Read Western Dani Yotuwa 1 Bible Online

Yotuwa 1 - Western Dani bible

Yotuwa 1

¹YOTUWA WONE At Aliku ALA ayeloman Muta nogo kangge mbareegi, Aliku ALA nen Muta yeenggwaagak aap Nun apuluk Yotuwa nogo yoge logonet,

²“An nayeloman Muta nogo abu aret kanggerak me, it Iterali inanggween wogoraawam nogome yi Yoraran enebaga wunda nanuk, unggwi namunggup nduk, kat inom, it aakumi yi inom, abok aret pipuk eeko logonip o.

³ An nen Muta yoreegirak nogo ndak-ndak kat nen yi awi ndi awi kiyok pit namenggendak nogo abok aret wokkirigin o.

⁴O karume inom, puut Libanon inom, panggombunuk, arunggwe niyo kole endage Eparat nen, nok-nok aakumi Ket wonogwe me nen, nok-nok yi kole yenggenak laut oonegen kilu yi nage menggim pa'nggwe ti kuli abok aret kit kinanggween arigin o.

⁵ An teppagage, eraangge mbo paganuk mbagangge, eerigin lek at Muta nimbirak wonagagirak nogo pogom kat nimbirak mondok aret logogun me, kat keenik wonage keegak, aap ambi nen tebenogo pagagin mondok lek o.

⁶ Kinombomini nggween wogoroorak wone abuk nggaruk togon kumbuk mbanogo yoragagirak nogome aret ineyate kwak unde a'nuk logowak nduk, kat nen aakumi Iterali yi, wogoren wunda namunggun me, kat kogogumbuk kiniki mondok nu'lek eeppatinuk, logot o.

⁷Kat eerit nage nogo abe mban arit nage kaanok nduk, kena agigan agak, ogugan agak, eerugun o. Ata, kogogumbuk kiniki mondok nu'lek eeppatinuk logonet, eeko logorak wone yugu nayeloman Muta liiru mbanogo wokkireegerak nogo abok ndak-ndak liirogon aret eerit nage logot o.

⁸Eeko logorak wone yugu mbuku paga liiru mbanak yi, kat nen aakumi yoroorak ti, Neebi o, yinuk, mbo pugun o. Ata, mbuku yi paga yi wone ndi wone liiru mbanak wonage abok aret kat mondok ndak-ndak liirogon aret eerit nage logonok nduk, liingge-kiyoma mondok aberit nage logot o. Ti eeke keenok, yi mendek ndi mendek eerit namenggendak nogo a'me nggelok arit nage kagak, ambi kolage logomunggun o.

⁹Kat kogogumbuk kiniki mondok nu'lek eeppatinuk logot o, yinuk, yokkigirak nogo lek a? Kat ambime nage keegak, Naliku kogoba Ala an nimbirak nagin me, kat kagabiti mbake, eerit nage logonet anggon eekkake, eeriyak ti mondok mage o,” yinuk, yoreegerak.

¹⁰Yoge mbareegi, at Yotuwa nen it aakumi Iterali inoweewi nogo yorage logonet, “Nogo mbere yinuk, ko'lu aret niyo Yoraran yi, enebaga wunda nanuk, at Aliku kinogoba Ala nen kit kinanggween kinalitak lombok wokkirage nogome unde eeppatinuk logomunggup nduk, unggwi noorak me, it aakumi Iterali apit aret inambi kambu ndarogo pako logowak nduk, inawooliyana lombok yoranet nogo logonip o,” yinuk, yoragagerak.

¹² Yorage nagagerik, it Uruben mendek inom, Nggat mendek inom, anebunu Manate ando mogonak inom, yorage logonet,

¹³“Kit kiniki ugun tayenak obeelom aret logomunggup nduk, at Aliku kinogoba Ala nen, Kinanggween yi wokkiragaarak o, yinuk, at Aliku ALA ayeloman Muta nen wone lengganogo yokkiragagerak nogo abeko logonip o.

¹⁴Abeko logomonggotik, kinakuwi inom, kinapuri inom, kinaanggumi inom, at Muta nen kinanggween tumbukkiragagim niyo Yoraran yibaga ya'i wonogwe iigak, kit aap wim nambuka wakaa'ngget kineebe abok aret kineegin li'luk eekko'nok, kinoreewi kinambokan piinok, kit kinaa'nduk wunda nanip o.

¹⁵Ndi, kit kiniki ugun tayenak obeelom logomunggup nduk, Aliku ALA nen yeenggwa kiragagerak nogo kokwak, kinoreewi ando inanggween Aliku ALA nen wogorage nogome, togop aret logowak nduk, yeenggwaarogwe kiinok, at Aliku kinogoba Ala nen inanggween wogorage nogome abu aret unde eeppatinuk, obeelom wonogwe iigak, Ala ayeloman Muta nen kinanggween tumbukkiragagim oonegen wundi wage menggim niyo Yoraran yibaga yime logomunggup nduk, kiniyok paga yungguninuk wunda woraamunggup o,” yinuk, yoragagerak.

¹⁶Yorage mbareegi, it nogo nen at yogo logonet, “At Muta nen yo'nirage kenok, eerit nogo nogogurak nogo ndak-ndak, kat nen wone lengganogo yo'nirage nogo, E o, yinuk, eekwi, ndi, Ndime nanip o, yo'nirage kenok nogwe, eeko logorak me, yo'nirage logot o, ninogoba. Ndi, at Aliku kogoba Ala Muta imbirak wonagagerak kokwak, kat kunduk kimbirak aret logomunggun o.

¹⁸Aap ambi nen kat koone ari nogo, Eeriyak neebi, mbake, wone lengganogo yo'nirage nogo taganogo mbo pege, eeke kenok, aap ti kambuwak nduk, warogo puurak aret me, kat perak, kogogumbuk kiniki mondok nu'lek eeppatinuk logot o,” yinuk, yoreegwaarak.