Read Western Dani 1 Timotiyut 5 Bible Online

1 Timotiyut 5 - Western Dani bible

1 Timotiyut 5

¹It aap inanggok iinok, koone omaawi paga mberiraagun o. “Yi nogobamini kwak me,” yinuk, iniki eyak wappiige logot o. It aap tawe ti, kat kawuri kwak,

²it kumi inanggok ti, kagalomini kokwak, ndi, kumi tawe ti, kat kiriwi kokwak me, it paga kiniki me maluk mondok abeka'lek logonet, yorage logot o.

³It kumi togwe inaagalogwe inarum liirogon wonogwe lek iinok, liippiige logot o.

⁴Kumi togwe inaagalogwe-inowowologwe wonogwe iinok perak, it nogo nen Ala wone ndak-ndak eeruwak nduk, inagalomini- inowogolomini it inaa'nduk yeenggwaarogo logowak o. It inagalomini-inowogolomini nen inaagalogwe-inowowologwe ndegengginako nogogwaarak nogo onggo yogondak it togop aret ndegeninako logowak o. Togop eekwi iinok, Ala inikilom mbake menggerak.

⁵Kwe ambi togwe aret kwe, aagalogwe nen yeenggwaaga'lek kenok, “Ala nen yeenggwaanege logowak o,” yinuk, iniki Ala paga lunik logonet, ko'lu-kii'me Ala nggino yoge, tamban eeke, eeke menggerak kenok, kwe ti, abe togwe aret o.

⁶It kumi ineenggi eekwi lek amburu warak mban na mbarit nugwi iinok ti, ineenik wonogwe kwe, kambak negen aret wonogwe o.

⁷Kumi togwe togop eekwi iinok, aakumi inoone inoba piyookwak, wone ti, kulinik-kalinik koone omaawi paga inaruk wake logot o.

⁸Aap ambit-ambi at owe-awot ndegeninakeelik ti, maluk aret kwe, at apuri lombok ndegeninaka'lek kenok perak, it aakumi abet mbaka'lek mendek ti, we maluk mbuuluk negen kwe, aap ti perak, maluk mondok nggwok aret eeke menggerak o. At abet mbareegerak nogo ti, mbo pereegerak aret wonage o.

⁹Kwe ambi nda'nagagerak kagak tahun 60 eeka'lek kenok, endage mbaniyak lek o. Ata, ogonggelo ambit wogo kagak togwe pugu kenok,

¹⁰“Yi obeelom ndi obeelom eeke menggerak,” yogwe iinok, aagalogwe liirogon tawe eeginaka kenok, aap nggiru inanoniya laka kenok, it Ala apuri ake leenak iniyok koorinaka kenok, it aakumi aaninggin inoba agaatak iniki eyak wappiiga kenok, ndi, yi obeelom ndi obeelom eekwi abok aret, “An unde o,” yinuk, eeke menggerak kenok, endage mbaniyak op kwe,

¹¹it kumi togwe awo ndugum iinok perak, inendage mbaniyak lek o. It kumi ti, iniki nengge kenok, Keritut wone waganeegwaarak mbo punuk, aap alik koloorak koonugun me, inendage mbaniyak mage o.

¹²It aa'nduk mugurok noorak miireegwaarak nogo mbo pugwi paga maluk aret eekkologo logogun o.

¹³Ooluk-ooluk nogo yit nogo logonet, ineenggi lebenak eekko'net nugu menggaarak. Ti mban eerit nugwi ti lek o. Ata, wone inambe irip paga wonok nugwi, ambi me wok yagak nugwi, eerit nugu logonet, wone yuurak lek nogo mendek kagak ugun agan nugu menggaarak.

¹⁴Togop me, it kumi ti nen ambi eeremenggaarak paga it ninom ogoorak nogo nen ninenggali wappinanukwak, it kumi ndugum me togwe piyamenggerak nogo, inogonggelomini kologwe, inaagalogwe ndaganakwi, inamelak wogo eekwi, eeko logorak op aret mbake agarik o.

¹⁵Kumi ando perak, Ibilit mugurok nugu logowok nduk, muk iniyok paga yungguninuk nogo agaarik o.

¹⁶Kwe iniki abet mbake ambi nen agalo togwe wonage kenok, it Ala apuri abunuk aaninggin inoba piyookwak me, at aagaluk nogo nen yeenggwaage logowak o. Ndi, it kumi togwe aret kwe, inaagalogwe lek iinok perak, it Ala apuri nen yeenggwaarogo logowak o.

¹⁷ Ala nen ari logonet, “Lembu nen iniyok gandum anggen mbelanit nage kagak ando nunggwi iyo, inambe keele maarogo piigo logorak mage o,” ari, ndi, ambi, “It aap yabu eeko menggaarak yabu onggo woorak op aret o,” yinuk, ari, yereegwaarak liiru mbanak wonage me, it aap Ala apuri unde menggaarak inendage tiyanak kwe, obeelom lombok inarum wonogwe me nduk, inendage ambinom tiyappuurak ti op aret o. It Ala wone nggwok paga yorogwe, wone mamunirogwe, mondok nabenak mban eekwi iinok ti, abunuk ambinom inendage tiyappiigo logonet, liippiigo logowak o.

¹⁹ Aap mbere ilik, kenagan a, nen, “Togop eekerak o,” yinuk, yogwe lek iigak, at ambiret nen mban aap Ala apuri unde menggaarak ambi oone oba pege kenok, at oone koneniyak ti, lek o.

²⁰ Aap ambi nen maluk mban eeke kenok, it aakumi abok inagabiti mbaruwak nduk, nggwok paga aruk wake logonu o.

²¹An nogo, Ala inom, Keritut Yetut inom, it Ala ake leenak malayikat nogo inom, abok inenggaanom paga an wone yi, lengganogo yokkigi o. An wone lengganogo yokkege yi, abok aret eeke logonet, kat kinom kunik kenok eeko logorak yoraga'lek mbo piige, ndi, aakumi ugun kenok eeko logorak yorage, eeke logogun o. Ata, aakumi abok aret ineenu a'nuk, eeko logowak nduk, yorage logot o.

²² Ala apuri unde logowak nduk, inanobak mbet-mbet tebeniyak mage o. It ambi maluk eekwi iinok, kat kinom nabenggoloorak ti mage mban o. Kat kiniki kikak naka'lek mondok alik leenak logot o.

²³Kat kaanogum andi eekkake, keebe kuluk-kuluk ndeyak eekkake, eeke menggerak me, kat niyo mban nengge logogun o. Ata, anggur amburu mbuuluk inom nenggak eeke logot o.

²⁴It aap mippiyoorak nduk, inabut mbangge logonet, aap ando maluk eekaatak kenom age kenok, mbo piigo menggaarak kwe, it aap ando perak, inomaluk nobarak kagak, mippiigaatak me, peebi inomaluk kenom aret age menggerak.

²⁵It obeelom eekwi ti, togop aret iigo monggoorak. Ndi, it ando obeelom eekwi ambi nobarak wonage kenok, kumaarak togop mban logogin lek o. Kin arigin aret o.