Read Western Dani 2 Tetalonika 2 Bible Online

2 Tetalonika 2 - Western Dani bible

2 Tetalonika 2

¹ At ninowe Yetut Keritut wage kenok, nit at ninom kuwak eeriyak wone nogo yokkiraawi o.

²Ninoreewi o. It aakumi nen, “Ninowe woroorak eyom abu panggoni wagaarak o,” agan wogo logonet, at ambi nen, “Ala nen wone yo'nege kenok, yokkiragi o,” ari, ndi, ambi nen, “Lek o. Pawulut nen liiru mbaneegerak me, yokkira o,” yinuk, ari, agan wogwe iinok, kinagabiti nen kiniki ma'nogwe kiyo nduk, yokkirogo o.

³It aakumi pilit togop agan wogo logonet, kinambokan laganukwak, liippiigo logonip o. Ninowe woroorak nogo ti, aakumi nen Ala wone, “Nineebi o,” yinuk, mbo pugwi, ndi, at mondok maluk eeka lek eerogo puurak ake lengganak nogo, kin ari wage, eeka'lek iigak, woraagin lek o.

⁴ It aakumi nen yi mendek ndi mendek mippunuk, “Ninogoba Ala aret o,” yinuk, ayuk wukwi, kugiwak ogobakkigirogo punuk, alut eekwi, eeko menggaarak abok aret, at mondok maluk lombok eeka nogo nen tebenogo piinok, at alik tiyappake logonet, Ala awi wurik me mi'nari unggwage logomenggerik, “Kinogoba Ala an aret o,” yinuk, yorage logogin o.

⁵An aa'nduk kit ninom logonet, wone yi apit yokkiragagirak nogo abeko ogotik ilik, lek a?

⁶At maluk eeka nogo ti, mbet-mbet woraagin lek o. Ndiyom paga kin ari woroorak koonak wonage nogo paga mban woraawak nduk, at ambi nen tebemborogo wonage nogo kineenu aret o.

⁷At kumaat-kumaat maluk eerit nage menggerak nogo ti, muk eerit nage kwe, at tebenogo pege menggerak nogo wonok lagangga'lek kagak, maluk nggwok wigak yigin lek o. At tebenogo pit nage me, tebenogo pit nage logogin aret o.

⁸ Wonok lagi nage kenok perak, at maluk lombok eeka nogo kin ari woraagin o. Kin ari wage logomenggerik, at Ibilit eeke menggerak ndak-ndak at omaawi paga eerit nege logonet, “Ala omaawi paga eeke,” mbaruwak nduk, inagabiti worak mendek eeke, eerubok mendek eeke, tam warak negen eeke, eeke logonet, it aakumi Ala nen inagap ndaruwak nduk, wone abet aret ari menggerak inikilom mba'nuk wagangga'lek logomenggaarak paga maluk agago piyoorak nogo, inambokan laganikit nduk, oone alik negen pugunogo yoranet unggwage logogin o. It aakumi Ala ari menggerak wone wagangga'lek maluk eeriyak mban inikilom mbarit nugwi nogo abok aret, at Ala nen, “Inowak loombunuk, maluk inoba piyaakit o,” yinuk, pilit wone agan wage nogo abet mbaruwak nduk, iniki apit agago piyaagin o. At maluk lombok eeka ti nen togop eerit wage me, ninowe Yetut mondok tiyanak ayuk worak wage logonet, ambe aagi paga eebe mondok warogo lek eerogo pi woraagin o.

¹³Kit noreewi o. Nit ninowe nen iniki kunik eekkinabeegerak nogo kit aret kiinok, “Ala wa,” yoriyak mban ee'ninake menggerak. Kit Ala ari menggerak wone abet mbakwi kiinok, Ala apuri logobagip nduk, Aberiniki nen leenogo pinagage kagak, Ala nen, “Kinagap ndarikit o,” yinuk, kit kinaa'nduk togon miikkinabeegerak me, “Ala wa,” yoriyak mban ee'ninake menggerak.

¹⁴Kit togop aret eekkinabuwak nduk, nit obeelom wone yokkirogwe niigak, wiigiragagerak nogo o. Nit ninowe Yetut Keritut mondok tiyanak menggerak kit kinom ndak-ndak tiyanak logobagip nduk, wiigiragagerak.

¹⁵Togop me, noreewi o. Ninoone paga yokkirogo nogogurak inom, liiru mbanak paga yokkirogo nogogurak nogo inom, kiniki nu'lek logonet, wone ti, nggirik-nggerok agago porogo logonip o.

¹⁶Kit obeelom eerit nugwi, wone obeelom mban yoranet nugwi, eeko logobagip nduk, at ninabuwa mba'nuk iniki kunik ee'ninake logonet, niniki mondok-mondok eyak wappinanege, niniki lunik abe nogo mendek wo'nirage, eeke menggerak ninogoba Ala nogo inom, ninowe Yetut Keritut inom, imbirak nen kit kiniki eyak wappinagagwi, kinomaawi eerogo pinagagwi, eeko logowak o.