Read Western Dani Yotuwa 22 Bible Online

Yotuwa 22 - Western Dani bible

Yotuwa 22

¹At Yotuwa nen it Uruben mendek inom, Nggat mendek inom, inanebunu Manate mendek ando mogonak inom, wiiragagerak wogo mbareegwa,

²yorage logonet, “At Aliku ALA ayeloman Muta nen wone lengganogo yokkiragagerak nogo abok aret liirogon porogo logonet eekwi, ndi, an kunduk, wone lengganogo yokkiragagirak abok aret kinaruk liirogon konenggwi, eeko logonet,

³kinoreewi Iterali mendek ando mbo piyoolik, at Aliku kinogoba Ala nen wone lengganogo yokkiragagerak nogo ndak-ndak, liirogon aret eekwi kiigak, o yogondak yi kuli aret ari waga o.

⁴Togop me, at Aliku kinogoba Ala nen yereegerak nogo ndak-ndak kinoreewi Iterali ando ti, iniki ugun tayenak logowak nduk, eerogo piigerak wonogwe me, kit perak, at Aliku ALA ayeloman Muta nen kinanggween niyo Yoraran enebaga wokkiragagim nogome kiniyokan wunda nanip o.

⁵Wunda nogo logomonggotik, at Aliku kinogoba Ala kiniki kunik eekwi, at eeriyak mbake nogo mban eerit nogwe, Yogop ee'nu ndogop ee'nu, wone yugu nogo liirogon eekwi, at paga mban kiniki panggombunuk wonogwe, kiniki inom, kineebe inom, abok aret at mban wogo'nuk mugurok nogwe, eeko logonip o, yinuk, at Aliku ALA ayeloman Muta nen eeko logorak wone lengganogo yokkiragagerak liiru mbanak nogo ti, abu liirogon aret eeko logomunggup o,” yoragagerak.

⁶Ndi, it inanebunu Manate mendek ando mogonak nogo ti, at Muta nen o Mbatan time inanggween wogorage, ndi, abeenok mogonak nogo ti, at Yotuwa nen oonegen kilu yi nage menggim niyo Yoraran yi pagan inoreewi inanggween wogorage logonet inom wogorage, eereegerak me, at Yotuwa nen it Uruben mendek inom, Nggat mendek inom, inanebunu Manate mendek ando mogonak inom, iname yi Yoraran enebagan nawak nduk,

⁷

⁸nappiige logonet, “Kit nen kinaanggumi ambik lombok wonogwe inom, mbuti perak inom, emas inom, tembaga inom, abe mbuti mendek inom, kinambogoyum ambik lombok wonogwe inom, it kinawim inagugun waganggo nogogutak paga kinamendek ambik kineenggi warak agagerak nogo kiname nogo logomonggotik, kinoreewi ando tumburiraamunggup o,” yinuk, yorage nagagerik, ale'nggen inoba piinok, iname aret nappiyareegerak.

⁹Nappiyareegerak nogo ti, it Uruben mendek inom, Nggat mendek inom, inanebunu Manate mendek ando mogonak nogo inom, nogo nen it inoreewi Iterali ando nogo o Kanan kota Tilo nogome teppiigo nogogwaarik, o Nggileyat Aliku ALA nen, “Inanggween wogoret o,” yinuk, Muta yoge mbareegi, wogoragagim nogome wunda nawok nduk, nogo logonet,

¹⁰nggween Kanan paga o Nggileyat niyo Yoraran aa'nggi paga ari nanuk, it Uruben mendek inom, Nggat mendek inom, inanebunu Manate mendek ando mogonak nogo inom, warogo wogogak niyo Yoraran aa'nggi paga nogome iya lombok ogobakkigireegwaarak.

¹¹Ogobakkigiko mbareegwa, it aakumi Iterali ando nen, “Lek o. It Uruben mendek inom, Nggat mendek inom, inanebunu Manate mendek ando mogonak inom, o Nggileyat niyo Yoraran aa'nggi paga o Kanan aakumi Iterali inanggween kuli paga warogo wogogak ogobakkigikaarak o,” yinuk, yogwe nogo inaruk konenggo nogogwaarik,

¹²it Iterali lambunik abok aret inom wim eeri nawok nduk, o Tilo nogome kuwak eereegwaarak.

