Read Western Dani Iberani 3 Bible Online

Iberani 3 - Western Dani bible

Iberani 3

¹Togop me noreewi o. At mbogut paga menggerak nogo nen kinayonggo pege nagagerik, at apuri leenogo pinagareegerak me, nit wone abet mba'nuk, mugurok nogwe niigak, Ala unde ninowe nggwok logonet ninake eeke logowak nduk, nappi wagagerak Yetut nogo, liippogo logowok o.

² At Muta nogo, Ala awi wurik me logonet, eeriyak nogo puk aga'lek ko'lu-kii'me eeke nagagerak kwak, ninake eeke logowak nduk, Ala nen at Yetut mippereegerak nogo ndak-ndak eerit nage menggerak.

³O wurik tebenak kagak, aap o wuketak nogo tiyappogo mengga kwak, Muta tebenak kagak, Ala nen Yetut mondok tiyanak logorak mbareegerak o.

⁴Yi o ndi o ti, aakumi nen aret wuko menggaarak kwe, yi mendek ndi mendek abok aret ti, Ala nen aret ogobakkigireegerak.

⁵At Muta nen, “An Ala ayeloman aret me,” yinuk, ake eerit nage logonet, peebi eeriyak wone aakumi ineenu aruwak nduk, Ala awi wurik me puk aga'lek ko'lu-kii'me at ake eeke nagagerak kwe,

⁶Keritut perak, ogoba Ala awi wurik unde aput at aret me, togop aret ko'lu-kii'me eeke menggerak. Ndi, nit perak, nit niniki lunik ale'nggen mbakwi nogo, “Abet aret ee'ninabi woraagin o,” yinuk, at woroorak tokkogo logonet, mbo pega'lek mondok nu'lek porogo wonogwe niinok, Ala awi wurik ti, nit nineebe aret mbaruwok o.

⁷ Togop me, Aberiniki nen ari logonet, “Kinombomini karume wogo logonet, inogogumbuk a'nuk, Ala wone, Nineebi o, yinuk, Ala anini wunduwak nduk liirit-laarit yorit wogo nogogwaarak nogo kokwak, yogondak Ala nen wone kit yokkirage kenok, Nineebi o, yinuk, kinogogumbuk arugup o.

⁹Karume time tahun 40 paga kinombomini inenggela'me eerit wage nogo, inigen kogo logonet kwe, Anini wungge kaamun ilik, lek a? yinuk, liirit-laarit yogak mban eeko nogogwaarak me,

¹⁰anini nen mondok mberiragagirak. Mberirage logonet, An yokkirage eeka'lek logonet, kiniki mondok worokot-liinik monggotak yi, neebi a, yinuk,

¹¹An yonggonggolage minggim, kit ninom yonggonggola ungguurak abu lek o, yinuk, Nanini nen nowak mbanogo wone ti abu aret yoragagirak o,” yinuk, yereegerak.

¹²Togop aret yereegerak me, noreewi o. Kit togon Ala mondok eenik menggerak kagak, nomonogo mbo punuk, abet mbaka'lek kiniki maluk koonit nugwi kiyo, tum wakkologo logonip o.

¹³“Ala nen ninooka'lek kagak,” mba'nuk, maluk eerit nogo logonet, kiniki omaawi eekkinake kero, wone, “Yogondak o,” yereegerak nogo ti, lek aga'lek awo aret wonage me, Ala nen yokkirage nogo, konenggo logonet, kiniki eyak wat-wat yogo logonip o.

¹⁴Nit aa'nduk wone konembunuk, “Yi abet aret o,” yinuk, waganeegurak nogo, nggirik-nggerok agago porogo wonogwe niigak, o age yobok ari nage kenok, Keritut ninom kunik me, eeppinaniyak mbareegerak nogo, eeppinanege logogin aret o.

¹⁵ “Inogogumbuk a'nuk, Ala wone, Nineebi o, yinuk, Ala anini wunduwak nduk liirit-laarit yogo nogogwaarak nogo kokwak, Yogondak Ala nen wone yokkirage kenok, Nineebi o, yinuk, kinogogumbuk arugup o,” yinuk, yereegerak liiru mbanak nogo ti,

¹⁶ taani nen Ala wone konembunuk, “Woorak nineebi o,” yinuk, at anini wunduwak nduk yogo nogogwaarak mbakop? Lek o. At Muta nen it aakumi Iterali abok aret o Metit nen wogoren wundi wagagerak nogo nen aret liirit-laarit yogo nogogwaarak nogo lek a?

¹⁷Ndi, Ala nen anini inoba piige kagak, tahun 40 eereegerak nogo, taani o? Lek o. It maluk eerit nogo mbareegwa, inooreegerak karume kambit nogogwaarak, inowak nggininit nagagerak nogo lek a?

¹⁸Ndi, “An yonggonggolage minggim kit ninom yonggonggola ungguurak mondok lek o,” yinuk, at owak mbanogo wone yoragagerak nogo ti, taani yoragagerak mbakop? Lek o. It at oone taganogo punuk alik eerit nogo nogogwaarak nogo lek a?

¹⁹It kinombomini nen aret iniki at oba panggombunuk, oone abet mba'nuk, mugurok nogo logolik me, it unggwi noorak meek aret agagerak iigo o.