Read Western Dani Nggalatiya 3 Bible Online

Nggalatiya 3 - Western Dani bible

Nggalatiya 3

¹Kit Nggalatiya mendek yi wae. Yetut Keritut eyo karo-karo paga kambeegerak wone nogo, kumaarak lek mondok kin paga aret paganogo yokkirage nagagirak konenggo nogogutak kwe, yogondak ta nen kugi pulunogo pinagagerak kenok, kiniki lek kumili negen agan nugu ogotik?

²Kit wone onggo ambi yo'nirubagip nduk, yokkiraakit mbakirak nogo yi o. Wone Muta yoreegerak nogo, kit eerit nogo nogogutak paga Aberiniki waganeegutak ilik, obeelom wone konembunuk, abet mbareegutak paga waganeegutak a? Mbet yo'ninip nda!

³Kit kiniki ngget ndakkinabeegerak nogo ti, Aberiniki nen aret kwe, yogondak wone Muta yoreegerak nogo eerit nogwe paga, “Niniki kole eekkolaawok o,” yinuk, eeko ogotik ya? Kit kiniki lek wi negen aret eekwi kiigi o.

⁴Kit wone waganeegutak nogo paga mondok alik negen piyak-payak eerogo pinagagwi iigak, kiniki yanggonak logonet, waganggo nogogutak nogo ti, we aanom warogo waganggo nogogutak ya? An togop mbake lek o, noreewi.

⁵At Ala nen Aberiniki wokkirage, ndi, kinenggela'me eerubok mendek eeke, eeke menggerak nogo ti, kit wone Muta yoreegerak nogo ndak-ndak eekwi paga eeke menggerak ilik, obeelom wone konembunuk abet mba'nuk, waganeegutak nogo paga eeke menggerak a? Kit yinip nda!

⁶ “At Abarakam iniki Ala oba panggombunuk, abet mbake mbareegi, Ala nen, Aap yi, iniki koonak abu obeelom aret kagi o,” yinuk, yereegerak liiru mbanak nogo liippinip o.

⁷ Liiru mbanak ti ndak-ndak, it aakumi abet mbakwi nogo mban Abarakam ombowologwe wonogo menggaarak kogo o.

⁸ Obeelom wone awo kenom ari waga'lek kagak, at Ala nen, “Yi aakumi ndi aakumi o nggween paga yime abok aret kat paga inale'nggen kogo logogun o,” yinuk, Abarakam yoreegerak ti paga it aap Ala nen yorage kagak yoraga nen, “Aakumi endekem mendek abet mbakwi iinok, Ala nen, It yi, inoba lek o, yinuk, obeelom agago piyaagin,” yelok kaawak nduk, Abarakam yoreegerak me, yelok kogo nogogwaarik, liiru mbaneegwaarak.

⁹Togop me, at Abarakam abet mbake mbareegi, Ala ale'nggen at oba pereegerak nogo ndak-ndak, nit togon abet mbakwi niinok, Ala nen ale'nggen ninoba pinanigin aret o.

¹⁰ Ala nen ari logonet, “Aap ambi eeko logorak wone yugu liiru mbanak yi, porogo logonet, liirogon eeka'lek kenok, at pulinik aret logowak o,” yinuk, yereegerak liiru mbanak ndak-ndak it aakumi nen, “Nit obeelom agago pinanuwak nduk, wone Muta yoreegerak nogo ndak-ndak aret eerit nogo logowok o,” yinuk, wone ti paga iniki panggombunuk eeremenggaarak kwe, ndak-ndak eeriyak meek kenok, pulinik aret me, kambit nogo logogun aret kogo o.

¹¹ “It aap iniki abe koonak nogo perak, abet mbakwi ti paga, ineenik aret logogun o,” yinuk, yereegerak liiru mbanak ti paga, wone Muta yoreegerak ndak-ndak eekwi paga Ala nen, “Aap yi, oba lek o,” yinuk, obeelom eerogo piyaagin lek nineenu aret o.

¹² Eeko logorak wone yugu liiru mbanak panggombunuk, “Obeelom eerogo pinaniyak o,” yinuk, eekkoloorak wone ti, abet mbakwi paga ee'ninaburak wone ndak-ndak lek alom alik aret kagak kwe, “Eeko logorak wone nogo it mondok porogo logonet, liirogon eerit nugwi paga ineenik aret logogun o,” yinuk, liiru mbanak me, aap ambi wone ti, abu ndak-ndak eeke kenok, at abet aret eenik logogin o.

¹³ Ndi, Ala wone mbanak paga nen ari logonet, “Aap ambi warogo eebe eyo karo-karo paga tugunogo pugwi kenok ti, Ala nen pulunogo pege menggerak o,” yinuk, yereegerak liiru mbanak ndak-ndak, wone Muta yoreegerak kagak alik eeko nogogurak ti paga, nit togon kambuwok nduk, pulunik aret wonogogurak kwe, lek aruwak nduk, Keritut ninobaane'me pulunogo pege mbareegi, eyo karo-karo paga tugunogo pereegwaarak ti paga, ninonggo mbambunuk, wondet eerogo pinaneegerak wonogo ogoorik o.

