Read Western Dani 2 Tetalonika 3 Bible Online

2 Tetalonika 3 - Western Dani bible

2 Tetalonika 3

¹Ndi, ninoreewi o. Wone abu aret yokkirogoorak kwe, irip paga iluk ambi yi aret me, yokkiraawi o. Nit ninowe wone waganggo nogogutik, wiganinuk wundi nogo logonet, tiyappit nogo nogogutak nogo ti kokwak, nit togop aret yi awi ndi awi wiganinuk mbet-mbet nogo logowok nduk, ninake tamban eeko logonip o.

²Ndi, it aakumi abok aret abet mbaka'lek me, it aap maluk eeka abu maluk lombok eerit nugwi ti nen, nit maluk eerogo pinanukwak, ninogoba nen ninagap ndaruwak nduk, ninake tamban eeko logonip o.

³At ninowe perak, mbo pinanegeelik mondok liirogon ninake eeke menggerak me, at nen kinomaawi eeppinagage, ndi, at maluk eeke menggerak nen maluk eeppinagukwak kinarum wake, eeke logogin o.

⁴Kit eeko logorak wone lengganogo yokkirogo monggoorak nogo ti, muk eekwi nineenu aret kwe, ambinom eeko logobagip nduk, ninowe nen eeppinagagin abet aret mbako ogoorik o.

⁵At Ala nen yi aakumi ndi aakumi iniki kunik aganake menggerak nogo kokwak kit ndak-ndak eeppiinet nugwi, ndi, Keritut maluk mendek oba age kagak, yanggonak wonagagerak nogo kokwak, kit togop aret yanggonak wonogwe, eeko logobagip nduk, Ala nen eeppinagage logowak lak, “Ao,” kinombako ogoorik o.

⁶Ndi, ninoreewi o. Wone, “Ndogop eeko logonip o,” yokkirogo nogogurak nogo, kinoreewi ando eeka'lek ineenggi tanep we nugwi iinok, kinom nugu logorak mage o.

⁷Kit ninom logonet, nit we logolik nggik-palek eerit nogogurak nogo kineenu lombok aret me, eerit nogogurak nogo kit ndak-ndak eerit nogo logonip o.

⁸Ninom logonet, kinambi onggo lek we ambi nonggo logolik o. Nit time wogo nogogurik, kit aaninggin ambinom kinoba pinagukwak, ko'lu-kii'me eerit mban nogo logonet, ndeyak eerogo pinaneegerak nogo kineenu aret o.

⁹Kinamendek wo'nirogwe we noorak op aret kwe, nit eerit nogwe paga ninowakkagak kit ndak-ndak eeko logobagip nduk, eereegurak.

¹⁰Ninom logonet, “Aap ambi yabu eeka'lek kenok, mbi magariyak mage o,” yokkirogo nogogurak nogo o.

¹¹Kit ando kit kinobaalombok eekkolaga'lek aakumi inobaalombok mban eerit nugu logonet, yabu eeka'lek we ugun-ugun eerit nugwi yogwe iigirak me nduk, yokkirogo.

¹²“It aap togop eekwi ti, ineyabu liirogon eekkologo logonet, it inambi mban nonggo logowak o,” yinuk, wone ti abok aret ninowe Yetut Keritut nen yo'niragagerak me, lengganogo yokkiragi o.

¹³Ndi, ninoreewi o. Kit perak, obeelom eeppiinet nogwe paga anggon eekkinake kenok, “Nineebi,” mbarugup o.

¹⁴Nit wone yokkirogwe liiru mbanak yi, at ambi nen, “Eeriyak, neebi o,” ari kenok, aap ti, eebe liippogo logomonggotik, enggali aruwak nduk, kinom nugu logorak mage o.

¹⁵“Ninawim kwak me,” nduk, eeppuurak ti lek o. Ata, “Ninore aret me,” mba'nuk, we aruk liirogon aret wa'nip o. Wone yokkirogoorak yi abok aret ninowe Yetut Keritut nen yo'nirage kagak lengganogo yokkirogo o.

¹⁶Ndi, yogondak niniki ugun tayenak ale'nggen logowok nduk, eeppinanega ninowe nogo nen yi eekak ndi eekak abok aret eerit nogwe kiigak, kiniki ugun tayenak ale'nggen logobagip nduk, kinarum logonet, eeppinagit nage logogin o. Kit abok aret ninowe kinom logogin o.

¹⁷“At Pawulut nen aret liiru yi mbanggerak kagi,” yinuk, yelok kaawak nduk, irip paga keyage wappiige wone ti, an nen aret mbangge minggirak me, liiru yi, “At nen aret yo'niragaarak,” mbarubagip nduk, irip paga keyage wappinagage wone yi, an neenggi lombok paga nen aret mbanggiragi o.

¹⁸At ninowe Yetut Keritut iniki kunik nen kit abok aret eeppinagage logonet, kinarum logogin o. Wa!