Read Western Dani Yotuwa 8 Bible Online

Yotuwa 8 - Western Dani bible

Yotuwa 8

¹Ti'nuk, at Aliku ALA nen Yotuwa yoge, “Kat kiniki ma'nage logonet, kagabiti mbarugun o. An nen aap endagembogut Ayi mendek inom, aakumi at inarum menggerak inom, at unde menggim kota inom, anggween inom, abok aret muk keenggime pigirak me, it aap ineegin warak abok wogoren o Ayi inoba kwi'nari unggwi nanip o.

²Kwi'nari unggwogo logomonggotik, o Yeriko inom, aap endagembogut Yeriko mendek inom, abu lek eerogo piigendak nogo ndak-ndak, o Ayi lek eerogo pege logonet, inamendek inom, inaanggumi inom, nogo perak, inagugun kinalitak aret ko'nok ndi yumunggup o. Togop eeriyak me, it aap ineegin warak nogo o Ayi ambokan time ku taani nawak nduk nappiyet o.”

³Yoge mbareegi, at Yotuwa awuri ineegin warak abok aret inom o Ayi inoba kwi'nari ungguwak nduk, at Yotuwa nen aap wim nambuka wakaa'ngget mendek ineebe tiga puluh ribu leenogo piige nagagerik, oonikiya nawak nduk, wone lengganogo yorage logonet,

⁴“Kit time nogo logomonggotik, tayorogon ku taani noorak ti mage o. Ata, we korok-korok o Ayi ambokan time aret ku taanak li'luk eerak logomunggup o.

⁵Abu aret ku taani nogwe kiinok, an nawuri ninom o Ayi paga kwi'nari unggumonggoorak me, it nen, aa'nduk ninoorit wundi wagaarak togo'nogo aret ninoba wundi wogwe iinok, nit we mbaganggwi yuwak kole mbaganit woraagun o.

⁶Mbaganggwi yuwak eekwi niinok, it aakumi Ayi mendek nogo nen, It aa'nduk mbaganggaarak togo'nogo aret mbaganggo agaarik o, yinuk, mu'niren wogwe iinok, mbaganggwi yuwak nigiren wogwe niigak,

⁷kit ku taanak logomonggotak nogo pilak yogo logomonggotik, o Ayi paga kwi'nari unggwi wogwe kiinok, at Aliku kinogoba Ala nen o ti, kineenggime wokkiraagin o.

⁸Wokkirage kenok, inawi kani mbelanogo wumbiigo logonet, Aliku ALA nen eeriyak yokkiragaarak ndak-ndak aret eerumunggup nduk, an wone lengganogo yokkirage yi, liippinip o.”

⁹Yorage mbareegi, o Mbeten arugwan wonage kagak, o Ayi oonegen kilu yi nage menggim pa'nggwe o oolo alu'me time aret ku taani nogwe iigak, at Yotuwa nogo aakumi Iterali ando inom time aret nogo yereegerak.

¹⁰Nogo yinuk, ko'lu kuubondendok at Yotuwa nogo o Ayi noorak nduk, it wim nambuka nogo kuwak eeppiinok, at Yotuwa inom, aap Iterali inoweewi apit aret inom, inaa'nduk ogwe,

¹¹ndi, it at awuri ineegin warak abok aret inage mbanit peebi ogwe, eeppunuk, o Ayi nogome aret panggo yi nogo nogogwaarik, o Ayi yime pa'ne kagak, o kobappaga oolo kagak, enebaga o omarip paga pa'nggwe time nogo yuwok nduk eereegwaarak.

¹²Nogo yuwok nduk, eeko logonet, at Yotuwa nen aap wim nambuka ineebe lima ribu negen wogonake nagagerik, o Mbeten arugwan wonage kagak, o Ayi oonegen kilu yi nage menggim pa'nggwe o oolo time enaarak a nawak nduk, nappiyareegerak nogwe iigak,

¹³at Yotuwa nen it ineegin warak apit aret o Ayi o omarip paga pa'nggwe wonogwe me taa'nogo koonogo piige nagagerik, oonikiya ti eyom paga o kobappaga time aret wambi nagagerak.

¹⁴Ndi, ko'lu kuubondendok aap endagembogut o Ayi mendek nogo nen aap ineegin warak Iterali nogo enegen iige nagagerik, it Iterali ando o kota ambokan enaarak wonogwe nogo eenggo'lek logonet, o Araba nonggologo pereegim kobappaga aa'nduk mappiigo nogogwam nogome Iterali inom wim namburuwok nduk, awuri inom abok aret wundi wogogwaarak.

¹⁵Wundi wogo mbareegwa, at Yotuwa awuri inom nogo nen, Ninoori worookwak, yinuk, we pilit aret mbaganit wogwe yuwak kole tu o karume time mbaganit wogwe me,

¹⁶it aap Ayi mendek abok aret at Yotuwa awuri inom mugogo mappiyaawak nduk, wiirogo nogogwaarik, o Mbeten inom, Ayi inom, time aap ambi abu logolik tu paarak naka'lek mbo punuk, it apit aret mbelek togon Iterali muguren wundi wogo mbareegwa, it aakumi Iterali nogo wogwe yuwak nigiren o nda ari wogogwaarak.

¹⁸Ari wogo mbareegwa, at Aliku ALA nen Yotuwa yoge logonet, “An nen o Ayi nogo apit aret kat keenggime wokkirigin me, wooluwak keenggime wonage ti paga o Ayi pa'nggwe time titik eerogo nappu o,” yoge mbareegi, at Yotuwa nen awooluwak nogo o Ayi pa'nggwe time titik eerogo nappereegerak.

