Read Western Dani 2 Tetalonika 1 Bible Online

2 Tetalonika 1 - Western Dani bible

2 Tetalonika 1

¹ Noreewi o. Kit Ala apuri ninogoba Ala ninowe Yetut Keritut kinom kunik o Tetalonika kuwak eeko monggotak nogo, an Pawulut inom, Tiliwanut inom, Timotiyut inom, nen wone ambi yokkiraawi o.

²Ninogoba Ala ninowe Yetut Keritut imbirak iniki kunik nen wokkirogwe, kit kiniki ugun tayenak ale'nggen logobagip nduk, eeppinagagwi, eeko logogun o.

³Noreewi o. Kit eekwi paga nit puk logorak meek ee'ninake kenok, Ala mondok, “Wa,” yogo monggoorak. Kit abet mbakwi nogo piyok ari lek omaawi arit unggwage, ndi, niniki-kiniki kunik aganakwi ti, nggwok arit nage, eeke me, “Ala wa,” yogo monggoorak nogo ti, op aret eeko monggoorak o.

⁴Togop me, kit piyak-payak eerogo pinagagwi, aaninggin kinoba pinagagwi, eekwi kwe kagak, kinogogumbuk logonet waganggwi me, kiniki mondok nu'lek logonet abet mbakwi nogo, Ala apuri yi awi ndi awi kuwak eerit nogo menggaarak nit yoranet nogo logonet, tiyappinagit nogo monggoorak.

⁵Kit Ala abu'me logorak miikotak kenok, maluk eeppinagagwi nogo ti, Ala nen, “Kit obeelom aret me, nabu'me logorak op aret o,” yokkiraawak nduk, kinogogumbuk logonet, waganggwi me, Ala nen koonogo pinanege nogo ti, maluk lek obeelom aret koonogo pinanege menggerak nineenu ogo o.

⁶At Ala iniki koonak a'me nggelok eeke menggerak me, it nen aaninggin kit kinoba pinagagwi nogo, onggo at nen it aaninggin inoba piyaagin o.

⁷Ndi, yogondak aaninggin kit kinoba wonage nogo, peebi nit ninom niniki tayenogo pinanigin o. It waka'ngget mondok tiyanak menggaarak malayikat nogo ninowe Yetut inom mbogut paga nen kani omoonuk enggela'me wambi wogo logonet,

⁸it aakumi Ala ineenggo'lek obeelom wone ninowe Yetut eeke nagagerak wone nogo wagangga'lek iinok, maluk onggo wogora woraagin eyom nogo paga niniki tayenogo pinanigin o.

⁹Ti eyom paga nit at apuri ake leenak nogo nen at eebe tiyappugwi, ndi, nit wone paganogo yokkirogogurak paga abet mbareegutak me, kit ninom abet mbakwi abok aret, “Wi!” ugwi, eeruwok nduk, woraagin o. Wage kenok, it Ala ineenggo'lek Yetut eeke nagagerak obeelom wone wagangga'lek mendek nogo, maluk onggo mondok-mondok aganabuwak nduk, at Ala nen, “An nomaawi paga eeppiinet nage neenok, aakumi nen, Wi! nugu menggam nenggaawak paga yayi logorak lek o,” yinuk, ogoorogo endekem wumbiyaagin o.

¹¹At ninogoba Ala nen obeelom eerit nogo logobagip nduk, kinayonggo pereegerak nogo ndak-ndak eerit nugwi kiinok, “Op eekotak o,” yinuk, yokkirage, kit obeelom eeriyak mbakwi nogo eerubagip nduk, omaawi eeppinagage, ndi, at abet mba'nuk eeriyak mbakotak nogo ndak-ndak eerubagip nduk, omaawi eerogo pinagage, eeke logowak nduk, kinake tamban mban eeko monggoorak.

¹²Ninogoba Ala at ninowe Yetut Keritut imbirak iniki kunik nen eeppinagagwi iigak, kit togop aret eerit nogo logonet, at tiyappugwi kiinok, at nen kit kunduk tiyappinagage logogin o.