Read Western Dani Yotuwa 19 Bible Online

Yotuwa 19 - Western Dani bible

Yotuwa 19

¹Ambokan yugum paga wakkaanuk, yugum wo'narok it Timeyon mendek ndarak ndegek lombok inowagam ari nagagerak. Ari nage mbareegi, it Timeyon mendek inanggween ti, it Yekura mendek inanggween kologogwam oolo kota-kota nogo aret wogoragagerak.

² Kota-kota wogoragagerak ando endage ti, Mberetiyeba endage ambi Tiyeba, Molara,

³Katat-Tuwan, Mbaala, Etem,

⁴Elotolat, Mbetun, Korama,

⁵Tikalak, Mbet-Kamarakabot, Katat-Tuta,

⁶Mbet-Lebawot, Taruken, aret me, lambuk togon kota 13 enaagan-ambokan yaga'lelo mbuulogwe inom wogorage,

⁷ndi, kota Ayin, Irimon, Etet, Atan, kota 4 aret me, enaagan-ambokan yaga'lelo inom wogorage,

⁸o kota-kota ti, enaagan-ambokan yaga'lelo mbuulogwe-mbaalogwe abok aret wogoranet nok, o kota Mbaalat-Mbeet ti, o karu nggwok o ame pa'nggwe kota Arama aret me, kota ti kuli wogorage, eereegerak. Anebunu Timeyon paga wiganak ndarak ndegek lombok yate kwak kota-kota wogoragagerak nogo ti aret.

⁹It Timeyon paga wiganak nen yate kwak kota-kota it Yekura mendek inanggween paga ando wogoragagerak nogo ti, it Yekura mendek inanggween kole me, yinuk, wogoragagerak me, it Timeyon mendek nen inanggween yate kwak ti, it Yekura mendek inanggween oolo ti paga aret wogoragagerak.

¹⁰Ambokan yugum paga wakkaanuk, yugum wo'narok it Tebulon paga wiganak ndarak ndegek lombok inowagam ari nagagerak. Ari nage mbareegi, it inanggween yate kwak wogoragagerak kuli ti, o Tarit panggombunuk,

¹¹oonegen kilu yi nage menggim pa'nggwe mugurok, o Marala nen, o Ndabetet tebenogo pegak nok, o Yokeneyam koorok niyo nggelo'me ari nage,

¹²ti'nuk, o Tarit panggombunuk, yomonogo oonegen komeninuk lagi wage menggim pa'nggwe nen nok, o Kitolot-Tabot kagak, o Ndobarat ari nage, time nen o Yapiya lagi nanuk, time nen nok,

¹³oonegen komeninuk lagi wage menggim pa'nggwe mugurok, o Nggat-Kepet nen, o Et-Katin nen, irip Irimon nen ena yomonogo o Neya ari nage,

¹⁴ti paga nen ena yomonogo agi o omarip paga pa'nggwe o Kanaton ari nanuk, Yipata-En Kobappaga ari nage, eerak wonagagerak.

¹⁵Ndi, inanggween kuli pugu manggagak kota 12 inom, enaagan-ambokan o yaga'lelo inom, wogoragagerak nogo kota ando endage ti, Katat, Nakalan, Timoron, Yirala, Mbe'lekem aret wogoragagerak.

¹⁶It Tebulon mendek ndarak-ndegek lombok kota-kota inom, kota-kota ti, enaagan-ambokan yaga'lelo-yaga'lelo inom, yate kwak kologogwaarak nogo ti aret.

¹⁷Ambokan yugum paga wakkaanuk, yugum nogo wo'narok it Itakat paga wiganak ndarak ndegek lombok inowagam ari nagagerak.

¹⁸Ari nage mbareegi, it Itakat inanggween mbanogo wogorage logonet, kota-kota inom wogoragagerak ando endage ti, Yiteren, Ketulot, Tunem,

¹⁹Kaparayim, Tiyon, Anakarat,

²⁰Arabit, Kitiyon, Ebet,

²¹Eremet, En-Ngganim, En-Kara, Mbet-Patet aret.

²²Inanggween kuli pugu ti, kota Tabot nen, kota Takatima nen, kota Mbet-Temet nen, nugwa, niyo Yoraran warak me, kota 16 inom, kota-kota ti, enaagan-ambokan yaga'lelo mbuulogwe inom, wogoragagerak.

²³It Itakat paga wiganak mendek ndarak ndegek lombok yate kwak kota-kota inom, kota enaagan-ambokan yaga'lelo mbuulogwe inom, kologogwaarak nogo ti aret.

²⁴Ambokan yugum paga wakkaanuk, yugum nogo wo'narok it Atet paga wiganak ndarak ndegek lombok inowagam ari nagagerak.

²⁵Ari nage mbareegi, it Atet inanggween mbanak paga kota-kota wogoragagerak ando endage ti, Kelakat, Kali, Mbeten, Akatap,

²⁶Alamelek, Amat, Mitan aret. Ndi, oonegen kilu yi nage menggim pa'nggwe it inanggween kuli ti, puut Karemen paga nen nok, niyo Libanat ari nanuk,

²⁷ena yunggunogo oonegen wundi wage menggim pa'nggwe mugurok, o Mbet-Ndagon nen, it Tebulon mendek inanggween kuli nen nok, Yipata-En Kobappaga ari nanuk, ena yomonogo o omarip paga pa'nggwe mugurok, o Mbet-Emek nen nok, o Nekiyen nen, o omarip paga pa'nggwe mugurok, o Kabun agigan kagak nok,

²⁸o Eboron nen, o Erekop nen, o Kamon nen, o Kana nen, o Tiron Nggwok kuli warak aret wonagagerak.

