Read Western Dani Yakobut 2 Bible Online

Yakobut 2 - Western Dani bible

Yakobut 2

¹Nowe-nawot o. At abu tiyanak menggerak ninowe Yetut Keritut nogo, kiniki oba panggombunuk abet mba'nuk eerit nogo logonet, aakumi inetenggen liippiinok, eeppiigo logogup o.

²Aap ambi nen mberaarenggen mbuti emas paga yarak inom, yum abu kigirikwe inom, yippunuk, kit tamban eeko monggo'nom unggwi wage, ndi, aap ambi eenggi lek yum maluk yirik unggwi wage, eekwi iinok,

³aap yum abe kigirikwe yirik nogo ayuk wuppunuk, yogo logonet, “Nogoba o. Kwi'nogo menggam abe paga yayi kwi'nari mok o,” yogwi, ndi, aap eenggi lek nogo ayuk wuka'lek logonet, “We taati mi'ndak logorak a, ilin me nggween paga time kwi'nagan a,” yinuk, yogwi, eekwi kiinok,

⁴kit kiniki nen aap ambi maluk, ambi abe, mba'nuk, yorogo logomunggup nogo lek a? Ndi, inetenggen liippiinok, yorogwe me, aap wone owak loongga nen eeko mengga kwak eeko logonet, maluk aret koombunuk, yorogo logomunggup nogo lek a?

⁵ Nowe-nawot o. Kit an niniki kunik me, wone yi, liirogon konenggo logonip o. It aakumi nen, “Aap ti, ineenggi lek,” inombakwi iigak, Ala nen miirinabeegerak nogo ti, ineenggi warak kwak, “Iniki mondok abet mbaruwak,” mbake, ndi, “Aap abok aret, Nogoba ao, yinuk, iniki kunik ee'nakwi iinok, nabu'me piyaagin o,” yinuk, abok yoragagerak nogo, Ala abu'me piige menggim ineyate kokwak unde eeppiige, eeruwak nduk, miirinabeegerak nogo lek a?

⁶ It aap ineenggi lek nogo, Ala nen aret miirinabeegerak kagak, kit nen meek eerogo piigwi kiigi o. Piyak-payak eekkinako logonet, niikkiren wone owak loonggo menggam pinagi nogwe nogo ti, it aap ineenggi warak nen eerogo pinagagwi nogo lek a?

⁷Ndi, kit at anebunu mendek ogogutak endage tiyanak menggerak nogo miyuk-meya eerogo pugwi ti, it aap ineenggi warak nen eeppugwi nogo lek a?

⁸ Ala wone mbanak ndak-ndak eeko logonet, “It ineebe iniki kunik eekkologo mengga ti kwak, aakumi inom menggaarak ti, togop aret iniki kunik aganako logowak o,” yinuk, nit ninogoba endagembogut wone lengganogo yo'niragagerak nogo eekwi kiinok ti, op aret eekwi kwe,

⁹ aakumi inetenggen liippiinok eeppiigwi kenok perak, maluk eekwi aret o. Ti eekwi paga wone yugu nogo taganogo pugwi me, Ala nen, “Kit maluk aret eekwi o,” yinuk, yokkiraagin o.

¹⁰Ala nen wone lengganogo yo'niragagerak nogo abok aret kit eeko logonet kwe, ambiriluk ambi eeka'lek kiinok perak, wone ti abok aret eeka'lek me, maluk aret eekwi o.

¹¹ At Ala nen, “Kwe kundugume wuriyak mage o,” ari logonet, “Aap wariyak mage o,” inom yereegerak me, kit ambi kwe wuka'lek logonet kwe, aap wakwi kiinok ti, Ala wone yugu taganogo pugwi me, maluk eekwi aret o.

¹²It aakumi nen yogo logonet, “Ala nen wone lengganogo yo'niragagerak paga wondet agago pinanege menggerak wone ti paga ninowak loonigin o,” yinuk, abeko logonet, inoone yogwe, eerit nugwi, eeko mengga kwak, eeko logonip o.

¹³ Kit kinoreewi inabuwa nen obeelom eeppiiga'lek kiinok, Ala nen kinowak loongge logonet, kinabuwa nen obeelom eeppinagagin lek o. Ndi, kinoreewi inabuwa nen obeelom eeppiigwi kiinok perak, kinowak looniyak nogo kinagabiti lek aret logomunggup o.

