Read Western Dani Iberani 10 Bible Online

Iberani 10 - Western Dani bible

Iberani 10

¹Wone Muta yoreegerak eerit nogo nogogwaarak nogo ti, eebe lek aret kwe, eebe peebi obeelom ee'ninaburak wone yugu nogo, we ogut wakkagak aret eeko nogogwaarak me, yi tahun ndi tahun tapi-ndomba nogo mendek mban warogo Ala wogogak eekaatak kwe, ti paga it wogori wogo nogogwaarak nogo obeelom ogo logolik.

²It wogori wogo nogogwaarak nogo ti paga obeelom ogo logonetak en, inomaluk inikime aberak wonage nogo, lek a'netak me, peebi ambinom warogo wogori wagak eeko logonetak lek o.

³Tapi-ndomba amiya ti paga ninomaluk lek eerogo puurak meek o. Aberak mban wonage kenok, yi tahun ndi tahun tapi-ndomba wonok Ala wogori wagak mban eeko nogogwaarak.

⁴

⁵ Togop me, Keritut nggween paga wambi woraakit nduk, at ogoba Ala yoge logonet, “Kat kake warogo wokkugwi inom, yi mendek ndi mendek kat kake pugwi inom, Kat keebi mbake logonet, an neebe aakumi ineebe kwak agago panenok nduk, punogo paneegindak o.

⁶Kake warogo kani kunggwi inom, Inomaluk lek aruwak nduk, kake warogo wokkugwi inom, Kat kiniki ale'nggen mbaka'lek keege nagagirik,

⁷Ai, nogoba Ala o. An eeriyak nombareegindak mbuku pirik-perek paga liiru mbanak wonage nogo, an neebe nen aret eerikit nduk, agarik o,” yinuk, yoreegerak.

⁸Keritut nen Ala yoge logonet, “Yi mendek ndi mendek kat kake pugwi, kake warogo wokkugwi, tapi-ndomba warogo enaani kani kumbugwi, aakumi inomaluk lek eerogo piyaanok nduk, warogo wokkiri wogwe, eekwi ti mendek abok aret ti, kat kiniki ale'nggen lek keebi mbake keegak eekwi o,” yinuk, yoreegerak nogo ti, wone Muta yoreegerak aret eekwi kwe kagak, yoge nagagerik, ti'nuk,

⁹“An eeriyak nombareegindak nogo, an neebe aret eerikit nduk, agarik o,” yinuk, yoreegerak ti paga, it aa'nduk eeko nogogwaarak nogo, lek eerogo punuk, obaane'me peebi alik ambi eeko logowak nduk, tiyappereegerak kogo o.

¹⁰Yetut Keritut nogo nen at Ala eeriyak iniki mbareegerak nogo ndak-ndak aret eeke logonet, ninake kambikit nduk, at eebe ne ambit aret Ala wogoreegerak ti paga, ninomaluk mondok lek eerogo punuk, obeelom agago pinanege nagagerik, nineebe Ala ake leenogo pinaneegerak.

¹¹ It aap Ala unde abok aret ko'lu-kii'me kulinik-kalinik aakumi inake eeko logonet, tapi-ndomba nogo mendek mban warogo Ala wogogo nogogwaarak kwe, inomaluk lek aga'lek itok aret wonagagerak.

¹² At Ala unde Keritut perak, nit abok ninomaluk mondok lek eerogo pikit nduk, “Inake kambikit o,” yinuk, at eebe ne ambit nggaruk togon Ala wogoge nagagerik, Ala eenggi abe'nggan paga kwi'nari laganeegerak logonet,

¹³Ala nen at inom wim mbanak mendek aan lebenogo abu'me tebenogo piyaawak nduk, tokkage agaarik o.

¹⁴Ala nen at apuri at ake leenogo patiyak mbareegerak nogo, inomaluk abu lek eerogo punuk, mondok obeelom aago logowak nduk, ninake kangge logonet, at eebe ne ambit nggaruk togon Ala wogoreegerak.

¹⁵ At Aberiniki nen nit yo'nirage logonet, “Ti eyom abu aret age kenok, it Iterali paga wiganak wone ngget mendek ninom koonogo puurak nogo yi aret o. Eeko logorak yoragagirak nogo inikime nabenogo piige, It inikime liiru negen mbanogo piige, Eerigin o,” yinuk, ari nagagerik, ti'nuk, ambi ari logonet, “It Ala wone taganogo pugwi, Maluk eerit nugwi, Eekwi iinok, An aberak logogin lek o,” yereegerak Aberiniki nen yo'niragagerak ti paga, Aberiniki kunduk nit mbakwi ndak-ndak aret mbake menggerak kogo ogoorik o.

¹⁶

¹⁷

¹⁸Togop me, Ala wone taganogo punuk, maluk eeko nogogurak nogo, muk lek eerogo pereegerak me, ambinom lek eerogo puwak nduk, nit nen ambi wogoriyak lek aret kogo o.

¹⁹ Togop me noreewi o. Yum oolo tugunik nogo ti, at eebe pogom aret me, ninake kambeegerak ti paga tu ngget mendek yarogo pinanit Mage Lombok Menggim unggwi nage nagagerik, time mondok-mondok eenik logonet, ninake eeke wonage me, at amiya wundeegerak ti paga, nit togon Mage Lombok Menggim nogome ninagabiti lek ungguurak op aret kogo ogoorik o.

