Read Western Dani Titut 3 Bible Online

Titut 3 - Western Dani bible

Titut 3

¹Aakumi nen it o arum waka pemerintah inom, it aap inayuk warak menggaarak inom, inabu'me logonet, inoone konenggwi, ndi, eeriyak obeelom ambi kin age kenok, “Eeko logowok o,” yinuk, mbako logowak nduk yorage, eeke logot o.

²Aap ambi miyuk-meya eerogo pugwi, ndugwi pugwi, eeko logorak ti mage o. Ata, iniki yanggonak logonet, yi aap ndi aap abok aret inabuwa mbako logowak nduk, yorage logot o.

³Nit kunduk, maan togop aret nineenggo'lek wi negen wonogwe, wone yo'niragaatak konengga'lek wonogwe, tu alik me nomo agan nogwe, aap ambi ayeloman yoge kenok, “E o,” yinuk, eeke menggi kwak, nit niniki nengge kenok eeriyak ninikilom mbakwi nogo mban eekwi, eeko nogogurak. Yi mendek ndi mendek eerit nogo logonet, maluk mban eekwi, neebi-keebi yogwe, nanini-kanini yogwe, ti mendek mban eeko nogogurak kwe,

⁴ninagap ndaka Ala nen yi aakumi ndi aakumi inabuwa mba'nuk, obeelom eeppiyoorak nogo, kin ari wage nagagerik,

⁵ninagap nda'ninabeegerak. Nit obeelom eeko nogogurak paga ninagap nda'ninabulik o. Ata, at alik iniki nen ninabuwa mba'nuk, obeelom eeppinanege logonet, niniki maluk koorogo punuk, obaane'me ngget ndarogo pinanege, Aberiniki nen niniki ngget ogobakkigi'ninake, eereegerak ti paga ninagap nda'ninabeegerak.

⁶At ninagap ndaka Yetut Keritut eereegerak paga Ala nen Aberiniki ndonggok togon wo'niragagerak.

⁷At Ala iniki kunik nen eeppinaneegerak paga, “Aap yi, oba lek o,” yinuk, abu obeelom aret eerogo pinanege nagagerik, aap ambi ogoba eyate kolage menggi kwak, nit nineenik mondok-mondok logorak niniki lunik nogo kolaawok nduk, Aberiniki ndonggok togon wo'niragagerak.

⁸An wone yokkigi ti, abet aret o. It aakumi iniki Ala oba panggombunuk, abet mbakwi nogo iniki liippunuk, obeelom mban eeko logowak nduk, an yokkigirak ti, kulinik-kalinik koone omaawi paga yorage logot o. “Wone yi, obeelom aret o,” yinuk, waganggwi paga obeelom ambi eekkoloorak aret me, yorage logot o.

⁹Wone irip me op eekkoloorak lek mendek inom, ndarak alom mbininggwi inom, Muta wone mbanak paga, “Yogop-ndogop,” yogo logonet ndugwi pugwi inom, ti eerit nogo logonet, irip me time ambi eekkoloorak lek kagak we aanom warogo yogwe me, mbo puurak aret o.

¹⁰Aap aakumi iniki nomoninaka nogo nen abe wone mbo punuk, maluk mban eerit nage paga maluk onggo oba kwippatiyak kagak, eerit nage keenu me, ne mbere paga aruk wappunuk, mbo puurak aret o.

¹² An nen aap Aretemat ilik, aap Tikikut a, nappi wage logominggirik, o mayu kumulinggen wambi woroorak eyom paga o Nikopolit time logorak mbakirak me, time wonage me, kat mbet-mbet neya woraanok nduk, koongge logot o.

¹³ Wone amburu mbangga aap Tenat nogo inom, aap Apolot nogo inom, mbet-mbet nappiya wage logonet, inamendek lek kenok, wogoranu o.

¹⁴It ninapuri ti, eyo anggen yegeelik pogom logokwak, it aakumi aaninggin inoba age kenok yeenggwaarogo logowak nduk, yabu liirogon eeriyak mamunggologo logowak o.

¹⁵It aap ninom minggirak abok aret an ninom nen keyage wakkako o. Ndi, it Ala wone abet mba'nuk, iniki kunik ee'ninakwi kinom wonogwe time abok aret, “At Pawulut nen keyage wappinagagi o,” yinuk, yoret o. Ala iniki kunik en eeppagage logonet, karum aret logogin o. Naput wa!