Read Western Dani 1 Timotiyut 3 Bible Online

1 Timotiyut 3 - Western Dani bible

1 Timotiyut 3

¹“Aap ambi nen, An Ala apuri unde logokit, mbake kenok, at mbakerak nogo ti, op aret o,” yinuk, aakumi nen yogo menggaarak nogo ti, abet aret yogo menggaarak o.

² Aap ambi Ala apuri unde logorak mippuurak mbakwi kenok ti, aakumi inoone at oba pugulik kenok, akwe ambit wogo kenok, iniki tum waka kenok, iniki warak kenok, li'lak mban eeke menggerak kenok, inanoniya laka kenok, aakumi op mamuniroorak kenok,

³amburu kumili aganake ndonggorogon nenggeelik kenok, anini mbet-mbet wunggeelik iniki yanggonak kenok, yawi pegeelik kenok, wu inikilom mbakeelik kenok, aap togop mendek ti, Ala apuri unde logorak mippiyoorak op aret o.

⁴Aap ambi Ala apuri unde logorak ti, ayuk warak logonet, at apuri liirogon ndegeninake menggerak kenok mban mippuurak.

⁵Aap ambi nen at apuri lombok liirogon kooninake logorak kobak menggerak kenok, Ala apuri ti, nonggop togon kooninake logogin mbakop?

⁶Aap awo ngget iluk Ala miikerak kenok mippuurak lek o. Ibilit iniki wogoppake mbareegi, maluk eeppereegerak nogo kwak, aap ti, togop iniki wogoppatemenggerak paga maluk eeppege kero, mippuurak lek o.

⁷Mippugwi iinok, maluk eeremenggerak paga aakumi nen abok mbanggwi iinok, pagi keele pugu enggaanok nggerok ari menggi kwak, Ibilit nen aap ti, togop aret iniki nomongge kero, it aap endekem mendek nen at eeke abok mbanggo logonet, “Aap ti, obaabut koonak aret o,” yogwe iinok mban mippuurak o.

⁸Ndi, it aap yeenggwaaragak nogo, togop aret it inayuk warak logonet, inoone mbere lek ambiret mban yogo menggaarak kenok, anggur amburu kumili aganake menggerak ndonggorogon nunggulik kenok, wu kolaawok nduk aakumi wi-wi eeginakulik kenok,

⁹ndi, wone kote kumaarak wonagagerak niniki abet mbakwi wone nogo porogo logonet, iniki obeelom koonnage kenok mban eekwi kenok, aap ti mendek mippiyoorak op aret o.

¹⁰It aap yeenggwaaragak logorak ti, aa'nduk inabut mbambunuk, inoone inoba piigulik kenok, mippiyoorak op o.

¹¹It inakuwi ti togop aret inayuk warak logonet, wone inambe irip paga wonok nugulik kenok, iniki warak kenok, ndi, yi eekwi ndi eekwi ineenggi omaawi eerit nugwi kenok, kumi togoti mendek iinok, it inogonggelomini aap yeenggwaaragak mippiyoorak op aret o.

¹²It aap yeenggwaaragak ti, inakuwi ambit wogo kenok, ndi, inapuri inom, it at inom menggaarak inom, ndegeninako logonet, wone liirogon lengganogo yorogwe iinok mban mippiyoorak op aret o.

¹³It aap yeenggwaaragak eerit nugu menggaarak nogo abe koonak eekwi iinok, inendage warak aret logogun o. Ndi, nit niniki Keritut Yetut oba panggombunuk abet mbakwi wone nogo, it inagabiti mbaka'lek logonet, yoranet nugu logogun aret o.

¹⁴An mbet-mbet keya woraakit nduk, niniki lunik logonet, wone yi, liiru mbanggege kwe,

¹⁵ambi yiluk ari kagak eerukwak, Ala apuri inenggela'me logonet, nonggop eerit nege logorak keenu a'nok nduk, liiru yi mbanggege agarik o. Wone Ala ari menggerak wone o eyak nu'lek wuraberak ti, Ala mondok eenik menggerak apuri kuwak eeko menggaarak nogo aret.

¹⁶Nit Ala wone abet mba'nuk waganggo monggoorak kote kumaarak lombok wonagagerak nogo yi o. “At aap aret kin ari wage mbareegi, Yi Ala aput, mbaruwak nduk, Aberiniki nen kin eeppereegerak. Kin eeppege mbareegi, it malayikat nen at eebe inigen kogwe, Ala wone ineenggo'lek mendek wonogome yoranet nogwe, it aap abok aret at abet mbakwi, eeko mbareegwa, Wi, ugwi iigak, wonok laganeegerak o,” yinuk, yogo menggaarak nogo mondok abet aret kogo o.