Read Western Dani Kolote 2 Bible Online

Kolote 2 - Western Dani bible

Kolote 2

¹It Laworikiya mendek inom, it ando an neebe ineenggo'lek inom, kinom abok aret obeelom mban eeko logobagip nduk, aaninggin tit kagak kwe, kinake nggwiirit-nggwaarit eeke minggirak nogo, kineenu arubagip nduk, yokkiragi o.

²Kit abok kiniki ambit a'nuk, niniki-kiniki kunik eekkologo logonet, Ala wone kote kumaarak wonagagerak nogo ti, Keritut aret me, at eebe liirogon kineenu ogo logomonggotik, “Peebi ndogop eeppinanigin o,” yinuk, yugu nogo abok aret kineenu me, kinagabiti nen kiniki yungguppegak eeka'lek kiniki ale'nggen lombok logobagip nduk, kinake eeke minggirak.

³ Ala iniki warak nen mondok liippinaninuk, eeppinaniyak alom inom, yi wone ndi wone nineenu ariyak alom inom, kumaarak wonage nogo, kin kaawok nduk, tu paake menggerak kunci nogo ti, Keritut eebe aret o.

⁴It aakumi inoone amburu ndik-ndik agan wogo logonet, nomonggiren tu alik paga nogwe iyo, wone ti yokkirage agarik o.

⁵An neebe kinom time wonage lek kwe, niniki perak, kinom aret wonage me, kit kiniki Keritut oba panggombunuk, abet mbareegutak nogo nu'lek porogo logonet, mondok ndak-ndak eerit nogwe kiinok, an niniki mondok ale'nggen mbake agarik o.

⁶Kit aa'nduk nen, “Keritut Yetut ti, nit ninowe aret o,” yinuk, waganeegutak me, yogondak at kinom kunik logonet, yokkirage nogo konembunuk, mondok ndak-ndak aret eerit nogo logonip o.

⁷Eyo omanggen nggween me yarak nu'lek logonet, mondok mili kwit agan lagangge menggi kwak, kit togop aret Keritut paga kinomanggen yarak logonet, kiniki kole ogwe, ndi, abet mbareegutak nogo nu'lek porogo logobagip nduk mamunggirogogwaarak nogo, ndak-ndak porogo wonogwe, eekkologo logonet, kiniki mondok aganggen kekererak lagi wage logonet, Ala, “Wa!” yogo logonip o.

⁸It aakumi ambi eeppiyoorak lek kagak we inambokan laganuwok nduk, iniki koonogo yorogo menggaarak nogo ti, Keritut wone lek o. Ti, it inombomini wandek inom, it kugi inayuk wuko menggaarak nogo inom, inoone mamunik aret agan nugwi me, keele maarak negen it inabu'me logonet, inoone mban konenggo logobagip nduk, kit kinambokan laganggwi iyo, tum wakkologo logonip o.

⁹At Ala eebe itok li'luk aago menggerak nogo abok aret, Keritut oba lenggenak logonet, aakumi aret nda'nage nagagerik, nege nagagerak.

¹⁰Ndi, kit Keritut kinom kunik wonogwe me, at Ala eebe li'luk aago menggerak nogo, kit kunduk kinoba li'luk agago pinagareegerak wonogwe me, alik ambi inom eeppinagarak mondok lek aret o. It wone lenggangga inom, inayuk warak inom, o oolo yayi menggaarak abok aret Keritut abu'me logonet, at oone mban aret konenggo menggaarak.

¹¹Ndi, at kinom kunik logonet, kinagabolo mbanogo pinagareegerak negen aret ogotik o. Ti eereegerak nogo ti, it aakumi nen eekkinabulik o. Ata, aakumi inagabolo mbanogo piigo mengga kwak, kit maluk eeriyak mban eekkinake menggerak alom nogo, at Keritut nen muk omaawi lek eerogo tebembereegerak me nduk, yokkiragi o.

¹² Keritut kinom kunik logonet, kambunuk ndoome mambiigo menggam nen kinom kineenik agago mippinagareegerak nogo kwak, yiime wanggo nogogutik, lagi wogogutak nogo o. Kit kambunuk ndoome mambiigo menggam negen wonogwe me, Ala nen Keritut kambunuk nogo menggam nen at omaawi paga eenik agago mippereegerak me, “At omaawi ti paga at ninom nineenik agago mippinanigin kogo o,” yinuk, abet mbareegutak paga kineenik agago mippinagareegerak wonogo ogotik o.

