Read Western Dani Epetut 2 Bible Online

Epetut 2 - Western Dani bible

Epetut 2

¹ Kit o maan aa'nduk nen it aap nggween paga mendek iniki nengge kenok mugurok nogo mengga kwak mugurok nogwe, it yi kugi ndi kugi mbogut abu'na o oolo yayi menggaarak inowe aakumi Ala wone taganggwi iinok iniki nggagangge menggerak nogo nen, yokkirage kenok konenggwi, eerit nogo logonet, Ala wone taganogo punuk, yi maluk ndi maluk eeko nogogutak paga kambak kwak aret wonogogutak o.

³It Ala wone taganogo punuk, maluk eeko nogogwaarak paga Ala anini inoba piyoorak wonogogwaarak nogo ndak-ndak, nit kunduk, togop aret niniki maan mendek nen yo'nirage kagak niniki nengge kenok mugurok nogwe, maluk eeriyak ee'ninake kenok eerit nogwe, maluk eeriyak mban koonit nugwi, eeko nogogurak paga Ala anini mondok ninoba pinaniyak aret wonogogurak kwe,

⁴at Ala nogo nen aakumi maluk eekwi iinok, anini nen mbet-mbet inookeelik mondok inabuwa lombok mbake logonet, yanggo yinuk, torinake menggerak me, nit abok aret yi maluk ndi maluk eerit nogo nogogurak paga kambak kwak aret wonogwe niigak, Ala ninabuwa mbake nagagerik, Keritut eenik eeppege logonet, nit kunduk ninom aret nineenik eeppinaneegerak. Ala ninabuwa nen iniki kunik ee'nabeegerak ti paga ninagap ndareegerak kogo o.

⁶Ndi, at Keritut ninom kunik wonogwe niinok, Ala nen at ninom nineenik agago mippinanege nagagerik, Keritut Yetut tiyanak mbogut paga wonage nogo ninom ndak-ndak logowok nduk, tiyappinaneegerak.

⁷Ti eeppinaneegerak nogo ti, ninabuwa mbake logonet, Keritut Yetut wo'niragagerak ti paga, o yogondak wonage inom, peebi logorak inom, at aakumi abok aret iniki kunik nen oba ngginik kagak ngginu-ngginu eerogo wogorage menggerak nogo, mondok-mondok nineenu logowok nduk, eeppinaneegerak.

⁸Kit abet mba'nuk, kiniki at oba panggombugwi kiinok, kinabuwa nen iniki kunik eekkinake logonet, kinagap ndareegerak o. Kit ambi eekkologogutak paga eeppinagulik o. Ata, Ala nen onggo lek we aret eeppinagareegerak o.

⁹Kit nen ambi eekkologwe paga wogoppakwi kiyo, at nen mban onggo lek we aret eeppinagareegerak.

¹⁰Ala nen aret ogobakkigi'ninabeegerak me, nit at amendek aret ogoorik o. Nit nda'naga'lek niigak obeelom eerit nogo logorak Ala nen maan kooneegerak nogo, Keritut Yetut ninom kunik logonet eerit nogo logowok nduk, ogobakkigi'ninabeegerak.

¹¹Togop me, noreewi o. It, “Nit ninagabolo mbanak mendek o,” yogo menggaarak nogo nen, “Kit kinagabolo mbanak lek mendek o,” yinuk, yokkirogo menggaarak kit endekem konenggulik mendek nda'nogogutak nogo, aa'nduk wonogogutak kiniki abeko logonip o. “Ninagabolo mbanak o,” yogo menggaarak nogo ti, aakumi nen mbanak aret o.

¹²Nogo ne ti eyom paga, it aakumi Iterali mendek mban Ala apuri leenak wonogwe iigak, kit Keritut kinom ogoorak logonet, we aakumi nggiru negen aret wonogogutak me, at apuri iinok, wone abok yoragagerak nogo, kit koloorak meek aret wonogogutak. Kit aa'nduk kinogoba Ala lek me, kiniki lunik ambi lek

¹³o nda negen aret wonogogutak kwe, Keritut amiya paga Ala kinom lambunogo pinagi wagagerak me, yogondak Keritut Yetut kinom kunik aret wonogo ogotik o.

¹⁴Nit aap Yakuri mendek inom, kit endekem mendek inom, at Keritut eebe paga paalungga negen warogo nineebe ambit lambumbinanege logonet, wim pak wurik pogom ninom ogoorak aret wonogogurak nogo, minogo mbo nappege,

¹⁵ ndi, nit aap ninanebunu mbere wonogogurak nogo, at eebe paga at apuri ninanebunu ambit a'nuk, ninom niniki lambunik logowok nduk, Ala nen, “Yogop ee'nu, ndogop ee'nu,” yinuk, wone Muta yoreegerak nogo paga ninom ogoorak wonogogurak nogo kunduk, lek eerogo pege, eereegerak.

¹⁶ Ti eeke nagagerik, Keritut eyo karo-karo paga kambeegerak ti paga ninom ogoorak wonogogurak nogo, lek eerogo punuk, nineebe ambit lambumbinanege nagagerik, kit ninom lambunik logowok nduk, Ala abu'me pinani wagagerak.

¹⁷ Kit nda negen wonogogutak inom, nit koorok wonogogurak nogo inom, “Paalungga muk warak me, lambuninip o,” yinuk, yo'nira wagagerak.

¹⁸Ndi, yogondak Keritut eereegerak ti paga, nit Yakuri mendek inom, kit endekem mendek inom, Aberiniki ambit nogo paga nen nit wo'niren ninogoba Ala owagam noorak op aret o.

¹⁹Ti kenok noreewi o. Yogondak kit aap nggiru alik mendek wonogwe lek o. Kit ninom ndak-ndak Ala apuri aret me, mbogut paga ninaworak aret ogoorik o.

²⁰O wuruwok nduk, o eyak aa'nduk wurabak kwak ti, Keritut Yetut aret o. Ndi, o eebe wurit laganggo logonet, abena pugu kwak ti, it nappiyareegerak mendek inom, it aap Ala wone yoraga mendek inom, nogo it aret. Ndi, ogumbaga pugwi kwak ti, nit abet mbareegurak Ala apuri nit nineebe aret o.

²¹Ala nen at awi mondok alik leenak obeelom lombok wukkolaakit nduk, nit nineebe alitik-alitak nogo, waganogo ninowe Keritut Yetut eebe ambit nogo paga panggombunuk, oba lu'luk wurit lagangge logonet,

²²kit togon, Ala eebe negen Aberiniki kinom logobagip nduk, kit kineebe nogo waganogo Keritut oba panggombinaganuk, at awi negen aret wukkolage agaarik o.