Read Western Dani Iberani 4 Bible Online

Iberani 4 - Western Dani bible

Iberani 4

¹Togop me, at ninom yonggonggola ungguurak nduk, “Woraanip o,” yinuk, abok yo'niragagerak nogo, lek aga'lek awo aret wonage me, nit ambi eerumonggoorak paga ninom yonggonggola ungguurak meek age kero, liippunuk, eeko logowok o.

²Ninombomini wone obeelom wone yorogogwaarak koneneegwaarak kwe, iniki abet mba'nuk woolik me, wone ti paga ambi obeelom eekkoloolik we aanom warogo koneneegwaarak nogo kokwak, nit togon ndak-ndak, obeelom wone yo'nirogogwaarak nogo, abet mba'nuk wagangga'lek kenok, unggwi noorak meek age kero, liippogo logowok o.

³ At Ala nen, “An yonggonggolage minggim, kit ninom yonggonggola ungguurak abu lek o, yinuk, Nanini nen nowak mbanogo abu aret yoragagirak o,” yinuk, yereegerak liiru mbanak nogo ti, mbogut-nggween wakkage logonet, at eeriyak mbareegerak nogo, worok togon eeppunuk, muk tat yonggonggolage logonet yereegerak me, ti ngge nduk yereegerak mbakop? Lek o. Ti, nit abet mbakwi ninom peebi yonggonggola ungguurak nogo aret nduk, yereegerak o.

⁴ Ti'nuk, nogo 6 yippunuk, ko'lu 7 paga eeriyak Ala yereegerak liiru mbanak nogo, aap ambi nen mbiningge logonet, “At Ala nen, An yi mendek ndi mendek abu aret wakkagarak me, yinuk, nogo 6 yippunuk, ko'lu 7 paga tat yonggonggolage puk wonagagerak o,” yinuk, yereegerak nogo mbiningge,

⁵ ti'nuk, ambi ari logonet, “An yonggonggolage minggim, it ninom yonggonggola ungguurak abu lek o,” yinuk, yereegerak mbiningge, eereegerak liiru mbanak wonage ti paga

⁶it aa'nduk obeelom wone yorogogwaarak nogo, taganogo mbo pereegwaarak paga Ala yonggonggolage menggim unggwi noolik me, inobaane'me aakumi alik mendek inom yonggonggola ungguwak nduk yereegerak kogo o.

⁷ Togop me, wone, “Yogondak kit Ala nen yokkirage kenok, Nineebi o, yinuk, kinogogumbuk arugup o,” yereegerak wone aginggwe aa'nduk mbininogo yokkiragarak nogo aret yi tahun ndi tahun eeppunuk, o peebi aap Ndawut nogo togop aret yoreegerak liiru mbaneegerak me, wone, “Yogondak o,” yinuk, Ndawut yoreegerak nogo ti, Ala nen ne alik ambi eyom paga aakumi alik mendek inom yonggonggola ungguwak nduk, iniki koombunuk, yoreegerak kogo o.

⁸ Aap Yotuwa nen yonggonggologo menggam ninombomini piya woraanetak en, Ala nen ne alik ambi eyom paga yonggonggoloorak yereegerak wone nogo ti, yenetak lek kwe,

⁹yereegerak aret me, Ala nen nogo 6 yippunuk, ko'lu 7 paga tat yonggonggolage wonagagerak nogo kokwak, yogondak nit Ala apuri kunduk yonggonggologo logowok nduk, o ne ambi punogo pereegerak wonage o.

¹⁰ Ala yonggonggolage menggim ninom yonggonggola ungguurak mbakwi kenok, Ala nen yi mendek ndi mendek abu wakkage nagagerik, tat yonggonggolagagerak nogo kokwak, nit ndak-ndak tat yonggonggologo logogun o.

¹¹Togop me, it Iterali mendek aa'nduk Ala wone taganogo mbo pogo mbareegwa, “Kit yonggonggola ungguurak lek o,” yinuk, yoragagerak nogo kokwak, nit ndak-ndak yo'nirage kero, unggwi nawok nduk, wakkenet unggwogo logowok o.

¹² At Ala mondok eenik logonet, alik en eerit nage menggi kwak, at oone ti ndak-ndak mondok omaawi alik en ninikime nggaganogo yo'nirage menggerak. Mbuti nggawi ngget peenok-peenok maarak ti, ngget mbuuluk negen me, ninendobanggun yunggu'me mondok pene'na unggwage logonet, ninowak kagak ninowak ako kin eeppi unggwage menggerak kwe, Ala wone yi perak, ngget mondok alik negen aret me, ninikime mondok nggoguk yi unggwage logonet, eeriyak niniki koonggo monggoorak nogo, abok aret leenogo kin eeppege menggerak.

¹³Nit aakumi inom, yi mendek ndi mendek ogobakkigirik inom, abok aret at Ala enegen kage menggerak me, ambit-ambi at enegen neega'lek me nduk, kumaa'nariyak abu meek o. At enggaanom paga yi mendek ndi mendek abok aret kin paga wonage me, at abok aret enegen kage menggerak o. Togop aret me, nit eeko monggoorak nogo ambi kumaappugun lek abok aret mbininogo at yorugun o.

¹⁴Nit Ala unde ninowe nggwok Ala aput Yetut nogo, mbogut ta'mban-mban aago kagak irimbaga agi lombok tiyarogon kwi'nari lagangge nagagerik, yogondak ninake eeke wonage me, nit wone abet mba'nuk waganeegurak yogo monggoorak nogo, mondok nggirik-nggerok agago porogo logowok o.

¹⁵Ala unde ninowe nggwok nogo nen nit aap nggween paga mendek me, ninobaabut ninggin-nanggin eekwi niinok, “Eebi,” ninomba'nuk ninake ugun-ugun eekeelik o. Ata, “An kagagirak nogo aret eeginake o,” yinuk, ninake liirogon eeke menggerak o. Nit ninabut mbaniyak nduk, aaninggin-paaninggin ninoba age menggerak nogo, at togop aret oba age kagak maluk eeka'lek ogogumbuk logonet, waganeegerak eenu me,

¹⁶yogondak aaninggin ambi ninoba age kenok, ninabuwa mbake logonet, iniki kunik en eeppinanege kaawok nduk, ninagabiti mbaka'lek at Ala iniki kunik en eeppinanege menggim nogome panggo yi ungguwok o.