¹³Kuwak eeppunuk, it Uruben mendek inom, Nggat mendek inom, anebunu Manate ando mogonak nogo inom, o Nggileyat nogome wonogwe me, it Iterali nen aap Eleyatat aput Ala unde Pinekat inom,

¹⁴Iterali inanebunu inalitak lombok ndarak ndegek inarum menggaarak inoweewi ambit nggigik eerogo ineebe 10 inom, nappiyareegwaarak.

¹⁵Nappiyareegwaarak nogo it Uruben mendek inom, Nggat mendek inom, inanebunu Manate mendek ando mogonak nogo inom, wonogwe me, nogo nogogwaarik, wone yorogo logonet,

¹⁶ “Nit Aliku ALA apuri Iterali lambunik abok aret nen wone yogoorak nogo yokkiraawi o. At Aliku Iterali ninogoba Ala mbo punuk, nonggop nduk at maluk eeppogo logonet, kiniki liippega'lek worokot paga warogo wogogak ogobakkigikkologo ogotik o?

¹⁷Nit o Peyot logonet, maluk eereegurak paga at Aliku ALA nen andi nit Iterali lambunik abok ninoba kwippinaneegerak lek aga'lek kundugu wonage nogo ti, meek mba'nuk eeko ogotik ya?

¹⁸Kit yogondak ambinom aret at Aliku ALA kinambokan mbo puurak nduk, eeko ogotik? Kit yogondak Aliku ALA kineebi mbakwi kenok, o ko'lu aret nit Iterali lambunik abok aret anini ninoba pinanigin o.

¹⁹Kit kinanggween ti, maluk agaarak wonage kenok, o at Aliku ALA nen leenogo pateegim awooliya wurik wonage niyo yibagan yime ninom logowok nduk, wunda woraamunggup o. At Aliku ninogoba Ala ake warogo wogogo menggam muk yime ogobakkigirik wonage kagak, nit kineebi ninombakwi, ndi at Aliku ALA kineebi ombakwi, eeko logonet, kit kinake alik ambi inom ogobakkigirogo patiyak ti mage o.

²⁰ At Ala amendek ake aret me, woorak mage o, yugu kagak, at Tera ombooluk Akan nen waganeegerak paga nit Iterali lambunik abok aret anini ninoba pinaneegerak lek mbakop? At Akan maluk eereegerak paga alik mban kambulik o. Ata, nit apit aret kambeegurak o, yinuk, yogoorak me, yokkirogo o.”

²¹Yorogo mbareegwa, it Uruben mendek inom, Nggat mendek inom, it inanebunu Manate mendek ando mogonak nogo inom, nogo nen it Iterali ndarak ndegek inarum menggaarak inoweewi nogo yorogo logonet,

²²“At mondok omaawi menggerak ti, at Aliku ALA alik aret o. At mondok omaawi menggerak ti, at Aliku ALA alik aret o. Nit eekoorak at Aliku ALA eenu aret me, nit Aliku ALA wone taganogo punuk, niniki worokot logonet, nineebi kinombakwi, at Aliku ALA nineebi ombakwi, eeppunuk, yi eekoorak kenok, Aliku ALA nen ninili yuurak lek kit nen ninooriyak op aret o.

²³Nit nen Aliku ALA ake warogo kani kunggwi inom, gandum anggen yigirik ake pugwi inom, Ala ninom lambunik logorak nduk, warogo wogogwi inom, nogo paga lumbunuk, kani kunggo logorak ake ogobakkigikoorak kagak, kit nen, At Aliku ALA mbo punuk, alik ambi eeriyak nduk, eekaarak, ninombakotak kenok, at Aliku ALA alik nen ninomaluk onggo ninoba pinanege logowak o, yinuk, kit Iterali kineenu arubagip nduk, yogo o.

²⁴Nit togop nduk, eerulik o. Nit ogobakkigikoorak yi nogo ti, peebi kit kinapuri nen nit ninapuri yorogo logonet, At Aliku nit Iterali ninogoba Ala ti, kit kunduk kinogoba aret mba'nuk, yogo ogotik? Lek o.

