Read Western Dani 1 Tetalonika 2 Bible Online

1 Tetalonika 2 - Western Dani bible

1 Tetalonika 2

¹Noreewi o. Nit we aanom warogo kiya woroolik nogo ti, kit kineenu aret o.

² Nit o Pilipi wonogwe niigak, aaninggin-paaninggin ninoba pinanugwi, miyuk-meya eerogo pinanugwi, eereegwaarak kineenu nogo kwe, kagak, Ala nen yo'niragagerak wone obeelom wone nogo it apit aret, “Nineebi o,” yogwe iigak, Ala yeenggwa nirage me, ninagabiti mbaka'lek yokkirogo nogogurak nogo o.

³Nit kinaruk wako logonet, yokkirogo monggoorak nogo ti, nit nineenggo'lek logonet yokkirogwe, nit ambi kolaawok nduk yokkirogwe, kinambokan laganuwok nduk, pilit wone yokkirogwe, eekulik o.

⁴Ala nen ninabut mbambunuk, obeelom wone unde eeppinaneegerak nogo ndak-ndak aret yokkirogo monggoorak. Kit kinikilom mbarubagip nduk yokkirogwe lek o. Ata, at niniki lombonninake menggerak Ala nogo inikilom mbaruwak nduk, yokkirogo monggoorak.

⁵Niniki laakot logonet, ninoone yokkirogo logolik ti, kineenu aret o. Kit kinageerok ambi kolaawok nduk, ninoone, “Ai-ao,” yogwe ti, at Ala eenu me, yuulik mban.

⁶Ndi, Keritut ayonggo nugu logowok nduk nappiigak agago pinaneegerak me, ninoone omaawi yokkiroorak op aret kwe, kit inom, it aakumi alik inom, nit ninendage tiyappinanuwak nduk, woroolik o. Ata, kwe ambi at aagaluk abuwa nen ogome lamoppunuk oone yanggorogon yoge menggi kwak, nit kinenggela'me logonet, togop aret ninoone yanggorogon aret yokkirogo nogogurak nogo o.

⁸Kinabuwa lombok mbako logonet, kit niniki kunik eekkinabeegurak me, obeelom wone ti mban yokkiroorak mbarulik o. Ata, kinake lombok kambuurak kenok perak, op aret mbareegurak.

⁹Noreewi o. Nit eerit mban nogo logonet, ndeyak eerogo pinaneegerak nogo ti, kiniki abe'nip o. Ala nen yo'niragagerak wone obeelom wone nogo yokkirogo logonet, “Kit mban ambinom aaninggin kinoba pinagukwak,” mba'nuk, nit nen liingge inom, oonikiya inom, eekko'net nogo nogogurak nogo o.

¹⁰Kit abet mbareegutak nogo nit kinenggela'me logonet, Ala wone liippunuk eekwi, ndi, maluk eeka'lek abu obeelom eereegurak paga kinoone ambi ninoba pinanega'lek wonogwe, eerit nogogurak nogo ti, Ala niige, kit kunduk niigwi, eereegutak o.

¹¹Ala mondok tiyanak logonet, “Kit tiyappinagakit nduk, nabu'me woraanip o,” yinuk, ayonggo pinagareegerak nogo, iniki mbake ndak-ndak eerit nogo logobagip nduk, aap ambi apuri kenok yorage nogo kokwak, nit togop aret niniki aganggen kerek togon kit kinalitak lombok kinaruk wakwi, kiniki eyak wappinagagwi, kini wuppinagagwi, eeko nogogurak nogo kineenu aret o.

¹³Togop me, Ala wone yokkirogogurak konenggo logonet, “Yi we aakumi inoone lek o. Yi Ala wone nit abet mbakwi ninikime koonninake menggerak wone abet aret o,” yinuk, waganeegutak me, nit puk aga'lek kulinik-kalinik, “Ala wa,” yogo monggoorak.

¹⁴ Noreewi o. It aap Yakuri nogo nen it Ala yorage kagak yoraga nogo inookwi, ninowe Yetut warogo pugwi, ndi, nit kunduk mugogo nappinanugwi, eeko nogogwaarak nogo nen it Ala apuri Keritut Yetut inom kunik logonet, o Yureya yi awi ndi awi kuwak eerit nogo menggaarak piyaginabit nogo nogogwaarak nogo ndak-ndak, it kinowe-kinawot nen kit togop aret eeppinagagwi iigak kinogogumbuk logonet, waganeegutak me, it inogogumbuk logonet, waganggo nogogwaarak ndak-ndak, kit togop aret waganggwi kiigi o. It Yakuri eereegwaarak nogo ti, it aakumi abok ineebi mbako logonet, inom ogoorak wonogwe me, Ala kunduk, inikilom inombakeelik mondok eebi inombake menggerak o.

¹⁶ It aakumi endekem mendek Ala nen inagap ndariyak wone, “Kit yorogo logorak lek o,” yinuk, non mbambinanogo menggaarak me, it maluk ambi nabek mban eerit wogoga, wogoga, “Ti kuli ari nawak,” koonak nogo paga ari nage kenok Ala anini inoba piige menggerak nogo ndak-ndak, yogondak anini mondok it inoba piige agaarik o.

¹⁷ Ndi, noreewi o. Nit perak, niniki kinoba aberak mban wonogwe kwe, ne ambiriluk nineebe alitak wonogogurak me, mbet-mbet pekkiya woroorak, “Ao,” lombok mbako logonet, wakkagak mban eereegurak kwe, meek aret agagerak o.

¹⁸ Noreewi ninom pekkiya woroorak mbakwi, ndi, an nalik ne ambit paga lek o. Ata, kulinik-kalinik pekkiya woroorak mbake, eereegurak kwe, Ibilit nen non mbanogo pinanege kenok, wonogo ogoorik o.

¹⁹ Nit niniki lunik inom, niniki ale'nggen mbakwi inom, obeelom eekwi niinok nggare-nggare mendaarak yippinanege kenok, wogoppatiyak nogo inom, ti taamini mbakop? Lek o. Nit ninowe Yetut wage kenok eeppinaniyak nogo ti, kit abet mba'nuk eerit nugwi paga aret o.

²⁰Nit tiyappinanugwi, niniki ale'nggen eerogo pinanugwi, eeriyak ti, kit kineebe paga aret o.