Read Western Dani Yotuwa 18 Bible Online

Yotuwa 18 - Western Dani bible

Yotuwa 18

¹Aliku ALA nen nggween wogoragagim tebenggo'nok wonogo logonet, aakumi Iterali wonogwe abok aret o Tilo paga kuwak eeko nogogwaarik, Ala inom lambungge menggim awooliya nogo mippereegwaarak kwe,

²ne ti eyom paga it Iterali inanebunu 7 paga wiganak nogo, inanggween yate kwak awo kolaga'lek wonogogwaarak.

³Togop me, at Yotuwa nen it Iterali nogo yorage logonet, “At Aliku kinombomini inogoba Ala nen nggween wokkiragagim nogome unde eeppatinuk logomunggup nduk, o time noorak mbaka'lek we ugun ndengga aago wonogwe kiigak, ne mande ari nagin o.

⁴Togop me, aap inanebunu lombok ineebe kenagan lombok mban leenogo piyaanip o. Leenogo piigwi kiinok, o time nogo logomenggaarik, nggween inigen pekkenet nogo logonet, inanggween yate kwak koloorak mbakwi nogo paga o ndogop wonage nogo liiru mbaninuk, iniyokan an wonage me yime woraawak nduk, nappiyaagin o.

⁵It aap Yekura paga wiganak inanggween ti, o omarip paga pa'nggwe wonage, ndi, aap Yutup paga wiganak inanggween ti, o ame pa'nggwe wonage, eerak kagak, nggween oolo taati 7 kuli aret mbanuwak o.

⁶O ndogop wonage o, yinuk, nggween 7 nenaarak liiru mbanemenggaarak wonok niri wogwe iinok, Aliku ninogoba Ala nen nggween ambi mbanak anebunu ta wogoriyak mbakerak kaamun? yinuk, an nen yugum paga wakkenok, tumbukkiraagin o.

⁷It aap Lewi mendek perak, yate kwak kologo logorak nogo ti, Aliku ALA eebe unde logonet, ake yabu eeko logorak ti aret me, tumbukkirage logonet, it nggween mbanak ambi kolaagun lek o. Ndi, it aap Nggat paga wiganak inom, aap Uruben paga wiganak inom, aap Manate paga wiganak ando mogonak inom, ti, inanggween yate kwak oonegen lagi wage menggim pa'nggwe niyo Yoraran enebaga Aliku ALA ayeloman Muta nen muk wogoragagerak nogo o,” yinuk, yoragagerak.

⁸Yorage mbareegi, it aap ti nanuk, “O ndogop wonage kogoorak o,” yinuk, liiru mbanogo wonok woraawak nduk, nappiige logonet, at Yotuwa nen, “Kit nen o ti, maloppit nogo logonet, O nogo ndogop wonage kogoorak o, yinuk, liiru mbaninuk, an wonage me yime kiniyokan wogwe kiinok, o Tilo yime, Aliku ALA nen nggween ambi mbanak anebunu ta wogoriyak mbakerak, kaamun? yinuk, yugum paga wakkaanuk, wokkiroorak me, nogo logonip o.”

⁹Yorage mbareegi, it aap ti, tu o nggween kolaawam ti paga nogo logonet, yi kota ndi kota paga wonage nogo liippit nogo nogogwaarik, nggween 7 kuli liiru mbanogo punuk, wonok it aakumi o Tilo paga inawooliya wuppatinuk, wonogwe nogo, Yotuwa inom wonage me, ka wogogwaarak.

¹⁰Ka wogo mbareegwa, Aliku ALA enggaanom paga o Tilo time at Yotuwa nen, “Nggween 7 mbanak ti, ambi ta koloorak kaamun?” yinuk, yugum paga wakkaanuk, inanebunu Iterali koloolik nogo mugurok tumburiragagerak.

¹¹Aa'nduk lombok yugum paga wakkage nagagerik, yugum nogo wo'narok it Mbeniyamin mendek ndarak ndegek lombok inowagam ari nagagerak. Ari nage mbareegi, it Mbeniyamin mendek inanggween tumburiragagerak ti, anebunu Yekura mendek inawi nenaarak kologogwam ogu kagak, anebunu Yutup paga wiganak kologogwam agi kagak, oolo aret wogoragagerak.

