Read Western Dani Iberani 5 Bible Online

Iberani 5 - Western Dani bible

Iberani 5

¹At aap Ala unde inowe nggwok nogo ti, aakumi nen Ala alut eeko logonet, yi mendek ndi mendek ake pi wagaatak nogo, Ala wogoge, ndi, maluk eekaatak nogo, it inake warogo kani kumbege, eeke logowak nduk, Ala nen aakumi inenggela'me nen ambi leenogo mippegak eeke menggerak.

²At aap ti, aap nggween paga mendek maluk eeke menggerak aret me, aakumi Ala wone liippega'lek nomo agan nogo logonet, maluk eekwi iinok, inabuwa mba'nuk, inake yanggorogon eeke menggerak.

³ Aakumi maluk eekwi nogo, inake warogo Ala wogoge logonet, at togon aap nggween paga mendek maluk eeke menggerak aret me, omaluk lek eerogo puwak nduk, ake warogo Ala wogoge menggerak.

⁴ Ndi, it iniki mba'nuk, “An Ala unde inowe nggwok logokit o,” yinuk, miikkologo logolik. Ata, Ala nen aap Karun leenogo mippereegerak nogo kokwak, leenogo mippiige menggerak.

⁵ Togop ndak-ndak at Keritut nogo nen, “An Ala unde inowe nggwok logokit o,” yinuk, tiyappatulik o. Ata, Ala nen at yoge logonet, “Yogondak kat an naput age, ndi, an kat kogoba age, eekoorak o,” yinuk, yoge,

⁶ ndi, aap ambi nen Ala yereegerak wone liiru mbanak mbiningge logonet, “Aap Meliketerek eeke nagagerak nogo kokwak, kat an neebe unde logonet, mondok-mondok nake eeke logomunggun o,” yinuk, yereegerak mbiningge, eereegwaarak ti paga Ala nen aret leenogo mippereegerak kogo o.

⁷ Maan at Yetut aakumi kwak nggween paga yime nege logonet, kambuurak agabiti nen leenggu maake logonet, oone nggwok paga tamban eeke, “Nagap ndaru o,” yinuk, Ala nggino yoge, eereegerak nogo, ogoba nen yoge kenok aruk konok mban eeke nagagerak me, aput nen tamban eereegerak nogo Ala aruk koneneegerak kwe,

⁸“Naput aret kwe, andi-pandi oba pemenggaarak paga an yoge nogo, E o, yinuk, yanggonak eeke logorak mamunggolaawak o,” yinuk, teppereegerak.

⁹Teppege mbareegi, nit ee'ninake menggerak nogo, at abu li'luk eerogo mamunggolage nagagerik, nit at oone woppunuk, eerit nogwe nogo, abok aret nineenik mondok-mondok logowok nduk, ninagap ndake logorak alom at aret agagerak me,

¹⁰Ala nen, “Aap Meliketerek eeke nagagerak nogo kokwak Ala unde inowe nggwok kat aret o,” yinuk, mippereegerak.

¹¹Wone yi mendek yokkiroorak ambik wonage kwe, ambinom koneniyak anggon eekkinake kagarak me, liirogon mbininogo yokkiroorak meek ee'naki o, noreewi.

¹² Kit o maan togon Ala wone konenggo nogogutak me, muk mamuniragak mendek logorak kwe, omaawi mendek noorak meek kenok, yilak amburu negen mban nonggo logorak kinobaabut kiigirak me, alom wone aa'nduk konenggo nogogutak nogo mendek mban ambinom mamunggiroorak ogotak kiigo o.

¹³ It yilak amburu nunggwi nogo ti, elege-aabologwe pogom me, maluk eeriyak obeelom eeriyak eraambe yelok kaga'lek aret menggaarak kwe,

¹⁴ omaawi mendek nunggwi iinok perak, aap kole iniki warak pogom, Ala wone mondok liippunuk eekwi me, maluk eeriyak obeelom eeriyak eraambe yelok aret kogo menggaarak.