Read Western Dani 1 Timotiyut 2 Bible Online

1 Timotiyut 2 - Western Dani bible

1 Timotiyut 2

¹Wone aa'nduk yokkiriyak mbakirak nogo yokkiri o. Yi aakumi ndi aakumi abok aret inake Ala nggino yoge, tamban eeke, aakumi inake yoge, eeppagage nogo, “Wa,” yoge, eeke logonok nduk, noone nabek togon yokkege agarik o.

²It aap inendagembogut inom, aap yo'nggok abok aret inom, nen ninarum abe wonogwe iigak, niniki warak a'nuk, Ala liirogon mugurok nogo logonet, niniki ugun tayenak ale'nggen logowok nduk, it inake tamban eeke logot o.

³Togop eekwi kiinok, ninagap ndaka Ala inikilom mbake menggerak me, ti eeko logorak op aret o.

⁴At nen yi aakumi ndi aakumi abok aret inagap ndappunuk, at ari menggerak wone nogo ineenu aruwak lak, “Ao!” inombake menggerak.

⁵At Ala ambit aret menggerak. Ndi, aakumi inom, Ala inom, terak inake yonggo nappegak aap ambit Keritut Yetut aret o.

⁶Yi aakumi ndi aakumi abok aret at eebe paga inonggo mbambunuk, wondet agago piyareegerak. Ti eereegerak nogo ti, Ala nen yi aap ndi aap abok eeppiyoorak kooneegerak pagak yuurak eyom panggoni wagagerak me, aret pagak yereegerak.

⁷Ala nen yi aakumi ndi aakumi abok eeppiyoorak kooneegerak nogo, it aap endekem mendek Ala ari menggerak wone ineenu a'nuk, abet mbariyak wone nogo, agan nage logokit nduk mippanege, ndi, yi awi ndi awi yoranet nege logokit nduk, nappiigak agago panege, eereegerak o. Wone ti, pilit lek abu abet aret yokkigi o.

⁸Togop me, it aap yi awi ndi awi abok aret inanini mbakwi, wone wakwi, eeka'lek obeelom mban logonet, ineenggi nippunuk, tamban eeko logowak nduk, “Ao!” lombok inombake minggirak.

⁹ Ndi, it kumi iniki warak nen inayum-inagali liirogon yikkologo mengga kwak, yi kumi ndi kumi abok aret iniki warak a'nuk, togop aret inayum-inagali nggirik-nggerok liirogon aret yikkologo logowak o. Ineeruwak awi wuppunuk laanggwi, mbuti abinakwi mendek yirikwi, eyoonggen laambu kigirikwe nogo mendek yikkologwe, ndi, yum onggo nggwok kenok mban kunogo yirikwi, eekak yuurak ti mage o.

¹⁰Ata, it kumi Ala wone liippunuk, mugurok nogo menggaarak mendek nen inayum-inagali liippunuk yikkologo mengga kwak, yi obeelom ndi obeelom eeriyak nogo ti, ndak-ndak aret liippunuk eerit nogo logowak o.

¹¹It kumi nogo ti, inoone lek aap inabu'me kwi'na'nuk wone mamunggologo logowak o.

¹² At Kawa aa'nduk lek o. Aram aa'nduk wakkagagerak me, kumi ti, inoone lek logonet, inoreewi inoone liirogon konenggo logowak o. Ibilit nogo nen aap Aram ambo'me laganulik. Ata, kwe ambo'me lagangge mbareegi, kwe nogo nen maluk eereegerak me, “Kumi nen aap mamunirogwe, ndi, it kumi nen aap inabu'me piinok, Yi eeri nak, ndi eeri nak, yorogwe, eeko logorak ti mage o,” yinuk, ari minggirak.

¹⁵Kwe nogo maluk eereegerak ti kwe, it kumi nogo iniki warak logonet, Ala wone abet mbakwi, aakumi iniki kunik aganakwi, ndi, maluk eeka'lek Ala ake leenak wonogwe, eekwi iinok perak, it inaagalogwe ndaganakwi iigak, Ala nen inagap ndaganake logogin o.