Read Western Dani Pilemon 1 Bible Online

Pilemon 1 - Western Dani bible

Pilemon 1

¹PILEMON Keritut Yetut wone yoranet nage minggirak paga keele maa'nabeegwaarak an Pawulut ninawot Timotiyut nimbirak nen, kat ninore Pilemon ninom niniki kunik logonet, eeko monggoorak inom,

² nit niniriluk kwe Apipiya inom, aap Ala wone ninom piyanggo monggoorak ninore Arikiput nogo inom, Ala apuri kat kame kuwak eeko menggaarak inom, abok aret wone ambi yokkiraawi o.

³Ninogoba Ala ninowe Yetut Keritut imbirak iniki kunik nen wokkirogwe, kiniki ugun tayenak ale'nggen logobagip nduk, eeppinagagwi, eeko logogun o.

⁴ Nore Pilemon wae. Kat kiniki ninowe Yetut oba panggombunuk abet mbake menggendak inom, it Ala apuri alik leenak abok aret kiniki kunik aganake menggendak inom, kabok an konengge me, tamban eeke logonet, kat koba niniki aberak wonage me, kulinik-kalinik, nogoba Ala, “Wa,” yoge minggirak.

⁶Kit abet mbakwi paga Ala apuri kinom monggotak nogo kinom kiniki ambit eeppunuk logonet, “Ndogop ee'ninakerak o,” yinuk, pagan-pagan yogwe paga Keritut ninom kunik logonet obeelom mendek eeppinaniyak mbake menggerak nogo, ambinom kineenu arubagip nduk, kinake tamban eeke minggirak.

⁷ It Ala apuri alik leenak kiniki kunik aganake logonet, iniki eyak wappiinet nage paga niniki kwippaneegindak me, niniki ale'nggen nggwok mbake logonet, “Wa,” yokkigi o, noreeluk.

⁸Togop me, an koweeluk Keritut nimbirak kunik logonet, kat ambi eeriyak agaarak kagarak nogo, eeke logonok nduk, noone omaawi togon yokkiriyak op kwe,

⁹kat an niniki kunik lombok wonage me, noone we yanggorogon yokkiriyak ee'nake o. An Pawulut nogo aap abu nanggok agagirak o. Ndi, Keritut Yetut oone wonok yonggo nege nagagirak paga keele maa'nabeegwaarak yogondak yime logonet,

¹⁰ an naput Onetimut awone nogo yokkiri o. An keele maarogo mambiigo menggam yime logonet, an naput negen agagerak me,

¹¹aa'nduk, at kimbirak eerit noorak meek wonogogutak kwe, yogondak perak, kat kunduk, an kunduk, ninom eeriyak op lombok agaarak kagarak me nduk, yokkigi o.

¹²Yogondak keya woraawak nduk, kowagam nappi wagi ti o. Ndi, at eebe wage logonet, an niniki inom nikkenok wage agaarik o.

¹³Obeelom wone yoranet nege nagagirak nogo paga an keele maarogo paneegwaarak yime wonage me, at kat kobaane'me an narum yime nimbirak logorak op aret mbakirak kwe,

¹⁴kat unde nen, “E o,” yo'nega'lek me, obeelom eeppaniyak mbakendak kero, kiniki mba'nuk nen, “An eeppanuwam,” noone omaawi paga yokkirigin lek o.

¹⁵ Yogondak at keya wage nogo ti, aap inayeloman pogom keya wage ti lek o. At aa'nduk mbaganeegerak nogo ti, we ne ambiriluk mbo paganuk mbaganeegerak kero. Ndi, yogondak perak, kat kore kimbirak iniki kunik lombok logomunggup nduk wage me, mondok-mondok wamen o. At nimbirak ti, niniki mondok kunik kwe, kat kayeloman aret me, ndi, at kunduk, Keritut ninom niniki kunik logonet, keya woraagin me, mbo puurak mage o, noreeluk.

¹⁷Ti kenok, kat nimbirak ndak-ndak abet mbareegurak me, “Nore Pawulut aret o,” yinuk, an wo'naburak mbake nogo kokwak, at aret wamen o.

¹⁸Aa'nduk kimbirak logonet, maluk ambi eeppagage, kamendek ambi wagangge, eereegerak kenok, at yoriyak lek o. Ata, an nobaalombok me, an aret yo'nirumunggun o.

¹⁹“At Pawulut nen yoga'lek kagak liiru mbanggerak o,” nombake keyo, “An Pawulut nen aret onggo wokkirigin o,” yinuk, wone ambiriluk ti, an neenggi lombok paga aret liiru mbanggigi o. An wone yokkereegirak paga kiniki abet mbareegindak nogo ti, nanomat mbanak pogom koba wonage me, ambi yi inom koba pagakit lak kwe, mbo pigi o.

²⁰Ai, noreeluk. Yokkigirak ti, abet aret eeke keenok, “Yi Ala nen iniki koonggerak paga eeke,” komba'nuk, niniki ale'nggen ee'nabuwak nduk, at eebe wamen o. Nimbirak Keritut apuri mban aret me, niniki ale'nggen eerogo panenok nduk, yokkigi o.

²¹An liiru mbanggege yi nogo mban kat eeke logonok nduk, yokkege ti lek o. Ata, ando kat kiniki nen koombunuk ambinom nggwok togon eeke logomunggun abet aret kombake logonet mbanggigi o.

²²Wone yokkigirak ti, eeke logonet, kat nake tamban eeke Ala aruk konembunuk, an keya woroorak koonnabigin abet aret mbake me, woraanuk nogo yuurak o ambi ogobakkigirogo panege logot o.

²³ Aap Epaparat Keritut Yetut wone yorage nagagerak nogo paga keele maarogo pereegwaarak yime nimbirak logonet, keyage wakkako o.

²⁴ Ndi, it nawurilogwe ninom eekwi nogo, Marakut kunduk, Aritarukut kunduk, Ndemat kunduk, Lukat kunduk, nit abok aret nen keyage wakkako o.

²⁵At ninowe Yetut Keritut iniki kunik en eeppagage logonet, karum aret logogin o. An Pawulut Timotiyut nimbirak nen abu aret yokkogo o. Wa!