Read Western Dani Titut 2 Bible Online

Titut 2 - Western Dani bible

Titut 2

¹Kat perak, wone mamunirage menggendak nogo wone kole wone kenok mban mamunirage logot o.

²It aap inanggok ti, iniki tum waka kenok, inayuk warak kenok, iniki warak kenok, it iniki abet mbakwi nu'lek menggaarak kenok, aap togop mendek logowak nduk, yorage logot o. Aakumi abok abet aret iniki kunik aganakwi, ndi, aaninggin inoba age kenok inogogumbuk logonet, waganggwi, eeko logowak nduk, yorage logot o.

³It kumi inanggok ti, it eeko menggaarak liippunuk, Ala ayuk wuko logonet, eeko logowak nduk, aap inanggok yoroorak yokkigirak nogo ndak-ndak aret yorage logot o. Inambe irip paga wonok nugwi, amburu kumili aganake mendek ndonggorogon nunggwi, ti eeko logorak lek o. Ata, wone abe wone kenok mban mamunirogo logowak nduk, yorage logot o.

⁴Ala wone miyuk-meya eerogo pukwak, it kumi ndugum nogo nen inogonggelomini inom, inaagalogwe inom, iniki kunik aganakwi, iniki warak ogwe, inoreewi inabuwa nen inigen tebenak nugwi, iname liirogon wonogwe, kumi iniki obeelom logonet, inogonggelomini inabu'me tebe yinuk, inoone konenggwi, eeko logowak nduk, it kumi inanggok nogo nen kumi ndugum mamunirogo logowak o.

⁶Ndi, it wologwe tawe ti, togoti aret iniki warak logowak nduk, inaruk wake logot o.

⁷Aakumi kat paga in wakkagak eeko logowak nduk, kat yi eekak ndi eekak eeke logonet, obeelom mban eerit nage logot o. Eerit nage logonet, wone mamunirage menggendak nogo, kat koone inom nabenogo ugun-ugun mamunirage, kayuk lek we i'ndok-i'ndok yorage, eeke logogun o.

⁸Ata, kayuk warak logonet, yorage kenok, it aap koone woorak, “Nineebi,” mbakwi nogo nen wone maluk ambi yoramenggendak paga yilunogo punuk, nit tebembinaniyak lek me, it inenggali aruwak nduk, wone koleewak wone kenggali wappagarak lek nogo mendek mban yorage logot o.

⁹It aakumi inayeloman nogo ti, inogobamini lombok nen yorogwe nogo, inoone konembunuk, wone onggo yoraga'lek iinok, inogobamini inikilom logowak nduk, yorage logot o.

¹⁰It aakumi inayeloman nogo ti, inogobamini inamendek yogoot kumaako logorak lek o. It nogo ti, yi eekak ndi eekak eeko logonet obeelom eerit nugwi paga aakumi ugun nogo nen, “Ninagap ndaka Ala wone waawok,” mbaruwak nduk, “Kinogobamini inamendek wagangga'lek liirogon arum logonip o,” yinuk, yorage logot o.

¹¹Ala iniki kunik nen wo'niragagerak wone nogo, it aakumi abok inagap ndaruwak nduk, kin agagerak.

¹²Ninogoba nggwok Ala ninagap ndaka Yetut Keritut, “Wi!” ugwi iigak, kin ari woroorak nogo, nit niniki lunik logonet, ninale'nggen paga tokkogwe me, Ala iniki kunik nen yo'nirage logonet, “Kit o nggween paga yime Ala kinagabiti mbaka'lek maluk eekwi inom, nggween paga eeriyak kiniki nengge inom, mbo punuk, kiniki warak a'nuk, maluk eeka'lek obeelom mban logonet, Ala wone liippunuk, mugurok nogo logonip o,” yinuk, yo'nirage menggerak.

¹⁴ Nit yi maluk ndi maluk eeko monggoorak nogo eeko logokwak ninonggo mbanogo piinogo pinanege, ndi, “An napuri nake leenak logonet, obeelom eeriyak iniki aganggen paga eerit nugu logowak,” mba'nuk, ninomaluk koorogo pinanege, eerikit nduk, nit ninake niya wagagerak.

¹⁵Wone yi yorage, “Yogop eeriyak ndogop eeriyak,” wone lengganinake, koone omaawi paga inaruk wake, eeke logot o. Ndi, aap ambi nen kat meek eerogo pagarak lek o.