Read Western Dani Pilipi 4 Bible Online

Pilipi 4 - Western Dani bible

Pilipi 4

¹Togop me. noreewi o. Kit an niniki abu kunik me, kinoba mondok aberak mban wonage o. An nanggare-nggare mendaarak inom, niniki ale'nggen mbake inom, ti, kit kineebe aret me, ninowe kinom kunik logonet, wone ti mondok nu'lek porogo logonip o. Ai, noreewi niniki kunik wa!

²Kit kumi Ewuworiya kunduk, Tinitike kunduk, kimbirak ninowe kinom kiniki kunik logonet, kiniki ambit lambunik logobagip nduk, noone yanggorogon yokkiragi o.

³Ndi, kat nore Tundogot nimbirak Ala eyabu ndak-ndak eeke menggendak me, it kumi ti, obeelom wone wigak yuwak nduk, nggwiirit-nggwaarit eeko nogogwaarak me, yeenggwaarage logot o. Ndi, aap Kelemen kunduk, it an noreewi ando inendage mbuku ineenik aganaka paga mbanak wonage nogo kunduk, togop aret ninom eeko nogogurak me, inom yeenggwaarage logot o.

⁴“Ninowe kinom kunik logonet, kiniki ale'nggen mban mbako logonip o,” yinuk, ne mbere paga yokkiragi o, noreewi.

⁵Ninowe woroorak abu panggo yegerak me, it aakumi abok nen, “Iniki abe paga aakumi obeelom eeppiinet nugwi iigo o,” yinuk, kinombaruwak nduk, eerit nogo logonip o.

⁶Aaninggin nano mendek ambi kinoba age kenok, kiniki piirik logogup o. Ata, “Aaninggin ndogop noba agaarak o,” yinuk, tamban eekwi, ndi, kinamendek ambi lek kenok, wokkiraawak nduk, “Ala wa,” yinuk, nggino yogwi, eeko logonip o.

⁷Ti eekwi kiinok, niniki piirik lek ugun tayenak ale'nggen logowok nduk, eeppinanege menggerak alom nit kin kaga'lek niigak kwe, eeppinanegak mban eeke menggerak Ala nogo nen, Keritut Yetut kinom kiniki kunik me, kineebe-kiniki abok aret liirogon kinarum logogin o.

⁸Noreewi o. Wone irip paga ambiriluk yi, yokkira o. Wone abet mban agan nugwi, iya eeriyak kenok mban eerit nugwi, a'me nggelok mban eeppiinet nugwi, kumi inabok yaga'lek wonogwe, kinoone abe kigirikwe mban agan nugwi, “Wone abe yigi,” yuwak nduk agan nugwi, eekwi ti mendek abok aret eekwi kiinok, aakumi nen, “Yi abu obeelom aret eekwi iigo o,” yinuk, tiyappogo logorak aret me, ti mendek mban eeko logobagip nduk, kiniki koonggo logonip o.

⁹An wone mamunggirage neegak, waganggo nogogutak inom, ari neegak kinaruk konenggo nogogutak inom, eeke neegak kinigen neego nogogutak inom, nogo abok aret eerit nogo logonip o. Ndi, niniki ugun tayenak ale'nggen logowok nduk, eeppinanege menggerak Ala nogo nen kinarum aret logogin o.

¹⁰Aa'nduk noba kiniki abe'naka'lek wonogogutak kwe, yogondak iluk kiniki abe'nakwi kiige nagarik, nowe nimbirak kunik logonet, niniki ale'nggen ambik mbake agarik o. Aa'nduk we noba aberak wonogogutak kwe, yeenggwaaniriyak eyom awo aga'lek kenok, puk wonogogutak me nduk yokkiragi o, noreewi.

¹¹An yi mendek ndi mendek abok aret noba age kagak, niniki ugun tayenak logorak mamunggolagagirak me, an namendek lek kenok, “Ambi wo'negabok eekaarak ao,” yinuk, yokkirage lek o.

¹²An namendek lek kenok, wonage kenok, ti neenu aret o. An mbi ndonggoppanege, abu ee'nake, ti neenu mban. Ndi, namendek ka'let age, namendek lek age, yi mendek ndi mendek op-maluk abok aret noba age nogo kagak niniki ugun tayenak logorak mamunggolagagirak.

¹³Keritut nimbirak kunik logonet, omaawi eeppanege kagak, an yi eekak ndi eekak abok eeriyak op aret kage minggirak o.

¹⁴Op aret eeriyak kage neegak kwe, an aaninggin noba age mbareegi, kit nen yeenggwaanereegutak me, “Wa,” yokkiragi o.

¹⁵ Kit Pilipi mendek yi wae. An maan aa'nduk obeelom wone yi awi ndi awi yoranet nage logokit nduk, o Makendoniya mbo punuk o alik me nage neegak, Ala apuri kuwak eerit nogo monggoorak kenok ti, yeenggwa-yeenggwa eeko monggoorak kwe, it abok aret puk iigak, kit Ala apuri o Pilipi nen mban yeenggwaanereegutak nogo kineenu aret o.

¹⁶An o Tetalonika wonage neegak, kit nen ne mbere paga yeenggwaanereegutak nogo kunduk aberak aret wonage o.

¹⁷Kinamendek ambi wo'nirubagip nduk, an nggino yokkiraga'lek neegak, wo'nereegutak waganeegirak nogo ti, Ala nen peebi onggo nggwok wokkiraawak nduk, eyo anggen yi'nage menggi kwak, kit togop aret anggen nggwok yikkologwe kiyaakit nduk, waganeegirak o.

¹⁸ Kit nappani wogogutak nogo, abok aret waganeegirak me, lek aga'lek wonage aret o. Ala ake pugu kani kunggwi obari obeelom kenok Ala nen, “Op wo'nega o,” yinuk, iniki ale'nggen mbake menggi kwak, kit an nake pugu aap Epapororitut nen wo'niruwak nduk nappi wogogutak nogo, wonok niri wage mbareegi, wagangge nagagirik, ndiinik-piinik agago pereegirak lek aga'lek wonage aret o.

¹⁹Nit eeriyak ambi mendek lek age kenok, Keritut Yetut eereegerak paga at Ala nen oona ngginik kagak wo'nirage logogin o.

²⁰“Ninogoba Ala endage mondok-mondok tiyappogo logowok o,” yinuk, abet aret yokkiragi o. Amin.

²¹Ala apuri ake leenak Keritut Yetut kinom kiniki kunik wonogwe nogo abok aret keyage wappiigo logonip o. Ndi, an noreewi ninom yime wonogwe nogo nen keyage wappinagaga o.

²²Ala apuri ake leenak o yime wonogwe abok nen keyage wappinagagwi iigak, it Kayitat apuri logorogon nen kunduk, keyage wappinagaga mban o.

²³Ninowe Yetut Keritut iniki kunik en eeppinagage logonet, kinarum aret logogin o. An Pawulut Timotiyut nimbirak nen abu aret yokkirogo o. Wa.