²⁹Ti'nuk, o Tiron Nggwok paga nen ena yunggunogo o Arama ari nanuk, time nen o kota yugum pak wurik o Tirut nen nugwa, ena yomonogo kota endage Kota nen nok, irip niyo kole yenggenak Laut Tengah paga warak wonagagerak. It Atet inanggween wogorage logonet, kota 22 inom, kota-kota ti, enaagan-ambokan yaga'lelo mbuulogwe inom, kologogwaarak ando endage ti, Makalap, Akitip, Uma, Apek, Epekop nogo aret o.

³⁰

³¹It Atet paga wiganak ndarak ndegek lombok kota-kota inom, kota ti, enaagan-ambokan yaga'lelo mbuulogwe inom, yate kwak kologogwaarak nogo ti aret.

³²Ambokan yugum paga wakkaanuk, yugum nogo wo'narok it Natali paga wiganak ndarak ndegek lombok inowagam ari nagagerak.

³³Ari nage mbareegi, it inanggween wogoragagerak kuli nogo ti, o Kelep ti, o Tananim eyo kole nogome panggombunuk, o Arami-Nekep nen, o Yabenen nen nok, o Lakum kuli ari nanuk, time nen niyo Yoraran warak wonagagerak.

³⁴Ndi, oonegen kilu yi nage menggim pa'nggwe ti, o Atonot-Tabot panggombunuk, nugwa, o Kukok ari nanuk, o ame pa'nggwe paga kuli ti, it Tebulon inanggween wogoragagerak kuli wonage, time nen mugurok oonegen kilu yi nage menggim pa'nggwe agi ti, it Atet mendek inanggween wogoragagerak kuli ari nage, ndi, oonegen lagi wage menggim pa'nggwe ti, niyo Yoraran pa'nggwe ari lagangge, eerak aret wonagagerak.

³⁵Kota-kota yugum pak wurik wogoragagerak endage nogo ti, Tirim, Tet, Kamat, Arakat, Kineret,

³⁶Atama, Arama, Katot,

³⁷Kereti, Erereyi, En-Karot,

³⁸Yiron, Migaran-En, Korem, Mbet-Anat, Mbet-Temet aret me, kota 19 inom, kota-kota ti, enaagan-ambokan yaga'lelo mbuulogwe inom, wogoragagerak ti aret.

³⁹It Natali paga wiganak ndarak ndegek lombok yate kwak kota-kota inom, kota ti, enaagan-ambokan yaga'lelo mbuulogwe inom, kologogwaarak nogo ti aret.

⁴⁰Ndi, irip paga lombok yugum paga wakkaanuk, yugum nogo wo'narok it Ndan paga wiganak ndarak ndegek lombok ari nagagerak.

⁴¹Ari nage mbareegi, yate kwak inanggween wogoragagerak kota-kota ando wonage endage ti, Tora, Etitawon, It-Temet,

⁴²Taalabin, Ayalon, Yitala,

⁴³Elon, Timana, Ekoron,

⁴⁴Eleteke, Nggibeton, Mbaalat,

⁴⁵Yekut, Mbene-Mberak, Nggat-Irimon,

⁴⁶O Me-Yarokon, Arakon ti aret wogorage, ndi, o Yapo wunggagak nggween yime pa'ne nogo inom wogorage, eereegerak.

⁴⁷ Togop aret eereegerak kwe, it Ndan mendek inomaawi lek kenok, inanggween wogoragagim nogome logorak meek age mbareegi, it Ndan mendek nen o kota Letem mendek inom wim nambuko logowak nduk, lagi nanuk, inawi paga kwi'nari unggunuk, wooluwak paga inoorogo piinok, it inawi o Letem ti paga ye mbanggologo nogogwaarik, inombo endage toonak kwak endage, Ndan, nogo aret tooneegwaarak.

⁴⁸It Ndan paga wiganak ndarak ndegek lombok yate kwak kota-kota inom, kota ti, enaagan-ambokan yaga'lelo mbuulogwe inom, kologogwaarak nogo ti aret.

⁴⁹Nggween nogo, Iterali inanebunu mugurok mban yate kwak inanggween abu aret tumburiragagerak kologo mbareegwa, at Nun aput Yotuwa nogo nen o Eparayim nggelok-nggobok me kota Timanat-Tera, “Wo'ninip o,” yorage mbareegi, at Aliku ALA nen yoragagerak ndak-ndak, it aakumi Iterali mendek inenggela'me inom logowak nduk, yate kwak nggween ti, Yotuwa wogogo mbareegwa, o time yaga'lelo ambik wuppatinuk, wonagagerak.

⁵⁰

⁵¹Ndi, o Tilo Ala inom lambungge menggim awooliya wurik tu unggwogo menggam taati nen aap Ala unde Eleyatat inom, aap Nun aput Yotuwa inom, aap Iterali inanebunu lombok inoweewi nogo inom, at Aliku ALA enegen kagak, yugum anggen paga wakkagak aakumi Iterali inanebunu mugurok yate kwak inanggween age yobok togon tumburirogogwaarak nogo ti aret.