Read Western Dani Nggalatiya 1 Bible Online

Nggalatiya 1 - Western Dani bible

Nggalatiya 1

¹NGGALATIYA It aakumi nen mippanugwi, aap ambi iniki koombunuk, mippanege, eerulik o. Ata, at Yetut kambunuk nogo menggam nen eenik agago mippereegerak ninogoba Ala ninowe Yetut Keritut imbirak nen, nappiigak mendek agago mippaneegwaarak an Pawulut nogo nen, kit Ala apuri o Nggalatiya kuwak eerit nogo monggotak nogo, wone ambi yokkira o. Noreewi apit ninom wonogwe nogo nen keyage wakkinako o.

³Ninogoba Ala ninowe Yetut Keritut imbirak iniki kunik nen wokkirogwe, kiniki ugun tayenak ale'nggen logobagip nduk, eeppinagagwi, eeko logogun o.

⁴O yogondak yi paga, it aakumi nggween paga mendek nen maluk mban eerit nogo menggaarak nogo, ninom eekwi niyo, ndinogo wo'ninabikit nduk, at ninogoba Ala mbareegerak nogo ndak-ndak, nit maluk eekwi niinok, ninowe Yetut Keritut nen, “Inake kambikit o,” yinuk, ninake kambeegerak.

⁵At Ala nen eeppinaniyak kooneegerak paga Keritut ninake kambeegerak me, “Ala endage mondok-mondok tiyappogo logowok o,” yinuk, abet aret yokkiragi o. Amin!

⁶At Keritut kinabuwa mba'nuk kambeegerak nogo paga, Ala nen obeelom eerogo pinagakit nduk miikkinabeegerak nogo kagak mbo punuk, wone alik mendek ambi mbet-mbet woorak eekwi kiige nagarik, “Wi!” kirage agarik o.

⁷ Wone obeelom wone alik ambi inom wonage lek aret kwe, it aap ando nen Keritut eeke nagagerak obeelom wone nogo, “Abut laganuwok o,” yinuk, wone alik ambi inom nabenogo agan nugwi ti paga, kit kiniki naalop-kaalop eerogo pinagagwi iigirak me nduk, yokkiragi o.

⁸ Togop me, nit obeelom wone yaga ambi nen ilik, it mbogut paga nugu menggaarak malayikat ambi nen a, wone aa'nduk yokkirogogurak waganeegutak nogo kagak, alik ambi yokkira wogwe iinok ti, Ala nen pulunogo piyamenggerak aret kambuwak o.

⁹Kit aa'nduk obeelom wone waganeegutak nogo kagak, aap ambi nen wone alik mendek ambi wonok yokkira wage kenok, “At kugi pulu aago pogom logonet, kambuwak o,” yinuk, yokkirogo nogogurak nogo ndak-ndak yogondak ambinom yi aret yokkiragi o.

¹⁰An yokkirage ti, aakumi inikilom nombaruwak nduk ari ilik, Ala inikilom nombaruwak nduk ari a? Ndi, an aakumi nen tiyappanuwak nduk ari minggirak mbakop? Lek o. An aa'nduk aakumi inikilom mbaruwak nduk ari nagagirak nogo ndak-ndak ari logonetak en, yogondak an Keritut ayeloman logonetak lek o.

¹¹An wone obeelom wone yoranet nege minggirak nogo ti, it aakumi nen iniki koombunuk agan nugu menggaarak nogo mendek wagangge nagagirik, yoranet nege logolik o, yinuk, kineenu arubagip nduk yokkiragi o, noreewi.

¹²An yorage minggirak nogo ti, aakumi inoone yugu waganeegirak lek o. Ndi, it aap ambi nen mamunnereegwaarak paga agan nege minggirak kunduk lek mban. Ata, Yetut Keritut nen lalin negen eeppaneegerak paga yoranet nege minggirak o.

¹³ An it Yakuri inoone mugurok nage logonet, eerit nege nagagirak nogo, kit muk konenggo nogogutak o. Ala apuri kuwak eerit nogo menggaarak nogo, ambi teppiyoorak mbarulik abok aret lek eerogo piyaakit nduk, mondok tigiren-muguren nege nagagirak nogo kineenu o.

¹⁴ Nit Yakuri inoone mugurok nogo logonet, an ninom ndak-ndak ndarak noreewi ando we mbuuluk negen eekwi iigak, an perak nombomini eeko nogogwaarak nogo, niniki aganggen kerek togon mugurok nage logonet, mondok ndak-ndak aret eerit nage nagagirak nogo ti, kineenu mban o.

¹⁵ Togop tit eerit nage neegak kwe, nagalo inikime awo nda'naga'lek neegak, at nabuwa mba'nuk, mii'nake nagagerik, yonggo paneegerak Ala nogo nen

¹⁶it aakumi endekem konenggulik mendek an yoranet nage logokit nduk, at aput Yetut ni'neyoorak inikilom nomba'nuk, ni'neege mbareegi, “Yi nonggop ee'naki?” yinuk, it aakumi ambi nen yo'niruwak nduk, inowagam yora nage,

¹⁷ndi, an nappiigak awo mippangga'lek kagak, it inaa'nduk nappiigak mendek o Yerutalem wonogogwaarak nogo, inowagam yora nage, ti eerulik. Ata, an o Arap nagagirak time wonage nagagirik, peebi niyok paga o Ndamitik aret wagagirak.

¹⁸ Ti'nuk, tahun 3 eeppunuk, aap Kepat pekkaagin o Yerutalem nage nagagirik, nimbirak abet aret nogo 15 yereegirak kwe,

¹⁹it nappiigak ando ti, an nenegen abu iyoolik. Ninowe Yetut awuluk Yakobut nogo, alik mban nenegen kagagirak o.

²⁰An liiru mbanggirage yi nogo ti, pilit lek Ala enggaanom paga mondok abet aret mbanggiragi o.

²¹An aap Kepat nimbirak wonagagirik, ti'nuk, o Tiriya inom, Kilikiya inom, wage nagagirik, o nogome enaagan-ambokan nege neegak,

²²it Keritut apuri o Yureya kuwak eerit nogo menggaarak nogo nen, neebe inigen neyoolik kwe,

²³it aakumi nen yogo logonet, “Nit abet mbakwi wone nogo, aa'nduk at nen lek eerogo puurak nduk, ti'niren-mu'niren nege nagagerak nogo kwe, yogondak wone nogo aret woppunuk, yoranet nege agaarik o,” yinuk, yogwe konenggo nogogwaarik,

²⁴“Wi!” yinuk, an eeke nogo paga Ala endage tiyappogo nogogwaarak.