Read Western Dani Yotuwa 17 Bible Online

Yotuwa 17 - Western Dani bible

Yotuwa 17

¹Aap Yutup aput manggu ndarak ti, Manate aret me, yugum paga wakkaanuk, anebunu Manate mendek inanggween tumburiragagerak kuli nogo yi aret o. Aap Manate aput manggu ndarak ti, Makit aret me, aput endage Nggileyat. At Makit nen aap eegin warak wim kalu-kalu wonagagerak me, niyo Yoraran enebaga o Nggileyat inom, o Mbatan inom, wogoreegerak.

²Anebunu Manate mendek ando mogonak ti, at Makit paga wiganak inanggween ti, enebaga muk wogoragagerak me, anebunu Manate mendek ando mogonak wogoroolik nogo, yugum paga wakkaanuk, ndarak ndegek lombok niyo Yoraran yi paga tumburiragagerak endage ti, Abiyetet, Kelek, Atiriyen, Tekem, Kepet, Temira aret. Aap Yutup aput Manate paga wiganak ando aap mban ndarak ndegek lombok it ti aret o.

³Togop kwe, aap Telapekat ogoba ti Kepat, Kepat ogoba Nggileyat, Nggileyat ogoba Makit, Makit ogoba Manate aret nda'nogogwaarak me, inomboluk aap Telapekat nogo, apuri wologwe ndaganabulik komologwe mban ndaganabeegerak me, inendage ti, Makala, Nowa, Kogala, Milaka, Tirata aret.

⁴ It komologwe nogo, aap Ala unde Eleyatat inom, aap Nun aput Yotuwa inom, it Iterali inoweewi inom, inowagam wogo nogogwaarik, it yorogo logonet, “Aliku ALA nen, It komologwe ti, iniriwi inom aret inanggween yate kwak kologo logowak o, yinuk, wone lengganogo Muta yoreegerak me, nit ninom aret wo'niroorak o.” Yogo mbareegwa, Aliku ALA nen wone lengganogo Muta yoreegerak nogo ndak-ndak, at Yotuwa nen it inogoba inom wiganak inanggween yate kwak kologwe me, inom logowak nduk, wogoragagerak.

⁵Anebunu Manate mendek oonegen lagi wage menggim pa'nggwe niyo Yoraran enebaga o Nggileyat nenaarak inom, o Mbatan nenaarak inom, wogoragagerak kwe, it Manate paga wiganak aap mban inanggween yate kwak wogorage logonet, at paga wiganak komologwe ti, inom aret wogorage logonet me, niyo yi paga nggween 10 mbanak inom aret wogoragagerak. O Nggileyat nenaarak ti, it Manate paga wiganak ando wogoragagerak nogo o.

⁷Aap Manate mendek inanggween kuli ti, o Atiyet nen o Tikem oonegen lagi wage menggim pa'nggwe o Mikemetat paga ari nanuk, ti paga nen yomonogo ogu o ame pa'nggwe mugurok it aakumi En-Tapuwa iname paga kuli aret wonagagerak.

⁸Nggween Tapuwa ti, anebunu Manate mendek inanggween aret kwe, it Manate mendek inanggween kuli paga kota Tapuwa ti perak, it Eparayim mendek inawi aret agagerak.

⁹Ndi, it Manate inanggween kuli ti, o Tapuwa nen ogu o ame pa'nggwe mugurok niyo Kana nage paga ari nanuk, niyo nage nogo mugurok yi nggwok yenggenak laut warak aret wonagagerak. It Manate inanggween niyo Kana nage kuli pugu paga ogu o ame pa'nggwe kota-kota nogo ti, it Eparayim mendek inom aret inawi kota-kota wonagagerak kwe, it Manate inanggween kuli ti, o omarip paga pa'nggwe niyo ti paga nen nok, niyo kole yenggenak laut kuli warak aret wonagagerak.

¹⁰Nggween niyo Kana nage ogu o ame pa'nggwe ti, anebunu Eparayim mendek inanggween aret. Ndi, agi o omarip paga pa'nggwe ti, anebunu Manate mendek aret. Anebunu Manate mendek inanggween kuli oonegen kilu nage menggim pa'nggwe ti, niyo nggwok yenggenak laut nogo aret. O omarip paga pa'nggwe ti, anebunu Atet mendek inanggween kuli aret. Ndi, oonegen lagi wage menggim pa'nggwe ti, Itakat mendek inanggween kuli aret wonagagerak.

¹¹Togop aret kwe, anebunu Itakat inom, Atet inom, inanggween mbanak kwe, it inanggween paga kota-kota anebunu Manate mendek wogoragagerak ti, kota Mbet-Teyan inom, kota Yibeleyam inom, niyo kole yenggenak laut ambet paga kota Ndot inom, kota En-Ndot inom, kota Taanak inom, kota Megiro inom, wogorage logonet, kota-kota ti, enaagan-ambokan yaga'lelo mbuulogwe-mbaalogwe abok aret inom wogoragagerak kwe,

¹² it aakumi Kanan mendek nen, “Niname yime nen wumbinaniyak mondok lek aret o,” yinuk, inogogumbuk wonogwe iinok, anebunu Manate mendek nen it mugogo wumbiyoorak meek agagerak kwe,

¹³anebunu Manate mendek inomaawi ogo logonet, mbelek togon wumbiyoolik, it ando ineyabu eeppiigo logowak nduk, teppiyareegwaarak.

¹⁴It Yutup mendek paga wiganak nen Yotuwa yogo logonet, “Aliku ALA nen ale'nggen ninoba pinanit wage kagak, nineebe ambik ogogurak kwe, yugum paga wakkenok, nggween we mbuuluk o ambit nenaarak iluk tumbu'niragandak ti, nonggop nduk o?”

¹⁵Yogo mbareegwa, at Yotuwa nen it yorage logonet, “Kit aakumi ambik ogwe, ndi, o nggelok-nggobok Eparayim ti mbuuluk me, yagabit age, eekerak kenok, eyonggaame it aakumi Perit mendek inom, Erepayim mendek inom, wonogo menggam time kinawi eekkolaabagip nduk, o time tenak eerogo pati lagi nanip o.”

¹⁶Yorage mbareegi, it Yutup mendek paga wiganak nogo nen at yogo logonet, “O nggelok-nggobok me time ti mbuuluk aret o, ndi, it aakumi Kanan mendek o kobak nabunogo pereegim kota Mbet-Teyan menggaarak inom, enaagan-ambokan yaga'lelo mbuulogwe menggaarak inom, it Titeren Kobappaga menggaarak inom, nen inanggweendo ti, mbuti mendek aret o.”

¹⁷Yoreegwaarak kwe, at Yotuwa nen at Yutup paga wiganak anebunu Eparayim mendek inom, Manate mendek inom, yorage logonet, “Nit nineebe woneemaluk, ndi, ninomaawi ambik, ti abet aret yogotak me, yugum paga wakkaanuk, o ambit nenaarak tumbukkiragarak ti mban wokkirage lek o.

¹⁸Ata, ambi eyonggaame time inom aret wokkirage me, o tenak eerogo irip-irip pit nogo logomonggotik, unde eeppatinuk logomunggup o. It aakumi Kanan mendek inomaawi ambik, ndi, inanggweendo mbuti mendek paga ogobakkigirik aret kwe, it kunduk, kit mugogo wumbiyoorak op aret mbake agarik o,” yinuk, yoragagerak.