Read Western Dani Yotuwa 24 Bible Online

Yotuwa 24 - Western Dani bible

Yotuwa 24

¹Ti'nuk, Yotuwa nen it aap inanebunu lombok Iterali mendek nogo o Tikem time kuwak eeppiyareegerak. Eeppiige nagagerik, it Iterali inoweewi inom, wone koongga inom, aap owak loongga inom, aap wim wone mbangga nogo inom, wiirage mbareegi, wogo nogogwaarik, it apit aret Ala enggaanom paga ari wogogwaarak wonogwe iigak,

² Yotuwa nen it aakumi Iterali apit aret yorage logonet, “At Aliku Iterali inogoba Ala nen ari logonet, O maan togon kinombomini Abarakam awuluk Nakot imbirak inogoba Tera inom niyo Eparat enebagan time logonet, an Ala nalut eekwi nobaane'me kugi eerit nogo nogogwaarak.

³ Eerit nogwe iigak, an nen kinogoba Abarakam nogo niyo Eparat enebagan time nen wagangge nagagirik, o Kanan yime wonok nege logonet, ombowologwe ambik wigak yuwak nduk, Itak aret wogoreegirak.

⁴ Ndi, Itak nogo paga nen apurilogwe Yakup Etawu imbirak wogoreegirak. Wogoge nagagirik, Etawu nogo anggween puut nggelok-nggobok Teyit time wogoge mbareegi, wonage kagak, Yakup apurilogwe inom o Metit nogogwaarak.

⁵ Ti'nuk, Muta Karun imbirak o Metit time nappiyareegirak wonogwe iigak, an nen aaninggin-paaninggin iya tit agago aakumi Metit mendek inoba piige nagagirik, kit kinombomini o Metit nen wogoren wundi wagagirak.

⁶ Wogoren wumbiya wage mbareegi, niyo yenggenak aa'nggi paga ari wogogwaarak wonogwe me, it aap Metit mendek nogo nen inanggweendo wim eeka mendek nogo inom, kuda paga kwi'na'nuk wim nambuka inom, muguren niyo yenggenak Laut Merah nogo paga ari wogogwaarak.

⁷Muguren wogo mbareegwa, kit kinombomini nogo inoone nggwok paga, Yeenggwa niret o, yinuk, Naliku an ALA yo'nogo mbareegwa, an nen it aap Metit mendek arugwan iigak, kinombomini yime pa'ne iigak, oolo time o apit eerogo pege nagagirik, it Metit mendek niyo mogonak nogo paga lambunogo tebenogo piyareegirak. It Metit mendek tebenogo piyareegirak nogo, it kinombomini inigen abe nen aret kogogwaarak. Inigen kogo nogogwaarik, o karume time wonogwe iigak, o ambik me aret ari nagagerak.

⁸ An nen aap Amori mendek iname yi Yoraran oonegen wundi wage menggim pa'nggwe time pinagi nanuk, it kinom wim namburubagip nduk, kineenggime pinagage mbareegi, kinom wim eekwi kiigak, an naa'nduk a'nuk, pup eerogo inooke mbareegi, inanggween nogo kit unde eeppatinuk logomunggup nduk, kologogutak.

⁹ Ti'nuk, aap Tipot apuluk Mbalak, aakumi Mowap mendek inowe endagembogut nogo, aakumi Iterali inom wim namburiyak nduk, pipuk eeppunuk, at nen aap Mbeyot apuluk Mbileyam nogo nen kit kugi pulunogo pinagawak nduk, ayonggo pereegerak

¹⁰wage nagagerik, pulunogo pinagakit nduk eereegerak mendek, Naliku an ALA nen at oone koneniyak neebi nen, obaane'me ale'nggen kinoba pinagawak nduk, eeppege mbareegi, ale'nggen kinoba pinagagak mban eeke nagagerak ti paga at eenggime nen kinagap ndareegirak.

