Read Western Dani Yotuwa 6 Bible Online

Yotuwa 6 - Western Dani bible

Yotuwa 6

¹Aakumi Yeriko mendek nogo it Iterali ineebe paga inagabiti nen o Yeriko paga yagat tungga mondok omaawi mba'nggwik eerogo nappunuk, endekem wundi wogwe, unggwi nogwe, eeka'lek aret wonogogwaarak.

²Eeka'lek aret wonogwe iigak, at Aliku ALA nen Yotuwa yoge logonet, “O Yeriko yi inom, aap endagembogut inom, awuri yigin unde wakaa'ngget inom, abok aret keenggime wokkigirak me, keenu aru o.

³Togop aret me, o wanggeko logonet, aap an neebe unde ineebe 7 nogo nen ndomba eyak paga oone pu eekak trompet negen ogobakkigirik wonok inaa'nduk nogwe, ndi, an naloobut mbanak nogo wonok it inambokan nogwe, eekwi iigak, it aap wim nambuka ineegin li'luk ee'nuk, kinom apit aret o Yeriko yugum pak wurik eraaninu endekenggwe time ne ambit paga wanggekak eekwi kiigak, ne 6 kuli aret ari nawak o. Ti eeko logomonggotik, ko'lu paga it aap an neebe unde nen oone nggwok eekak trompet nogo oone nggwok eekwi iigak, ne 7 kuli wanggeko logomunggup o.

⁵Ndi, trompet oone mondok nggwok kunik-kunik lombok eekwi kinaruk konenggo logomonggotik, kit apit aret kinoone nggwok paga keekok piyanggogwe kiigak, yugum pak wurik nogo aburen langgu-langgu wangge kenok, kit apit aret kinalitik-kinalitak yugum pak wurik langgu-langgu wambemenggerak nogo obaga mbo iname aret tebenggola unggwi namunggup o,” yinuk, yoragagerak.

⁶Yoge mbareegi, aap Nun aput Yotuwa nogo nen it aap Ala unde woraawak nduk, wiirage nagagerik, wogo mbareegwa, yorage logonet, “Wone yugu Aliku ALA aloobut mbanak me yonggolak nogo, eewu'nuk peebi nogwe iigak, kit aap Ala unde kineebe 7 nogo nen oone pu eekak trompet wonok kinaa'nduk nogo logonip o.”

⁷Yorage nagagerik, it aakumi apit yorage logonet, “It aap wim nambuka nogo nen ineegin ko'nok inaa'nduk ogwe, ndi, Aliku ALA aloobut mbanak nogo wonok it inambokan ogwe, eeppunuk, nogwe iigak, kit aakumi abok aret it inambokan muguren namunggup o,” yinuk, yoragagerak.

⁸Ti abu aret yorage mbareegi, it aap wim nambuka nogo ineegin ko'nok inaa'nduk nogo mbareegwa, it aap Ala unde ineebe 7 nogo nen oone pu eekak trompet 7 ogobakkigirik nogo Aliku ALA enegen kagak, oone pu eerit inambokan nogwe iigak, at Aliku ALA awone yugu aloobut mbanak me yonggolak nogo aret eewurik wonok inambokan wogwe, ndi, peebi it wim nambuka apit aret inambokan age mbanit wogwe, eekwi iigak, it aap Ala unde nogo nen oone pu eekak trompet oone kunik-kunik eerit wogogwaarak.

¹⁰At Yotuwa nogo nen aakumi Iterali nogo yorage logonet, “Kit nogo logonet, Wim niri mok o, yinuk, nggomookwi, kinoone yogwe at ambi konenggak eekwi, ti abu eerugup o. Ata, kinoone lek mbawok mban nogwe me, an nen, Kinoone yinip o, yokkirage neenok perak, kinoone keekok yumunggup o,” yinuk, yoragagerak me,

¹¹inoone yaga'lek Aliku ALA aloobut mbanak nogo eewu'nuk wonok ne ambit paga mban o Yeriko eraaninu wanggeri nogo nogogwaarik, iniyokan inawooliyana nogome aret nogo yi wogogwaarak.

¹²Nogo yinuk, ko'lu o awo wigangge kagak, at Yotuwa nogo eenik age nagagerik, aakumi Iterali nogo yorage, “Kobit eekoorak nogo ndak-ndak aret eeruwok o,” yinuk, yorage mbareegi, it aap wim nambuka nogo ineegin ko'nok inaa'nduk ogwe, it aap Ala unde oone pu eekak trompet 7 wonok nugwi nogo trompet wonok it inambokan ogwe, it Ala unde nen Aliku ALA aloobut mbanak nogo eewurik wonok it inambokan ogwe, ndi, peebi it aap wim nambuka apit aago inage mbanit inambokan ogwe, eeppunuk, ndegen-ndegen aago nogwe iigak, it aap Ala unde oone eekak trompet nogo oone pu, oone pu, eerit wogogwaarak.

¹⁴Oone pu eerit o Yeriko ne ambi eraaninu wanggeri nogo nogogwaarik, iniyokan inawooliyana nogo yi wogogwaarak. Togop mban eekwi iigak, nogo 6 aret yereegwaarak.