¹²It Mbeniyamin inanggween kuli o omarip paga pa'nggwe ti, niyo Yoraran aa'nggi paga panggombunuk, o Yeriko o omarip paga pa'nggwe puut elan me nen oonegen kilu yi nage menggim pa'nggwe mugurok puut nggelok-nggobok me nen, irip karume o Mbet-Awen ari nanuk,

¹³time nen nok, o Lut ti, o Mbeten aret me, o Lut wukkagak puut elan me o ame pa'nggwe ari nanuk, time nen ena yomorogon ogu o Mbet-Koron abu'me o ame pa'nggwe puut nggelok-nggobo'me o Atarot-Arat kuli ari nage,

¹⁴Oonegen kilu yi nage menggim pa'nggwe inanggween kuli ti, o Mbet-Koron wunggagak, o ame pa'nggwe puut nggelok-nggobo'me nogome nen yomoninuk, nugwa, ogu o ame pa'nggwe mugurok o Kiriyat-Mba'an ti, o Kiriyat-Yeyarim aret me, aap Yekura mendek inawi kota nogome ari nage, eerak aret wonagagerak.

¹⁵O ame pa'nggwe inanggween kuli ti, o Kiriyat-Yeyarim endekenggwe time panggombunuk, nok, oonegen kilu yi nage menggim pa'nggwe mugurok, niyo eneeri wungge menggim Me-Nepotowa ari nage,

¹⁶time nen nok, ogu Erepayim Kobappaga o omarip paga pa'nggwe Mben-Kinom Kobappaga wunggagak puut ogobak pit wambi wagagim paga nen nok, ogu Kinom Kobappaga irimbaga it aap Yebut menggam puut elan me o ame pa'nggwe mugurok nugwa, o En-Orogen ari nage,

¹⁷time nen ena yomonogo o omarip paga pa'nggwe mugurok, o En-Temet nen, puut aanenggen Arumim enebaga pa'nggwe kagak o Nggelilot nen, ogu Uruben aput endage Mbokan Ayugum o, yinuk, yogo nogogwam ari nage,

¹⁸time nen nok, o Yoraran Kobappaga wukkagak o omarip paga pa'nggwe puut elan me mugurok ogu karu nggwok o ame pa'nggwe nogome nen nok,

¹⁹o Mbet-Kogala wukkagak o omarip paga pa'nggwe puut elan me mugurok, irip o ame pa'nggwe yi Yoraran kuni nage yenggenak menggim yi yenggenak Mayu Ogop aanunggut o omarip paga pa'nggwe nogome ari nage, eerak wonagagerak nogo ti, o ame pa'nggwe inanggween kuli ti aret.

²⁰Oonegen lagi wage menggim pa'nggwe inanggween kuli wonagagerak nogo ti, niyo Yoraran nage ti aret. Anebunu Mbeniyamin paga wiganak ndarak ndegek lombok inanggween yate kwak agi-ogu, aru-ogwe kuli wonagagerak ti aret.

²¹Ndi, anebunu Mbeniyamin mendek ndarak ndegek lombok kota-kota unde ogogwaarak endage ti, Yeriko, Mbet-Kogala, Emek-Ketit

²²Mbet-Araba, Temarayim, Mbeten,

²³Kaawim, Para, Opara,

²⁴Kepat-Kaamonayi, Opini, Nggeba aret me, lambuk togon kota 12 enaagan-ambokan yaga'lelo mbuulogwe inom aret kologwe,

²⁵ndi, kota Nggibeyon, Arama, Mbeerot,

²⁶Mitapa, Kepira, Mota,

²⁷Erekem, Yirepen, Tarala,

²⁸Tela, Elep ti, it Yebut mendek inawi Yerutalem aret me nogo inom, kota Nggibeyat inom, kota Kiriyat inom, aret me, lambuk togon kota-kota 14 enaagan-ambokan yaga'lelo mbuulogwe-mbaalogwe inom kologwe, eereegwaarak. Anebunu Mbeniyamin paga wiganak ndarak ndegek lombok inanggween yate kwak wogoragagerak nogo ti aret.