¹¹ Ndi, ti'nuk, kit yi Yoraran wunda wogo nogogutik, o Yeriko yime aret ari woraanuk, it aap Yeriko inaworak mendek inom, it aakumi Amori mendek inom, Perit mendek inom, Kanan mendek inom, Ket mendek inom, Nggiragati mendek inom, Kewi mendek inom, Yebut mendek inom, apit aret kinom wim eeruwok nduk, eekwi iigak, kineenggime pinagareegirak o.

¹² Pinagage mbareegi, kinawooluwak inom, kineegin inom, ti paga mugogo wumbiyoolik o. Ata, an nen nggiin kundi ineyak andiigwi kombogorak nappiya wagagirak inaa'nduk ineyak mbaninabit nogo logonet, aakumi ti inom, it Amori mendek inoweewi inendagembogut ineebe mbere nogo inom, mugogo wumbiyaawak nduk, eereegirak o.

¹³ Eeke nagagirik, kit nen nggwiirit-nggwaarit eerogo o nenaarulik kwe, unde a'nuk logobagip nduk, wokkirage, o kota-kota wurulik kwe, ye mbanggola unggwogwe, kineyabume anggur awi inom, tayitun awi inom, yarulik kwe, anggen mbanogo nunggwi, eeko logobagip nduk, eeppinagareegirak o, yinuk, Aliku ALA nen yereegerak o.

¹⁴Togop aret yereegerak me, at Aliku ALA kinagabiti mbako logonet, kiniki abe paga at oone liirogon mugurok nogo logomunggup o. Kinombomini niyo Eparat enebaga inom, o Metit inom, time wonogo logonet, Ala mugurok nogwe obaane'me kugi eeko nogogwaarak kit mugurok nogwe nogo mbo punuk, Ala mban mugurok nogo logonip o.

¹⁵Ndi, kit nen at Aliku ALA mban mugurok noorak ti, kineebi mbakwi kenok, kinombomini nen niyo Eparat enebagan logonet, Aliku ALA mugurok nogwe obaane'me it kugi eeko nogogwaarak nogo, mugurok nogo logorak a, it aap Amori mendek inanggween paga kit wonogo logonet, Aliku ALA mugurok nogwe obaane'me inagugi mugurok nogo logorak a, nogo ti, o yogondak yi paga aret kit mban miikkolaanip o. An, nakwe, napurilogwe ninom perak, at Aliku ALA mban aret mugurok nogo logogun o,” yinuk, yoragagerak.

¹⁶Yorage mbareegi, it aakumi apit nen onggo at yogo logonet, “Nit nen at Aliku ALA mugurok nogwe nogo mbo punuk, obaane'me alik mendek mugurok noorak mondok nineebi o.

¹⁷Aakumi Metit mendek inayeloman eeppinaninuk wonogwe me, at Aliku ninogoba Ala lombok nen, Tu yi o, yinuk, o Metit nen ninombomini inom, nit inom, wo'niren wundi wage logonet, ninigen niigak, ineenu agak inagabiti warak mendek iya tit eeke, tu nggorek paga yi aakumi ndi aakumi inawi keyappiigak wogwe niinok, ninarum wonage, eereegerak o.

¹⁸Eeke nagagerik, yi aakumi ndi aakumi inanebunu lombok aakumi Amori mendek inom abok aret o yime wonogogwaarak nogo nit wumbiyaawok nduk, eekwi niigak, at Aliku ALA nen aa'nduk a'nuk, wumbiyareegerak me, at Aliku nogo ti, nit ninogoba Ala aret o, yinuk, nit kunduk, at mban mugurok nogo logowok o,” yinuk, yoreegwaarak.

¹⁹Yoreegwaarak kwe, at Yotuwa nen it aakumi nogo yorage logonet, “At Aliku ALA nogo kit nen at mugurok nogo logorak kinobambok kiigi o. At Ala ti, iniki kikak nakeelik, alik kagak obaane'me ambi mippugwi iinok, iniki laakot mbake menggerak me, kit nen at oone taganogo punuk, maluk togop eekwi kiinok, kinomaluk at nen lek eerogo pigin lek o.