²⁰

²¹Nit Ala apuri ninake eekak yuwak nduk, Ala unde ninowe nggwok Ala awi wurik negen mbogut paga wonage me,

²² niyo abe mili-mili paga ninabin koorogo pinanege, ndi, maluk eeko nogogurak ninikime aberak logokwak, lek eerogo pinanikit nduk, at amiya paga werenogo pinanege, eereegerak me, “Abet aret panggo yi ungguurak, yegerak,” mba'nuk, niniki mondok abe paga at owagam panggo yi ungguwok o.

²³At nen, “Ndogop eeppinagagin o,” yinuk, abok yo'niragagerak nogo, alik ambi koonggak eekeelik, yegetak nogo a'me aret eeke menggerak me, nit eerogo pinaniyak wone abet mba'nuk, waganeegurak niniki lunik wonogwe nogo, mondok nggirik-nggerok agago porogo logowok o.

²⁴Ndi, niniki-kiniki kunik eekwi, at ambi nen at ambi obeelom eeppegak eekwi, eeko logonet, at ambi nen at ambi kini wuppegak eeko logowok nduk, liippogo logowok o.

²⁵It aakumi nit Ala wone yogome ninom kuwak eekulik nogo kokwak kit togop eerugup o. Ata, niniki eyak wat-wat yogwe ti, “Yetut woroorak abu panggo yi wage kagi,” mba'nuk, niniki aganggen kerek togon ambinom eeko logowok o.

²⁶“Ala ndogop menggerak o,” yinuk, wone waganeegurak nineenu logonet kwe, kagak, maluk eeriyak niniki koombunuk eerit mban nogwe niinok, ninomaluk lek eerogo pinanuwak nduk, alik ambi warogo Ala wogoriyak lek me,

²⁷ “Ala nen ninowak loonogo punuk, anini ninoba pinanege logonet, kani eyak mondok alik paga at inom ogoorak wonogwe nogo, ineebe pup eerogo piyoorak nogo ti, nit ninom lek eerogo pinanigin kagi,” yinuk, ninagabiti mbako logowok o.

²⁸ Aap ambi wone Muta yoreegerak nogo tagangge kenok, aap mbere ilik, kenagan a, nen, “Abet aret ndogop eekerak o,” yogwe iinok, kambuwak nduk, abuwa mbaka'lek mondok warogo pogo menggaarak nogo lek a?

²⁹ Togop aret eeko menggaarak me, nit Ala wone koonogo yo'niragagerak nogo, abet mbako logonet, at apuri inomaluk lek eerogo punuk, ake leenak logowak nduk, amiya wundeegerak nogo, aap ambi nen, “Wone ti, abe lek o,” yinuk, Ala aput iyok kenden aambele eerogo negen pege, ndi, at iniki kunik en obeelom eeppinanege menggerak Aberiniki nogo inom miyuk-meya eerogo pege, eeke kenok, at teppigin mbakop? Mondok lek o. Ala nen maluk onggo mondok alik negen at oba kwippege kaamunggup o.

³⁰ “Aap inane'me wakwi inom, maluk onggo eeppiigwi inom, an nen mban aret eeppiige logogin o,” yinuk, ari, ndi, ambi, “Ala nen at apuri inowak loonogo maluk onggo inoba piyaagin o,” yinuk, ari, yereegerak eebe nogo nineenu aret o.

³¹At eenik menggerak Ala nogo nen nit maluk eekwi onggo abera'lek me ninoba kwippinanege nogo ti, mondok iya ninamineeri ne agan nage kagak eeppinanege kaagun o.

³²Kit aa'nduk obeelom wone waganggo mbareegup, kinikime eya eekkinabeegerak me, aaninggin-paaninggin alik negen kinoba pinagagwi iigak, kinogogumbuk logonet, waganggo nogogutak nogo, abeko logonip o.

³³Mondok alik negen eeppinagago logonet, kit ando nggwok paga kinendage miyuk-meya eerogo maluk eeppinagagwi, ndi, it ando inookwi iinok, kinagabiti mbaka'lek, inili yogwe me, kinom aret kinookwi, eeko nogogwaarak nogo o.

³⁴Kinoreewi ando keele maarak wonogwe nogo, inabuwa mbako logonet, yeenggwaarogwe, ndi, kinamendek ndinggola unggwogwe iigak, “Namendek abe mondok logorak mendek alik ambime wonage aret me, op aret kolaga o,” yinuk, kiniki ale'nggen mbakwi, eeko nogogutak me,

³⁵yogondak kit kinookwi iigak, kinogogumbuk logonet wone abet mba'nuk waganeegutak nogo, mugurok nogwe kiinok, onggo nggwok wokkiraagin me, mbo puurak mage o.

³⁶ At Ala nen ari logonet, “At woroorak nogo ti, elaambirik logonuk woraagin lek o. At mbet-mbet aret woraagin me, it an napuri iniki abe koonak nogo nen iniki noba panggombunuk abet mbakwi iinok perak, mondok-mondok ineenik aret logogun o. Ndi, it abet nombakwi nogo mbo pugwi iinok ti, an inabuwa inombarigin lek o,” yinuk, yereegerak me, Ala nen kit eeko logorak kinombareegerak nogo, abu eekwi kiinok, wokkiroorak yereegerak nogo wokkiraawak nduk, maluk eeppinagagwi iigak kwe, kinogogumbuk logonet, waganggo logonip o.

³⁷

³⁸

³⁹It aap wone abet mba'nuk waganeegwaarak nogo, mbo pugwi iinok, Ala nen ineebe lek eerogo piyaagin nogo mendek nit lek o. Ata, it abet mbakwi iinok, mondok-mondok ineenik logorak nogo mendek nit aret ogoorik o.