Read Western Dani Yotuwa 13 Bible Online

Yotuwa 13 - Western Dani bible

Yotuwa 13

¹Ti'nuk, aap Yotuwa nogo yi tahun ndi tahun eeppunuk, abu aakelo age mbareegi, at Aliku ALA nen at yoge logonet, “Kat abu aakelo aret ari nagandak me, nggween kit logorak ambik lombok awo tebenggolaga'lek wonage o.

²Kit logorak nggween tebenggolaga'lek nogo yi aret. It aakumi Pilitin mendek inom, aakumi Nggetut mendek inom, inanggween apit

³o Metit oonegen wundi wage menggim yime pa'nggwe niyo Tikot kuli nen nok, nggween Ekoron o omarip paga pa'nggwe kuli it Kanan mendek wonogo menggam o Pilitin aap inendagembogut Nggata inom, Atorot inom, Atekelon inom, Nggat inom, Ekoron inom, wone lengganogo yorogo menggam aret me, nogo inom, o ame pa'nggwe aakumi Awi mendek inanggween inom,

⁴it aakumi Kanan mendek inanggween aakumi Tiron mendek o Meyara wonogwe me nen nok, aakumi Amori inanggween o Apek kuli inom,

⁵aakumi Nggeban inanggween nogo inom, o Libanon apit oonegen lagi wage menggim pa'nggwe puut Keromon abu'me o Mba'an-Nggat nen nok, o Kamat tu nogo menggam kuli nogo inom, abok aret mugogo wumbiiga'lek wonage o.

⁶ Ndi, aakumi ambik puut nggelok-nggobok o Libanon nen nok, Miterepot-Mayim aakumi Tiron mendek abok wonogwe nogo perak, an naa'nduk a'nuk aret tebenogo piyaagin me, Inanggween ti, it aakumi Iterali yate kwak tumburiroorak o, yinuk, an nen wone lengganogo yokkiragarak ndak-ndak aret,

⁷it aap inanebunu 9 ti inom, ndi, anebunu Manate ando mogonak nogo inom, yate kwak inanggween tumburiraamunggun o,” yinuk, yoreegerak.

⁸ At Aliku ALA ayeloman Muta nen niyo Yoraran enebaga oonegen wundi wage menggim pa'nggwe inanggween wogoroorak koonogo piyareegerak nogo ndak-ndak aret anebunu Manate ando mogonak nogo inom, it Uruben mendek inom, Nggat mendek inom, yate kwak inanggween wogoragagerak kologogwaarak.

⁹It inanggween kologogwaarak kuli ti, niyo Aronon nggelo'me nage irimbaga kobappaga o Arowet panggombunuk, nggelo'me irimbaga oolo kota wonage nogo paga nen nok, o Mereba koorok puut kobappaga nen nok, o Ndibon nen nok,

¹⁰it Amori mendek inowe endagembogut Tikon abu'me piinok menggim o Ketibon paga at awi kota-kota abok aret kuli nen nok, it aakumi Amon inanggween kuli ti aret.

¹¹It inanggween wogoragagerak ti, o Nggileyat inom, it aakumi Nggetut wonogo menggam inom, it aakumi Maaka wonogo menggam inom, puut Keromon abok aret inom, nggween Mbatan kuli o Talaka inom, wogoragagerak.

¹²O Mbatan wogoragagerak ti, it Mbatan mendek inowe endagembogut logonet, o Atitarot mendek inom, o Erereyi mendek inom, wone lengganogo yorage nagagerak aap endage Ok aret o. At Muta nen it Erepayim mendek tebenogo piinok, abok aret mugogo wumbiinet nage logonet, irip paga aap Erepayim mendek endagembogut Ok nogo aret mugogo wumbereegerak me, at abu'me piinok menggim o Mbatan time abok aret inom wogoragagerak.

¹³Togop aret kwe, it Iterali nen it aakumi Nggetut mendek inom, it Maaka mendek inom, mugogo wumbiyoolik me, it ti, Iterali inom o yogondak wonogwe aret o.

¹⁴ Ndi, anebunu Lewi mendek ti, at Aliku Iterali inogoba Ala nen wone koonogo yoragagerak nogo ndak-ndak, it koloorak yate kwak ti, Ala ake warogo kani kunggwi mendek unde logorak aret me, inanggween wogoroolik aret o.

¹⁵Anebunu Uruben mendek ndarak ndegek lombok Muta nen inanggween tumburiragagerak nogo yi aret.