²⁰At Aliku ALA mugurok nogwe nogo mbo punuk, obaane'me aakumi inagugi mugurok nogwe kiinok, at aa'nduk obeelom eeppinagage nagagerak nogo mbo punuk, melak togon aaninggin kinoba kwippinagage logonet, lek eerogo pinagagin o.”

²¹Yorage mbareegi, it nogo nen Yotuwa yogo logonet, “Lek o. Nit Aliku ALA mban aret mugurok nogo logogun o.”

²²Yogo mbareegwa, at Yotuwa nen it nogo yorage logonet, “Kit nen at Aliku ALA mugurok nogo logorak miikkologotak nogo, mbo punuk, alik eekwi kenok, kit mban-mban at ambi nen at ambi aberegak yogo logonip o.” Yorage mbareegi, “Nit yogoorak nineenu me, nit mban-mban yogo logonet, at ambi nen at ambi aberegak eeko logowok o,” yinuk, yoreegwaarak.

²³Yogo mbareegwa, at Yotuwa nen ari logonet, “Togop kenok, yogondak nen Ala mugurok nogwe obaane'me aakumi inagugi mugurok nogwe nogo ti, mbo punuk, kit kiniki at Aliku Iterali inogoba Ala nogo mban wogo'nuk, mugurok nogo logonip o.”

²⁴Yorage mbareegi, it nen Yotuwa yogo logonet, “At Aliku ninogoba Ala mban mugurok nogwe, at oone mban konembunuk eekwi, eeko logowok o,” yoreegwaarak.

²⁵Yogo mbareegwa, ne ti eyom paga at Yotuwa nen wone lengganak inom, eeko logorak wone yugu inom, it aberak logonet, eeko logowak nduk, o Tikem nogome logonet, wone abuk nggaruk togon koonogo pereegerak.

²⁶Koonogo pege nagagerik, at Yotuwa nen eeko logorak Ala wone yugu liiru mbanak wonage nogo paga liiru mbanogo pege nagagerik, yugum nggwok ambi waganogo eyo teno alome Aliku ALA ake leenak menggim taati mippereegerak.

²⁷Mippege nagagerik, it aakumi ti abok aret yorage logonet, “Yugum yi ti, at Aliku ALA nen yo'niragagerak wone abok aret konenggerak me, kit yogotak eenu kagak, Nit ninogoba Ala lek, yinuk, alik mugurok nogwe kiinok, kinenggali wappinagage logogin o.”

²⁸Yorage nagagerik, at Yotuwa nen it aakumi ti, yate kwak inanggween kologogwam nogome inalitak lombok nawak nduk, nappiyareegerak.

²⁹Wone ti nogo abok aret yorage nagagerik, wonage logonet, at Nun apuluk Yotuwa at Aliku ALA ayeloman nogo ndarak kagak, tahun seratus sepuluh eeppunuk, aret kambeegerak.

³⁰ Kangge mbareegi, puut Nggaat o omarip paga pa'nggwe o Eparayim puut nggelok-nggobok me, o Timanat-Tera yate negen anggween mbanogo pereegwam nogome aret nggween taambereegwaarak.

³¹It Iterali ti, at Yotuwa eenik wonage kagak, Aliku ALA mugurok nogwe, ndi, kangge kagak Iterali inoweewi at Aliku ALA nen Iterali eeppiige inigen kogogwaarak nogo awo ineenik wonogwe iigak kunduk, at Aliku ALA mugurok nogwe, eeko nogogwaarak.

³² Ndi, o maan togon at Yakup nogo nen aap Tikem aput Kemot apuri inanggween me, inoona onggo wu mbuti perak anggen 100 paga kuneegim nogome, it aakumi Iterali nogo nen aap Yutup owak nenenak o Metit nen wonok wogogwaarak nogo, Yutup ombowologwe yate kwak inanggween mbanak me time aret taambereegwaarak.

³³Ndi, at Eleyatat Karun apuluk nogo kangge mbareegi, o Eparayim nggelok-nggobok me o Nggibeyat at aput Pinekat anggween wogoreegwam nogome aret taambereegwaarak. 1