¹³ It aakumi inagabolo mbanogo nappogo mengga kwak, kiniki maan mendek nen maluk eeriyak eekkinake alom nogo omaawi awo lek eerogo pega'lek logonet, yi maluk ndi maluk eerit nogo nogogutak paga kambak kwak aret wonogogutak kwe, “Yogop ee'nu, ndogop ee'nu,” wone yugu liiru mbanak ndak-ndak nit eeka'lek niinok, Ala nen, “Maluk onggo ndogop eeppiyaakit o,” mba'nuk, eenggi lingginogo liiru mbaneegerak aaninggin kinoba wonagagerak nogo, “Mondok mbo pikit o,” yinuk, liiru mbanak nogo Keritut inom eyo karo-karo paga nabenogo punuk, kinomaluk tigitogon lek eerogo pege nagagerik, Keritut kinom kineenik agago mippinagareegerak.

¹⁵Ti eereegerak nogo ti, it wim nambuppunuk, “Nit nineegin tiyak yigi o,” yinuk, “Wi!” iraawak nduk, aakumi ineebe kugun wogoren wogo mengga kwak, at Keritut nen, “An neegin tiyak yegerak neyaawak o,” yinuk, at Tile inom, at awuri yi kugi ndi kugi inom, abok aret inomaawi lek eerogo piinok, inenggali aruwak nduk, ineebe nggwok paga o oolo yayi wogoren nege nagagerak.

¹⁶ Togop me noreewi o. Kit yi mendek ndi mendek nunggwi, Ala wone yugu mugurok laago lakwi, tut ambi penengge kenok lakwi, nogo 6 yippunuk, ko'lu yonggonggologwe paga eekwi, eekwi kiinok, it iniki ugun koombunuk, “Ambi yi maluk kagak eekotak o,” yinuk, yokkiroorak ti abu lek o.

¹⁷Ti eekwi nogo ti, peebi abe eeppinaniyak we ogut negen eeko nogogwaarak nogo, eebe muk eeppinaneegerak kagak eekwi me, tiyappugup o. Yogondak niniki ale'nggen eeppinaniyak eebe nogo ti, Keritut aret me, at mban tiyappogo logonip o.

¹⁸It aakumi nggween paga mendek mban iniki koonit nogo menggaarak nogo nen, it aap iya lek kagak iniki wogoppako logonet, “Nabinggaanggo paga wone yo'nege menggerak me, an iya o,” yinuk, inabi kagaatak mbinuk-mbenak agan wogo logonet, inoone omaawi paga, “Malayikat inalut eeko logonip o,” yinuk, yokkirogwe, ndi, iniki tebenak nege mbaruwak nduk, inagabiti nggo-nggo nugwi, eerit nogwe nogo, kit liippugwi kiinok, Ala nen wokkiroorak kiniki ale'nggen mbakwi nogo, lek eerogo pakwi kiyo, inoone konenggo logogup o.

¹⁹ Ninomanggen ambit paga nineenggi-niniyok yeregerak-peregerak abok aret ninanobak inom yinik-kunik aago logonet, nineebe tawe ogo monggo kwak, nit ninanobak Keritut ninom togop aret kunik me, at Ala nen, “Keritut eebe wigak yuwak,” mba'nuk, ee'ninake menggerak nogo kagak, it aakumi ti, iniki wogoppako logonet, inanobak Keritut nogo mbo punuk, inom kunik lek ugun nugwi me, inoone konenggo logogup o.

²⁰Kit Keritut kinom kunik logonet, kanggo mbareegup, yi kugi ndi kugi inayuk wuko logonet, inoone konenggo nogogutak nogo tebembiinok, wondet eerogo pinagareegerak kagak, nonggop nduk, wondet eerogo pinagulik inoone awo konenggwi negen eekko'net nogo ogotik?

²¹It aap ti nen, “Yogop ee'nu ndogop ee'nu,” yogo logonet, “Ti mbaanggoorak mage o. Ti noorak mage o. Ti pigoorak mage o,” yinuk, yokkirogwe nogo, nonggop nduk, “Yi abet aret yo'nirogwe iigo o,” yinuk, inoone konenggo ogotik?

²²“Ti noorak mage,” yokkirogwe nogo ti, nit nonggo nogootik, muk lek age menggerak mendek kagak nonggop nduk yogo agaarik? It agan nugwi nogo ti, aakumi iniki koombunuk, “Yogop eeriyak mage, ndogop eeriyak mage,” yinuk, wone mamunik aret yokkirogo agaarik o.

²³Inoone omaawi paga, “Malayikat alut eeko logonip o,” yinuk, yokkirogwe, iniki tebenak nege mbaruwak nduk, inagabiti nggo-nggo nugwi, ndi, “Aap yi, iya,” inombaruwak nduk, inagabolo paga andi-pandi eerogo pakwi, eerit nugwi iinok, “Yi iniki warak nen eekwi,” mbarumonggotak kwe, wone ti waganggwi paga kiniki nengge mugurok noorak eekkinake nogo ti, tebenogo pogo logorak eekkinabigin lek me, mugurok nogo logogup o.