Read Western Dani Nggalatiya 2 Bible Online

Nggalatiya 2 - Western Dani bible

Nggalatiya 2

¹ Ti'nuk tahun 14 eeppunuk, an ne ambinom o Yerutalem naakit nduk, Ala nen lalin negen niniki koonogo panege mbareegi, aap Mbaranabat nimbirak nogo logonet, at Titut nogo waganggak nogogurak. Nogo nogogurik, wone obeelom wone it aakumi endekem konenggulik mendek yorage minggirak nogo, it ninoweewi inendage warak Ala apuri o Yerutalem unde menggaarak nogo, “Yorage neenok, it nen, Kat wone alik yorage menggendak keego, yinuk, yo'nugwi iinok, Yoranet nege nagagirak inom, yorage minggirak inom, we aanom warogo eeke nagagirak kagi,” yinuk, mbake neyo, nagabiti mbake logonet, it nogo mban inaa'nduk inalik aret paganogo yoragagirak.

³Nogo yorage nagagirik, at ninore ninom nogogurak Titut nogo, aap Yunani mendek me, it aap ando we piliret, “Nit kinoreewi aret o,” yinuk, ninenggela'me unggwi wogogwaarak nogo nen, “Agabolo mbaniyak,” mbakwi iyareegurak kwe, it ninoweewi nogo perak, “Mbaniyak,” yo'niraga'lek puk mban wonogwe iyareegurak. It aap ti, nit Keritut Yetut ninom kunik logonet, wondet agago pinaneegerak wone kologo logonet, Yakuri wone mbo pereegurak nogo, ambinom eeko logorak yilinogo pinanuwak nduk, unggwi wogogwaarak kwe,

⁵kit Ala abet aret ari menggerak wone obeelom wone waganeegutak nogo mban enaani porogo logonet, eerit nogo logobagip nduk, it eeriyak nduk unggwi wogogwaarak nogo, “Ambiriluk ambi eeruwok o,” yinuk, “E o.” yoroolik mbo piyareegurak.

⁶ Ndi, it ninoweewi inendage warak yagarak nogo ti, Ala nen ninetenggen maloppinaninuk, ambi yi, iya, ambi yi, meek, ninombakeelik me, an togon inendage ti paga iya mbakeelik kwe, it ninoweewi inendage warak me, it nogo nen, “Kat yorage menggendak ti, wone yi inom eeko logowak nduk yorage logot o,” yinuk, an yo'nugwi lek puk mban wonogwe iyareegirak.

⁷ Ala nen at Peterut it Yakuri mendek yorage logorak unde eeppereegerak kwak, an togon, it aakumi konenggulik mendek yorage logorak unde eeppaneegerak me, wone obeelom wone it aakumi inagabolo mbanak mendek Peterut nen yoranet nage kagak, Ala nen it eeppiyoorak mbareegerak nogo kokwak, an ndak-ndak obeelom wone it aap endekem konenggulik mendek yoranet nage neegak, it eeppiyoorak mbareegerak kogo nogogwaarik,

⁹it Ala apuri kuwak eerit nogwe pippiirogo menggaarak o Yerutalem wonogwe nogo, Yakobut kunduk, Peterut kunduk, Yaya kunduk, nogo nen Mbaranabat nimbirak yo'nirogo logonet, “Ala iniki kunik nen unde eeppinagareegerak me, op aret o. Kit aakumi endekem mendek yora nogwe, ndi, nit inagabolo mbanak mendek yorogwe, eeko logowok o,” yinuk, keyage warogo nappinaneegwaarak.

¹⁰ Nappinani wogo logonet, “It aakumi ineenggi lek tebenak wonogwe nogo, inabuwa mbako logonip o,” yinuk, ti mban yo'nirogo mbareegwa, an kunduk ti, niniki lunik logonet, eerit nage minggirak me, “Op aret yo'niraga o,” mbakak wogogurak.

¹¹Ti'nuk, peebi at Yakobut nen awuri nappiya wagagerak nogo, awo waga'lek iigak, at Peterut nogo nen o Andiyokiya wage nagagerik, aap endekem konenggulik mendek inom mbi ugun nengge nagagerak kwe, Yakobut nen nappiya wagagerak nogo, wogwe iige nagagerik perak, “It yi, inagabolo mbanggo menggaarak me, nonggop yo'neremengga?” yinuk, agabiti nen ogookkolagagerak ti, maluk aret eereegerak me, an nggwok paga enggali wappereegirak.