²⁵At Aliku ALA nen niyo Yoraran oolo ogoorak wonage kagak, nit yime pinanege, kit Uruben mendek inom, Nggat mendek inom, time pinagage, eereegerak me, at Aliku nit ninogoba Ala ti, kit kinogoba lek aret o, yinuk, yorogwe iinok, nit ninapuri Aliku ALA inagabiti mbaka'lek mbo pugwi iyo, mba'nuk, ogobakkigikoorak o.

²⁶Togop age kero, nit nen, Warogo wogogak ogobakkigiruwok o, yogoorak nogo ti, Aliku ALA ake warogo kani kunggwi, warogo ake pugwi, eekak yuwok nduk, ogobakkigirulik o.

²⁷Ata, kit kinapuri nen nit ninapuri yorogo logonet, At Aliku ALA ti, kit kinogoba lek o, yinuk, yorogo logokwak, nit Ala ake warogo kani kunggwi, warogo ake pugwi, Ala ninom lambunik logowok nduk, ake pugwi, eeko logorak nogo ti, at Aliku ALA awooliya wurik me nogome mban eeri nagak yogo logorak kit inom, nit inom, ninapuri-ninombowologwe nda'narit nogo logogun inom, nit abok aret nineenu agak logowok nduk, ogobakkigirogo pogoorak o.

²⁸Nit mbako logonet, It nen nit togop yo'nirogwe ilik, ninapuri wiganak togop yorogwe a, eekwi iinok, nit nen ilik, ninapuri nen a, it yorogo logonet, Nit ninombomini nen at Aliku ALA ake warogo wogogak ogut wakkagak ogobakkigirogo pereegwaarak ti, nit ninombomini nen warogo Aliku ALA ake kani kunggwi, warogo ake pugwi, eeko logowok nduk, ogobakkigirulik o. Ata, Ninogoba Ala ambit aret, mba'nuk, ambit me mban alut eeko logorak nit inom, kit inom, nineenu agak logowok nduk, ogobakkigirogo pereegwaarak ti aret me, kinigen kaanip o, yinuk, yorogo logogun o.

²⁹Togop aret me, at Ala ake warogo kani kunggwi, gandum anggen yigirik ake pugwi, warogo ake pugwi, eeko logorak ti, at Aliku ninogoba Ala ake warogo kani kunggo menggam awooliya wurik enaame wonage kagak, mbo punuk, Ala nineebi o, yinuk, niniki worokot logonet, alik ambi eekak yuwok, mba'nuk, eerulik o,” yinuk, yorogogwaarak.

³⁰Wone it Uruben mendek inom, Nggat mendek inom, Manate mendek inom, yorogogwaarak nogo at Ala unde Pinekat inom, it Iterali mendek inanebunu ndegek inarum menggaarak inoweewi inom, abok aret inaruk konenggo nogogwaarik, “Op aret yaga,” mbareegwaarak.

³¹Mbako nogogwaarik, Eleyatat aput Pinekat nogo nen it Uruben mendek inom, Nggat mendek inom, Manate mendek inom, yorage logonet, “Yogondak nen at Aliku ALA ninom aret wonage nogo nineenu aga o. Kit nen, Aliku ALA nineebi o, yinuk, alik ambi eerulik, op aret eekotak me, at Aliku ALA nen aaninggin mendek nit Iterali ninoba pinaniyak agaarak kwe, ninagap ndakop o,” yinuk, yoragagerak.

³²Yorage nagagerik, at Eleyatat aput Pinekat Ala unde nogo inom, it aakumi Iterali inarum menggaarak inoweewi nogo inom, nogo nen it Uruben mendek inom, Nggat mendek inom, o Nggileyat nogome teppiinok, Iterali o Kanan wonogwe me wogo nogogwaarik, wone nogo mbininogo yorogogwaarak.

³³Yorogo mbareegwa, it aakumi Iterali mendek nen, “Op yaga o,” yinuk, it Uruben mendek inom, Nggat mendek inom, wonogo menggam lek eerogo piyaawok nduk, ninom wim eeruwok, mbareegwaarak nogo, lek eerogo punuk, Aliku ALA alut eereegwaarak.

³⁴Ndi, it Uruben mendek inom, Nggat mendek inom, nogo nen, “At Aliku ti, Ala aret o, yinuk, kit inom, nit inom, nineenu ogo logowok nduk, warogo wogogak ogobakkigikoorak me, endage, Ineenu Agak o,” yinuk, toonogo pereegwaarak.