¹⁹Awooluwak nogo awo titik eerogo nappege kagak, it aap wim ku taani nogogwam nogome nen pilak yinuk, wundi wogo nogogwaarik, o kota nogo paga kwi'nari unggwi wogo logonet, mbet-mbet aret o kani pereegwaarak.

²⁰Pogo mbareegwa, it Yotuwa oreewi inom o karume mbaganit wogwe yuwak eekwi nogo inigen inambokan na'nogo nogogwaarik, inoreewi ku taani nogogwaarak nogo o Ayi unggwi wogo logonet, o kota kani pereegwaarak ka'luk lagangge inigen kogo nogogwaarik, ina yungguk yogo logonet, it Ayi mendek muguren wogwe nogo inoorit nogo mbareegwa, it Ayi mendek mbaganuwok nduk, ina na'nogo nogogwaarik, inawi kani nengge ka'luk mbogut paga lenggeni lagangge, ndi, it Iterali ku taanak nogo o kota nen muguren wundi wogwe, eekwi inigen iigo nogogwaarik, “Abu aret ku'mbanninakwi me, nonggop mbaganuwi o,” yinuk, yogwe wonogwe me, it Iterali agi nen, ogu nen, wogo logonet, ineebe ambiriluk ambi ineenik teppiigwi, ambi mbaganggwi, eerulik tigitogon aret inoorogo piyareegwaarak.

²³Inoorogo piigo logonet kwe, aap Ayi mendek inowe endagembogut nogo perak, eenik kagak, Yotuwa owagam pi wogogwaarak.

²⁴It ando yabume inom, karume inom, mbaganit nogwe me, nappiigak-wappiigak eerit wooluwak paga abok aret inoorogo piigo nogogwaarik, iniyokan yungguninuk, o Ayi unggwogo logonet, aakumi ando wonogwe nogo inoorogo piyareegwaarak.

²⁵At Yotuwa nen awooluwak nogo tebeppega'lek titik eepporogo kagak, it o Ayi wonogogwaarak abok aret inooreegwaarak nogo ti, kumi-aap ineebe lambuk togon dua belas ribu aret inooreegwaarak.

²⁷Ineebe ti, inoorogo piyareegwaarak kwe, at Aliku ALA nen Yotuwa wone yoreegerak nogo ndak-ndak it aakumi o kota Ayi mendek inaanggumi inom, inamindik-inamendek inom, abok aret inagugun inalitak lombok aret ko'nok ndi yereegwaarak.

²⁸Yotuwa awuri inom o Ayi abu aret kani pogo nogogwaarik, o Ayi paga yi mendek ndi mendek yanggunik-panggunik aago kalo logonak o wogo logowak nduk, teppereegwaarak me, o yogondak togop aret wonage o.

²⁹Ndi, aap Ayi mendek inowe endagembogut nogo eyo paga ndanunogo punuk, mippereegwaarak wonage kagak, oonegen kilu yi nage mbareegi, aap warak nogo waganogo o kota tu unggwogo menggam ambe paga mbo wuppunuk, yugum kalo logonogo pereegwaarak, o yogondak wonage aret o.

³⁰ Eeko logorak wone at Aliku ALA nen Muta yoreegerak liiru mbanak nogo paga Aliku ALA ayeloman Muta nen aakumi Iterali yoragagerak nogo ndak-ndak, at Yotuwa nen puut Eban paga at Aliku aakumi Iterali inogoba Ala ake warogo kani kunggak ogobakkigike logonet, mbuti tege paga yugum poorak lek yugum tumbu paga mban ogobakkigirogo punuk, nogo paga at Aliku ALA ake warogo kani kunggwi, Ala inom lambunik logowak nduk, ake pugwi, eereegwaarak.

³²Eeko nogogwaarik, Aliku ALA nen wone yereegerak Muta nen liiru mbaneegerak nogo, at Yotuwa nen waganogo aakumi Iterali inenggaanom yugum paga ayo waganogo pereegerak.

³³ Pege mbareegi, it Ala unde inanebunu Lewi mendek nogo nen Ala wone yugu aloobut mbanak me yonggolak nogo eewurik oolo porogo iigak, it aap Iterali inoweewi inom, wim wone mbangga inom, inowak loongga inom, aap nggiru inaworak Iterali abok aret kuwak eeppunuk, Ala aloobut mbanak inengga loolo logonet, it ando mogonogo puut Nggeritin paga ina na'nogwe, ndi, ando mogonogo puut Eban paga ina na'nari wogwe, eeko mbareegwa, “It aakumi Iterali ale'nggen inoba piigo logonet, ndogop eeko logomunggup o,” yinuk, at Aliku ALA ayeloman Muta nogo nen yoragagerak nogo ndak-ndak aret eereegwaarak.

³⁴Ti eeko mbareegwa, ale'nggen inoba piyoorak wone inom, pulunogo piyoorak wone inom, eeko logorak wone yugu mbuku paga liiru mbanak ndak-ndak it aakumi Iterali kuwak eerak inom, kumi inom, elege-aabologwe inom, aap nggiru inom wonogwe nogo inom, abok aret inenggaanom paga at Muta nen, “Yogop ee'nu ndogop ee'nu,” yoragagerak nogo ambiriluk ambi wuppuulik abok tigitogon at Yotuwa nen mbininiragagerak.