¹⁶It inanggween kuli nogo ti, niyo Aronon nggelo'me nage irimbaga kobappaga o Arowet panggombunuk, nggelo'me irimbaga oolo kota wonage nogo paga nen nugwa, o Mereba koorok puut kobappaga kuli wogoragagerak.

¹⁷Inanggween wogoragagerak nogo ti, o Ketibon inom, o kobak nabunogo pereegim kota Ndibon inom, kota Mbamot-Mba'an inom, kota Mbet-Mba'an-Meyon inom,

¹⁸kota Yakat inom, kota Keremot inom, kota Mepaat inom,

¹⁹kota Kiriyat-Ayim inom, Tibama inom, kobak nabunogo pereegim irimbaga puurom paga kota Teret-Katakat inom,

²⁰puut Pitaga elan me kota Mbet-Peyot inom, kota Mbet-Yetimot inom, nogo kunduk wogorage,

²¹it Uruben mendek inanggween ando wogoragagerak nogo ti, kobak nabunogo pereegim kota-kota abok aret inom, aap endagembogut Tikon abu'me piinok menggim abok aret inom, wogorage, eereegerak. It Amori mendek inowe endagembogut o Ketibon logonet, wone lengganogo yorage kagak at Muta nen it Miriyan mendek inoweewi nagawan-nagawan o time logonet, aap Tikon inom a'nuk, wim nambuko nogogwaarak aap Ewi inom, Erekem inom, Tut inom, Kut inom, Ereba inom, inoorogo piinok, aap endagembogut inom wareegerak nogo ti, aap Tikon ti aret.

²²Ndi, aap tili pagangga Mbeyot aput Mbileyam nogo kunduk, it Iterali nen warogo pereegwaarak.

²³It Uruben mendek inanggween tumburiragagerak oonegen kilu yi nage menggim pa'nggwe kuli nogo ti, niyo Yoraran aret. It Uruben paga wiganak ndarak ndegek lombok yate kwak inanggween paga kota-kota inom, kota-kota ti, yaga'lelo mbuulogwe-mbaalogwe inom, tumburiragagerak ti aret.

²⁴Anebunu Nggat mendek ndarak ndegek lombok Muta nen inanggween tumburiragagerak nogo yi aret.

²⁵It inanggween tumburiragagerak ti, o Yayetet inom, o Nggileyat yi kota ndi kota inom, it Amon mendek inanggween ando kuli o Araba koorok kota Arowet inom, wogoragagerak.

²⁶Inanggween wogoragagerak kuli ti, o Ketibon panggombunuk, nok, o Aramat-Mitapa nen, o Mbetonim kuli nen, o Makanayim paga nen nok, o Ndebit paga kuli pugu wonagagerak.

²⁷Ndi, o kobappaga time kota Mbet-Karan inom, kota Mbet-Nimara inom, kota Tukot inom, kota Tapon inom, ndi, niyo Yoraran ndirok agi niyo Nggalileya yenggenak kuli oonegen lagi wage menggim pa'nggwe enebaga it aakumi Ketibon mendek inowe endagembogut Tikon abu'me piinok menggim ando awo wogoraga'lek nogo inom wogoragagerak.

²⁸It Nggat paga wiganak ndarak ndegek lombok yate kwak inanggween mbanak paga kota-kota ti inom, kota-kota ti, enaagan-ambokan yaga'lelo mbuulogwe inom, tumburiragagerak ti aret.

²⁹Anebunu Manate ando mogonak at Manate paga wiganak ndarak ndegek lombok yate kwak inanggween tumburiragagerak nogo yi aret.

³⁰It inanggween kuli nogo ti, o Makanayim panggombunuk, nok, o Mbatan abok aret inom, it aakumi Mbatan mendek inowe endagembogut Ok abu'me piinok menggim abok aret o Mbatan time yaga'lelo-yaga'lelo 60 o Yayit paga wonage nogo inom,

³¹o Nggileyat ando inom, ndi, o Mbatan logonet, wone lengganogo yorage nagagerak aap endagembogut Ok awi kota Atitarot inom, awi kota Erereyi inom, abok wogoragagerak. Aap Manate aput Makit paga wiganak apuri ando ndarak ndegek lombok tumburiragagerak nogo ti aret.

³²At Muta nogo o Yeriko wunggandigin oonegen wundi wage menggim pa'nggwe niyo Yoraran enebaga o Mowap kobappaga logonet, yate kwak inanggween tumburiragagerak nogo ti aret.

³³ Togop kwe, anebunu Lewi mendek perak, at Muta nen yoragagerak nogo ndak-ndak, yate kwak inanggween ti, at Aliku Iterali inogoba Ala unde logorak aret me, yate kwak nggween tumburiroolik aret o.