¹⁴Ti eereegerak nogo ti, nit abok aret niniki abet mbakwi paga Ala nen “Aberiniki wokkiraagin o,” yinuk, abok yo'niragagerak nogo, waawok nduk, Ala nen, “Nale'nggen koba pagagin o,” yinuk, Abarakam yoreegerak nogo ti, Keritut Yetut eeremenggerak paga it aakumi endekem konenggulik mendek ninom niniki ale'nggen mbaruwok nduk, eereegerak kogo o.

¹⁵Noreewi o. Nit yogo monggoorak ambi wakkagak yuwok o. Nit aap nggween paga mendek aret kwe, aap ambi ninom wone mbambunuk, “Mondok ndogop eeruwok o,” yinuk, nineenggi amburu pugwi niinok, aap alik ambi nen wone ti, taganogo mbo pege, ndi, at alik ambi nen wone alik ambi inom nabenogo pege, eeriyak mondok meek aret kogo monggoorak nogo ndak-ndak,

¹⁶ at Abarakam ombowologwe inom peebi eeriyak wone Ala nen Abarakam yoge logonet, ombowologwe ineebe ambik kenok, “Kombowologwe o,” yinuk, ti yoroolik. Ata, eebe ambit Keritut aret me, “Kombooluk o,” yoreegerak.

¹⁷ At Ala nen Abarakam imbirak wone mondok abuk nggaruk togon mbaneegwaarak kagak, tahun empat ratus tiga puluh eeppunuk, wone Muta yoreegerak me, peebi yoreegerak nogo paga nen, aa'nduk yugu nogo awo eeka'lek kagak, lek eerogo puurak op mbakop? Meek me nduk, yokkiragi o, noreewi.

¹⁸ Ala nen eeppinaniyak Abarakam abok yoreegerak nogo, peebi wone Muta yoreegerak eekwi paga eeppinaniyak mba'netak en, aa'nduk at Abarakam ti, yo'netak lek kwe, iniki kunik eeke logonet, yoreegerak me, abet mbakwi niinok woorak nduk, yoreegerak kogo o.

¹⁹ Ti kenok, Ala nen wone Muta yoreegerak nogo ti, nonggop nduk yoreegerak mbakop? Lek o. Abet mbakwi paga woorak yoreegerak wone nogo, eebe kin ari waga'lek kagak, maluk aa'nduk kin kogo logowak nduk, wone Muta yoreegerak ti, inom nabenogo yoreegerak. Wone Muta yoreegerak nogo ti, Ala nen nok-nok aakumi Iterali yoroolik. Ata, it malayikat nen waganogo aap nggween paga mendek ambi yogo mbareegwa, at nen wonok aakumi yoragagerak.

²⁰ Aap mbere nen, “E o,” yinuk, eeko logowak nduk ambi yegetak wonok ambi yogak eeko menggaarak kwe, Abarakam yoreegerak nogo perak, Ala eebe ambit aret me, alik nen iniki koombunuk nggaruk togon, “Eerikit,” mbareegerak me, nok-nok Abarakam yoreegerak.

²¹Togop kenok, wone Muta yoreegerak inom, ndi, Abarakam abok yoreegerak wone inom, ti alom alitak mbakop? Mondok lek o, noreewi. Nit nineenik logorak nduk, wone yugu alom alik ambi logonetak en, wone ti woppunuk eekwi paga Ala nen, “Aap yi, iniki abe koonak aret o,” yinuk, yo'nirage logonetak kwe,

²² lek me, Ala nen eeppinaniyak yoreegerak nogo, nit niniki Yetut Keritut abet mbakwi paga eeppinanuwak nduk, tokkogo logonet, “It yi aakumi ndi aakumi abok aret maluk eeko menggaarak paga wam anggenogona narak negen wonogwe,” mbaruwak nduk, Ala nen yereegerak liiru mbanak wonage.

²³Nit abet mbakwi paga woorak yugu nogo, wage kenok, “Abet mba'nuk, waganggo logowak o,” yinuk, awo kin ari waga'lek kagak, wone Muta yoreegerak paga, wam anggenogona nappiigo mengga kwak narogo pinaninuk wonagagerak.

²⁴Togop me, Keritut wage kenok, “Kit abet mbakwi paga, kinoba lek o, yinuk, obeelom agago pinagarak,” yo'niraawak nduk, wone Muta yoreegerak nogo nen we luulu aret ninarum wonagagerak kwe,

²⁵niniki abet mbakwi paga woorak nogo, muk kin ari wagagerak me, yogondak wone Muta yoreegerak nogo ninarum wonogwe lek o.

²⁶Kit abok Keritut Yetut abet mba'nuk, kiniki at oba panggombereegutak me, kit Ala apuri aret ogotik o.

²⁷Keritut kinom kumbinagage mbareegi, yiime wambeegutak me, Keritut obaabut ndak-ndak aret ogogutak o.

²⁸ Kinobaabut ambit Keritut mendek ogogutak me, yi Yakuri mendek yi Yunani mendek, yi aap inayeloman aago mendek, yi aap inayeloman aago lek mendek, yi aap yi kwe, togop yuurak mondok lek aret o. Nit abok Keritut Yetut ninom kunik me, nineebe ambit aret ogoorik o.

²⁹ Ndi, nit Keritut apuri abet aret wonogwe kenok, Abarakam ombowologwe aret me, wone abok yoreegerak nogo, nit aret woorak nduk ogoorik o.