,” mbarumonggotak kagak, mbaka'lek mendek ambinom kalo logonogo wokkirage logogin me, kit ambi mendek lek kenok uugwe mbarumunggup lek o. Ndi, aakumi inabuwa nen yeenggwaaroorak kunduk, wonage mban aret kogo logomunggup o.

¹⁰ It aap awi yaka nen yaruwak nduk awi pipuk eerogo pege, ndi, mbi eebe ndaruwak nduk kole eerogo pege, eeke menggerak Ala nogo nen kit kunduk, aakumi yeenggwaaroorak nduk, awi negen pipuk agago nggwok aret wokkirage, ndi, mbi eebe ndaruwok nduk, kole eerogo pege menggi kwak, aakumi inabuwa nen wogorogwe kiinok, Ala nen nggwok aret wokkirage, eeke logogin o.

¹¹Kiniki lek ndoobu logonet, aakumi wogoranet nugwi paga Ala nen kit kineenggi warak eeppinagage logogin o. Ndi, nit yokkirogwe konembunuk, kiniki ndoobu paga kuwak eekwi me, it aakumi ambik aret Ala, “Wa, wa,” yogo logogun o.

¹²Aakumi inabuwa mba'nuk, kuwak eerogo wogorogwe nogo ti, it Ala apuri aaninggin inoba wonage nogo, lek age, ndi, it aakumi apit nen Ala, “Wa!” yinuk, keyage wakwi, eerugun me, yeenggwaarogo logorak op aret o.

¹³Kit Keritut eeke nagagerak obeelom wone abet mba'nuk waganggwi kiigaarak nogo ndak-ndak eerit nugwi, ndi, kiniki lek ndoobu logonet, kinamendek it aakumi abok o Yureya mendek inom yeenggwaarogwe, eekwi paga, kinabut mbambunuk, “Ala apuri abet aret iigo,” yinuk, Ala endage tiyappogo logogun o.

¹⁴Ala iniki kunik en mondok alik negen eerogo pinagage kagak, kiniki ndoobu logonet kinamendek it aakumi yeenggwaarogwe kiinok, it aakumi iniki kunik eekkinako logonet, kinake tamban eeko logogun o.

¹⁵Ala ninabuwa nen mondok alik negen wo'niragagerak nogo mbininogo yuurak meek me, at mban, “Wa, wa,” yogo logowok o.