¹⁵Nogo 6 yippogo nogogwaarik perak, ko'lu o awo wiganit nage kagak, ineenik ogo nogogwaarik, at Yotuwa nen it yorage logonet, “Ne 6 paga o Yeriko wanggeko nogotak kokwak, o yogondak yi paga, ne 1 nen nok ne 6 kuli wanggeko logomonggotik, ne ambi irip paga wanggeko logonet, it aap Ala unde nogo nen oone eekak trompet oone pu eekwi iinok, at Aliku ALA nen o ti, muk wokkiragaarak me, kit apit aret keekok yumunggup o.

¹⁷O ti wokkiraagin kwe, inawi kota inom, inamindik-inamendek o time wonage inom, ti at Aliku ALA amendek at ake aret me, tigitogon aret lek eerogo pumunggup o. Ndi, kwe ya wukak Arakap ti perak, it aap o yi inigen yomboonuwak nduk, nappiya wogoorak nogo, kumaappiirogo wonagaarak me, at inom, it at ame wonogwe nogo inom, it mban teppiyaamunggup o.

¹⁸Ndi, inamindik-inamendek ti, Ala amendek at ake aret me, ugun waganggwi kiinok, kinenggaawak lek eerogo pakwi, ndi, nit aakumi Iterali ninawooliyana wonogwe me, maluk eekkologo logonet, nineebe lek eerogo pakwi, eerukwak,

¹⁹mbuti perak inom, mbuti emas inom, yi mendek ndi mendek mbuti tembaga paga ogobakkigirik inom, abe mbuti paga ogobakkigirik inom, abok ti, at Aliku ALA ake leenak aret me, at amendek kuwak eerogo mambogo menggam nogome aret mambumunggup o,” yinuk, yoragagerak.

²⁰ Yorage mbareegi, ne ti eyom paga aret ne 6 paga abu wanggeko nogogwaarik, ne ambi irip paga wanggeko logonet, it aap Ala unde nogo nen oone pu eekak trompet oone nggwok eeko mbareegwa, it aakumi Iterali nogo apit aret inaruk konenggo nogogwaarik, keekok tubuk-tubuk yogo mbareegwa, yugum pak wurik nogo mondok langgu-langgu wangge mbareegi, it apit aret inalitik-inalitak yugum pak langgu-langgu wambeegerak nogo obaga mbo aakumi Yeriko iname time aret tebenggola unggwogogwaarak.

²¹Tebenggola unggwogo logonet, aap tawe kumi tawe inom, aap inanggok kumi inanggok inom, tapi-ndomba inom, kuda-keledai inom, ineenik nugu menggaarak nogo abok aret wooluwak paga pup eerogo inoorogo piyareegwaarak.

²²Inooko logonet, at Yotuwa nogo nen it aap o inigen yombooni wogogwaarak nogo yorage logonet, “Kwe ya wukak kinom wone abuk nggaruk togon kumbuk mbanggotak nogo a'me aret lik yuwak nduk, at ame unggwogo logomonggotik, at inom, inom menggaarak inom, abok aret inaani wogoren wumbiya woraanip o,” yorage mbareegi,

²³it aap o inigen yombooni wogogwaarak nogo nen kwe Arakap ame unggwi nogo nogogwaarik, agalo-ogoba inom, iriwi inom, inom menggaarak inom, abok aret wogoren wundi wogo mbareegwa, aakumi Iterali inawooliya wuppatinuk wonogwe me, endekenggwe time logowak nduk, piya nogogwaarak.

²⁴Piya nogwe iigak, it aakumi Iterali nogo nen inawi kota inom, yi mendek ndi mendek time wonage inom, abok aret kani mbelanogo pit nogo logonet, mbuti perak inom, mbuti emas inom, yi mendek ndi mendek mbuti tembaga paga ogobakkigirik inom, abe mbuti paga ogobakkigirik inom, abok aret kuwak eerogo Aliku ALA amendek kenok, mambogo menggam nogome aret mambereegwaarak.

²⁵ Ndi, aap mbere o Yeriko inigen yombooni wogogwaarak nogo at kwe Arakap nen inili yinuk, kumaappiyareegerak paga at Yotuwa nen kwe ya wukak Arakap inom, agalo-ogoba inom, iriwi-oreewi inom, inom menggaarak inom, abok aret inili yinuk, teppiyareegerak me, it aakumi Iterali inom yogondak mondok-mondok aret wonogwe o.

²⁶ Ne ti eyom paga at Yotuwa nen ari logonet, “Aap ambi nen o Yeriko yime obaane'me wuri unggwi wage kenok ti, at Aliku ALA nen pulunogo pege logogin me, O eyak awo wurake kagak, Apuluk manggu ndarak kangge, Ndi, abu wurogo tungga ogobakkigirogo punuk, Oome puk ari unggwage kagak, Apuluk enabooluk ndarak nogo aret kangge, Eeke kaagin o,” yinuk, yoragagerak.

²⁷Ndi, at Aliku ALA nogo Yotuwa imbirak wonagagerak me, o time abok aret endage wiganinuk nagagerak.