¹⁴Nowe-nawot o. Kit ambi nen, “Niniki abet mbake o,” yogwe kwe, eebe eeka'lek kiinok, kit abet mbakwi nogo kin age mbakop? Ala wone yugu eebe eeka'lek logonet, we abet mbakwi paga mban Ala nen kinagap ndarigin mbakop?

¹⁵Kiniriluk ambi ilik, kinoreeluk ambi a, ayum inom, ko'lu-kii'me noorak mendek inom, wonage lek kagak,

¹⁶kit ambi nen at eebe op logowak nduk wogoga'lek logonet, “Kambi ndonggorogon nengge, karogwiyum yikkolage, ee'nuk, kiniki ale'nggen paga nage logot o,” yinuk, yogwi kiinok, ti yogwi paga kit abet mbakwi nogo kin age mbakop?

¹⁷Nit niniki abet mbakwi nogo ndak-ndak eebe inom eeka'lek logonet, abet mban mbakwi kenok ti, we aanom warogo abet mbakwi kogo o.

¹⁸Togop aret kwe, kit ambi nen, “Kat abet mban mbake kwe, an perak, eebe inom aret eeke o,” yinuk, yogwe kiigirak me, wologo wae. Kit abet mbakwi nogo, eebe inom eeka'lek kiinok, “Yi aap abet mbaka'lek aret,” kinombarugun kwe, an perak, abet mba'nuk eebe inom aret eeke me, “Yi aap abet mbake aret,” nombarugun yi kogo ogotik?

¹⁹ Kit nen, “Ala ti, alik aret menggerak abet mbako ogoorik o,” yinuk, mbakwi ti op aret kwe, it kugi kunduk wone ti togop aret abet mba'nuk, inagabiti nen inaganak nuguranet nugu menggaarak kwe, kit perak, abet mba'nuk puk mban wonogwe kiigi o.

²⁰Nowe-nawot o. Kit wi negen agan nugwi kiigi o. Eebe eeka'lek kagak abet mban mba'nuk, puk wonogwe kiinok ti, “Yi aanom warogo aret abet mbakwi o,” yinuk, mbaka'lek ogotik ya?

²¹ Nit ninogoba Abarakam nogo nen Ala ake warogo kani kunggo menggam ogobakkigirogo punuk, at aput Itak Ala ake pereegerak nogo paga Ala nen, “Yi aap abe o,” yinuk, obeelom agago pereegerak nogo lek a?

²²Ala abet mbake logonet, eebe inom eeke mbareegi, “Aap yi, abe o,” yinuk, obeelom agago pereegerak yi kogo ogotik? Ndi, eebe aret eereegerak paga at iniki abet mbareegerak nogo yobok yuulik, mondok endak aret agagerak o.

²³ Ti eereegerak paga, “Aap Abarakam nen Ala abet mba'nuk iniki at oba panggombereegerak paga, Ala nen, Aap yi abe o, yinuk, obeelom agago pereegerak o,” yinuk, Ala wone liiru mbanak nogo a'me lik ari mbareegi, at Ala nen, “Aap Abarakam nogo ti, an nore aret o,” yinuk, yereegerak.

²⁴Ti kenok, niniki abet mba'nuk eekwi kwe, eebe inom eeka'lek kagak, Ala nen, “Aap yi, abe o,” yinuk, obeelom agago pinanigin lek o. Ata, abet mba'nuk, eebe inom eekwi paga eeppinanege menggerak yi kogo ogotik?

²⁵ Ti eereegerak ndak-ndak, kwe terak wuka Arakap nogo nen it aap Iterali mendek o pekkoorak nduk wogogwaarak nogo, inookwi iyo, kumaappiinok, tu alik paga nomonogo nappiyareegerak nogo paga, Ala nen, “Kwe yi, abe o,” yinuk, obeelom agago pereegerak nogo lek a?

²⁶Ninagabolo wonage kagak, niniki nggigik togon nage kenok, “Aap ti kanggerak o,” yinuk, yogo monggoorak nogo ndak-ndak, niniki abet mbakwi kwe, wone ti eebe inom eeka'lek kenok ti, aanom warogo abet mbareegurak aret mbaruwok o.