¹³Ti'nuk, it aap Yakuri mendek ando Ala apuri ogogwaarak nogo, Peterut iniki mbere eeke kogo nogogwaarik, it ndak-ndak ogookkologo mbareegwa, aap Mbaranabat kunduk, it Yakuri mendek iniki mbere ogwe iige nagagerik, “Ie! An nonggop eeri?” mbake nagagerik, Peterut inom aret nabennagagerak.

¹⁴Ndi, an togon Ala nen abet aret yereegerak obeelom wone yugu kagak alik eerit nugwi iige nagagirik, it apit inenggaanom paga Peterut yoge logonet, “Kat aap Yakuri mendek aret kwe, it Yakuri mendek eeko mengga kwak eeka'lek logonet, it endekem mendek eeko menggaarak nogo op aret eekendak kwe, yogondak it endekem mendek nen it Yakuri mendek eekwi kwak eeko logowak nduk, nonggop nduk mamunirage agandik o?” yinuk, enggali wappereegirak.

¹⁵ “It aap endekem konenggulik mendek ti maluk mendek o,” yogwe nogo, nit aap togoti mendek lek o. Nit aap Yakuri mendek abet aret nda'nogogurak kwe,

¹⁶ Ala nen wone Muta yoreegerak nogo ndak-ndak eekwi niinok, “Aap yi, oba lek o,” yinuk, obeelom agago pinanigin lek o. Ata, Keritut Yetut abet mbakwi nogo paga, “Aap yi, oba lek o,” yinuk, obeelom eeppinanege menggerak nineenu me, nit togon Keritut Yetut abet mbareegurak o. Wone Muta yoreegerak nogo eekwi paga, “Aap yi, oba lek o,” yinuk, obeelom agago piyaagin lek me, nit Yakuri mendek kunduk, obeelom agago pinanuwak nduk, wone Muta yoreegerak nogo eekwi lek o. Nit togon, Keritut abet mbareegurak aret o.

¹⁷Keritut niniki abet mbakwi paga, “Aap yi, oba lek o,” yinuk, nit obeelom agago pinanuwak nduk, eeko logonet, “It aakumi endekem mendek maluk eeko menggaarak ndak-ndak, nit eeko monggoorak kogo o,” yinuk, mbako logonet, “Keritut abet mbakwi wone nogo paga ninomaluk kenom agagerak me, Keritut ti maluk aret o,” yinuk, yuurak op mbakop? Mondok mage o, noreewi.

¹⁸An mbo pereegirak nogo waganogo obaane'me eeke neenok, it aakumi nen, “Op eeriyak kagak mbo pereegerak nogo ti, maluk aret eereegerak o,” yinuk, nombarugun lek mbakop? Togop aret nombarugun me,

¹⁹wone Muta yoreegerak kagak alik eereegirak paga noorogo paneegerak kambeegirak negen me, yogondak, “Yogop ee'nu, ndogop ee'nu,” yo'nege nogo, an koneniyak mondok meek o. An Ala ake mban neenik agarik o.

²⁰An Keritut nimbirak eyo karo-karo paga nabenogo paneegwaarak me, kambeegirak. Ndi, yogondak eerit nage minggirak nogo ti, an nomaawi paga lek o. Ata, Keritut omaawi eeppanege kagak eerit nage minggirak me, an nggween paga yime neegak, at Ala aput nabuwa mba'nuk, nake kambeegerak me, at abet mbake logonet, niniki at oba panggombunuk, eerit nage agarik o.

²¹Wone Muta yoreegerak nogo, nit eekwi paga, “Aap yi, oba lek o,” yinuk, obeelom eerogo pinaniyak op mba'netak en, Keritut we aanom warogo ninake kambeegerak mba'netak o. An mbo pereegirak nogo obaane'me eeke paga Ala iniki kunik en eeppinaniyak kooneegerak nogo, meek eerogo pukwak, an togop eerigin abu lek o, noreewi.